1 Samweli 31 - KITABU KITAKATIFU

Likuza lia Saolo na vayaayi veve

¹ Avandu va Filisitia valwaana uvulwani na vandu va Isiraeli ku Kiguru cha Giliboa. Avandu va Isiraeli vanyingi viitirwa yo, na vaatigara harara na Umwami munene Saolo na avayaayi veve, viiruka.

² Navuzwa avandu va Filisitia vavalondelera nivavagumira kandi vita vavaga ku vayaayi va Saolo, Jonazani, Abinadabu na Malikishua.

³ Uvulwani vwali vululu kukumbiriza Saolo na oyo mwene yalaswa nu muvano gwuvuta vwavasigu na yaasalirizwa vudamanu ligali.

⁴ Yavolera muyaayi waginga viugi vivie, “Somola kivavi chicho na unziti, kunangwa avandu va Filisitia avasinde vavuli kongolera kehenyahenye nukunzita.” Navuzwa muyaayi zana yaali nuvuti vonene muno okokora ndi. Kunangwa Saolo yavugula kivavi chiche naagwa kucho.

⁵ Muyaayi oyo yalora ndi Saolo ukuzi, kunangwa naye kandi yagwa ku kivavi chiche mwene kandi yakuza harara na Saolo.

⁶ Na nindio Saolo, na vayaayi veve vavaga, numuyaayi vaakuza; Avandu vasaza va Saolo vosi vaakuza kulidiku liene yilio.

⁷ Lwa vandu va Isiraeli ku lovega lundi lwi Livona lia Jezireeli kandi ivugwi wumugera gwa Jorodani vahulira ndi liihi lia Isiraeli vamali kwiruka ma kandi Saolo harara na vayaayi veve vamali kwitwa, vaang'araa madaala gaavo niviruka. Ahene yaho vandu va Filisitia vaza nivavugura nokomenya mu.

⁸ Lidiku lialondaku inyima wi liihi, avandu va Filisitia vazia kulanya miviri ja vakuzu; na vanyoola miviri ja Saolo na vayaayi veve vavaga nijiveeye ku Kiguru cha Giliboa.

⁹ Vakala mutwi gwa Saolo nigutura kumuviri, nivanaavura isalamba niviuma vive kandi nivatuma vatumwa navio mu kivala choosi cha vandu va Filisitia kovoolera misambwa na vandu vosi amakuva malahi yaga.

¹⁰ Ahene yaho vaviika viuma vivie mu litembeli liu munyasaye wikikali ulangwa Asitarite, kandi nivavamba muviri gwigwe ku lidiji lie lidaala lia Bezishani nimisumari.

¹¹ Lwa vandu va Jabeshi Gileadi vahulira aga vandu va Filisitia vaali nivakoli ku Saolo,

¹² Avasaza valuvilira ligali kuvita vosi vaatura kuzia kandi vagenda vudiku vwosi kuduuka mu lidaala linene lia Bezishani. Viikiza miviri ja Saolo na avayaayi veve, nivajiranya mu lidaala lia Jabeshi kandi vajisambira yo.

¹³ Ahene yaho vaavugura vigumba kandi nivaviyavira yo isi wu musaala gwa Tamarisiki mu lidaala, kandi vahonga lilia ku madiku saba.