1 Samweli 30 - KITABU KITAKATIFU

Uvulwani na Avamaleki

¹ Inyima wa madiku gaviri Daudi na vandu veve vaduuka ha Zikilaga. Avandu va Maleki vaali nivingiliyi lidaala lia Zikilaga kandi Isavaalu wi Ivuyuda. Vaali nivasaambi lidaala yilio

² kandi nivagumiyi avakali vosi kuva vilaanye; sivali niviiti ku mundu woosi mba, navuzwa vaali nivavuguyi avandu vosi.

³ Lwa Daudi na vandu veve vaduuka, vanyoola ndi lidaala liali ni lisaambiywi liosi, ma kandi avakali, avayaayi na vakana vaavo vaali nivamali kulanywa.

⁴ Daudi na vandu veve vatanga kulira na sivalekela lilira mba kuduuka lwa vaali nivaluhi ligali.

⁵ Kali avakali va Daudi vaviri, Ahinoamu na Abigaeli vaali nivavuguliywi.

⁶ Daudi yaali mu vudinyu vonene ligali kigira vandu veve vahulira vululu kigira vaali nivagotizi avana vaavo, kandi vatihiza nivenya kumulasa na magina; navuzwa Yahova Nyasaye weve yamuha uvuluviliri.

⁷ Daudi yavolera musaalisi Abiazari muyaayi wa Ahimeleki, “Ndetera kisibaho, na Abiazari yamuletera.”

⁸ Daudi yateeva Yahova, “Nyara kuzia kolondelera avalanyi yavo, kandi ndavagumira?” Yahova yativura, “Zia; ulavagumira kandi ulahonyia vahambe yavo.”

⁹ Kunangwa Daudi na vandu veve 600 vaatura kolondelera vasigu yavo. Lwa vaduuka ha kagera ka Besori. Avalala kuvo valekwa inyima nivamenya hazana yaho.

¹⁰ Daudi yaazizagilira nologendo lwilwe na vandu 400; avandu vandi 200 vaali nivaluhi ligali kwambuka kagera zana; kulwayago, vaatigara inyima.

¹¹ Avandu vaali na Daudi vanyoola muyaayi wa Egebeti naveeye mu mulimi, nivamuleeta ku Daudi, vamuha chukulia na mazi,

¹² malala ku makuyu guminywa kandi nivisaganyi viviri via mazabibu guminywa. Inyima wa yaali niyakalia, yanyoora zinguru. Siyaali naaliyi ku kindu choosi anoho kunwa ku madiku gavaga.

¹³ Daudi yamuteeva, “Munene woovo nivwaha, kandi utura hayi?” Naye yativura, “Inzi mbeeye muyaayi kutura Egebeti, mutugwa wu mulala ku vandu va Maleki. Munene wange yandeki inyima madiku gavaga gaaviti kigira inzi ndaali umulwaye.

¹⁴ Kunyi kwaali nikwingiliyi kandi ni kulwaana kivala cha vandu va Negebu ya Kerizi, kolovega lwi Isavaalu wi Ivuyuda kandi kivala cha Negebu ya Kalebu, kandi kwasaamba lidaala lia Zikilaga.”

¹⁵ Daudi yamuteeva, “Unyala kumbira ku vingiliri yavo?” Yamutivulira, “Ndakora ndio, niiva ulaasuuviriza mu lieta lia Nyasaye ndi ivi siulanzita anoho kuumbaana mu makono gu munene wange mba.”

¹⁶ Kandi yimilira Daudi kuduuka kuvo. Avatuliri vaali nivasalani hoosi havundu hazana, nivalizaa, nukunwa vilulu, kandi kusangara mu vukinu kigira vilaanye vinene via vaali nivagumiyi kutura mu kivala cha vandu va Filisitia ni Ivuyuda.

¹⁷ Hamugorova, isi nizia kumwama, Daudi yaavatulira nukuvakuya kandi valwaana kuduuka hamugorova gwi lidiku lialonda ku, kandi sihali ho nu mundu wiruka nokohononoka mba, nivatali avayaayi 400 avaniina ku zing'amia niviruka.

¹⁸ Daudi yahonyia nukwiranyia vandu vosi nivindu viosi via Avamaleki vaali nivavuguyi, komeeda ku akali veve vaviri;

¹⁹ sihali ni kindu chagota mba. Daudi yiranyia avayaayi, avakaana, kandi vilaanye viosi via vandu va Maleki vaali nivavuguyi.

²⁰ Kandi yiranyia magondi nizing'ombe ziosi; avandu vasaza veve vimiliza ichayo chi mitugu josi imbiri wavo; nivavoora, “Yivi viosi ni via Daudi!”

²¹ Ahene yaho, Daudi yirana ku vasaza 200 avaari avadedekere ligali kuzia naye ma nivatigara inyima ha kagera ka Besori. Vazia vwangu kwaganira Daudi na vasaza vi liihi veve, kandi Daudi yazia kuvo navacheliza nuvuyanzi.

²² Navuzwa valala ku vandu vaali viimani kandi avadamanu avaari nivalondi Daudi, vavoola, “Sivaziiyi muvulwani ni kunyi, nandio sikulavaha ku vilaanye via konyooye mba. Vanyara kuvugura vuzwa vakali na vana vaavo ma vazie.”

²³ Navuzwa Daudi yativura, “Avaamitu vange, simunyala kokora ndio ku cha Yahova amali kuha kunyi da! Akulindi nokokohonyia ma naakuha liguuta ku avasigu na vingiliri viitu.

²⁴ Siali ho nu mundu uvugilira cha muvooraa mba! Kuduuka kwosi konyoole keleng'ani! Ku vosi utigaye inyima kulinda misigo harara na ahokososa hiitu kuduuka anyoore kidieli kilala chere kuli oyo uziiyi mu vulwani.”

²⁵ Daudi yalomba yili kuva lilago, kandi liamala kolondwa mu Isiraeli kutura ing'inga yeyo.

²⁶ Lwa Daudi yirana mu lidaala lia Zikilaga, yatuma kidieli kilala chi vilaanye via yanyoora ku avalina veve, aviimiliri vi Ivuyuda, na makuva, “Ngiki kihanwa ku munyi kutura ku vilaanye via kwavugula kutura ku vasigu va Yahova.”

²⁷ Yatuma vandu vaali mu lidaala lia Bezeli, mu Rama, kolovega lwi isavaalu wi Ivuyuda, kandi ku vandu vaali mu lidaala lia Jatiri;

²⁸ Aroeri, Sifumozi, Eshitemoa,

²⁹ kandi Rakali, ihiiri ya vandu va Jerahameeli, avandu va Keni,

³⁰ kandi avandu vaali mu madaala ga Horima, Borishani, Azaki,

³¹ kandi Heburoni. Yatuma vandu vaali havundu hoosi aha oyo na vandu veve vagendagenda.