1 Samweli 3 - KITABU KITAKATIFU

Yahova Yivuula ku Samweli

¹ Mu madiku yago, lwa muyaayi Samweli yaali natumikira Yahova hasi hu vwimiliri vwa Eli, gaali ho amakuva makekeeke vuzwa kutura ku Yahova, na malola kutura kuye sigali ho vuli ing'inga mba.

² Vudiku vulala, Eli, waali ahimbi kuvakula, yaali naagonaa mu keng'oze chiche.

³ Samweli yaali naagonaa hatakatifu; aha Lisandugu litakatifu lie Lilagana lia Nyasaye liali. Ni vukikiri kucha, itaya nichakaa,

⁴ Yahova yalanga, “Samweli! Samweli!” Samweli yativura, “Yee, Mwami mbeeye hano!”

⁵ Yazia vwangu ku Eli navoora, “Waali kuunanga, na inzi mbeeye hano.” Navuzwa Eli yamutivulira, “Inzi singulangi da; yirana ogone kandi.” Kunangwa Samweli yirana kogona.

⁶ Yahova yalanga kandi, “Samweli!” Samweli yavuka kandi nazia ku Eli navoora, “Mbeeye hano, waali kuunanga!” Eli yamuvolera, “Mwana wange, inzi singulangi mba. Yirana ogone kandi.”

⁷ Samweli siyamanya ndi ni Yahova uwamulanga mba, kigira Yahova yaali nakikiri kwivuula kuye.

⁸ Yahova yalanga Samweli lwa kavaga; yavuka, nazia ku Eli, navoora, “Unaangi na inzi mbeeye hano.” Ahene yaho, Eli yamanyiriza ndi ni Yahova ulangangi muyaayi Samweli.

⁹ Kunangwa Eli yamuvolera, “Yirana ogone; na niiva alakulanga kandi, ovoole, moloma, Yahova, kigira inzi mutumikiri woovo, mbulira!” Kunangwa Samweli yirana naagona.

¹⁰ Yahova yaza nasingira ho, naalanga kuli lwa imbiri, “Samweli! Samweli!” Samweli yativura, “Moloma; mutumikiri woovo mbulirizaa.”

¹¹ Yahova yamuvolera, “Lidiku lilala nziza kokora kindu ku vandu va Isiraeli keveeye chukutiihiza ligali, nu mundu woosi uhulira inguuva yeyo alegosa nokogenya ligali.

¹² Ku lidiku yilio ndatwekiza litihiza liange liosi ku vinyumba ya Eli, kutura ku litanga kuduuka ku keheri.

¹³ Ndaamara kumuvolera ndi ndahaana mageri ku vinyumba yeeye mihiga ni mihiga, kigira vayaayi veve vamala konyega. Eli yamanya ndi vakora ndio, navuzwa siyavagaya mba.

¹⁴ Kunangwa ndisuuhira avinyumba ya Eli ndi, ‘Uvwoni vwa vinyumba ya Eli sivunyala kwogizwa na masahi gi visiuviliru anaho vihaanwa mihiga ni mihiga kali hakuzu mba.’ ”

¹⁵ Samweli yaagunza mu vogono kuduuka mugamba; ma navuuka, niyiguula viliango vie inyumba ya Yahova. Yaali nuvuti kovoolera Eli makuva ga malola.

¹⁶ Eli yamulanga, “Samweli, muyaayi wange!” Samweli yativura, “Mbeeye hano, mwami!”

¹⁷ Eli yateeva, “Yahova akovooleeye ki? Utambisa kindu choosi mba. Nyasaye alakuha mageri vululu niiva siulambolera vuli kindu cha akovooleeye mba.”

¹⁸ Kunangwa Samweli yamuvolera vindu viosi. Siyavisa ku kindu kali kilala mba. Eli yavoola, “Aveeye Yahova; kandi alakola choosi ekelolekaa kuva kilahi kuye.”

¹⁹ Samweli yaviruka, Yahova yaali naye kandi naakora vindu viosi via Samweli yavoola kuva vieligali.

²⁰ Kunangwa vandu vosi va Isiraeli, kutura ku lovega lulala kuduuka ku lovega lundi lwi kivala yicho, vamanya ndi Samweli ligali aveeye muporofeti wa Yahova.

²¹ Yahova yaazizagilira kwivuula ha Shilo, aha yaali naloreki ku Samweli kandi naamolomi kuye.