1 Samweli 28 - KITABU KITAKATIFU

¹ Inyima wi ing'inga ngekeeke, avandu va Filisitia vavungiza harara amahi gaavo goosi kulwaana Isiraeli, na Akishi yavolera Daudi, “Umanyirize ndi ivi na vandu vasaza vovo kuduuka valwaaniri ku lovega lwange!”

² Daudi yamutivulira, “Yee, ligali. Inzi mbeeye mutumikiri woovo, kandi ivi waza welolere aga nyara kokora.” Akishi yavolera Daudi, “Vulahi ligali! Ndakokola ove mulindi wi livamwoyo liange wa kazozo.”

Saolo yenyeleriza zing'anagani kutura ku musigitiri

³ Kalunu Samweli yaali yakuza na avandu va Isiraeli vosi vaali nivamali kumusiomera nukumuta mu lidaala linene lilie mwene lia Rama. Saolo yaali niyamali kuniga avasigitiri na vulaguli vi limanya vatuli mu Isiraeli.

⁴ Amahi ga vandu va Filisitia gavunga nokolomba hokososa ha lidaala lia Shunemu Saolo yavungiza vandu va Isiraeli nivasosera ha Kiguru cha Giliboa.

⁵ Lwa Saolo yalora liihi lia vandu va Filisitia yatia kandi yadegera ligali.

⁶ Yateeva Yahova cha anyala kokora. Navuzwa Yahova siyaamutivulira kali hakuzu, ku maloto kinga ku litumikira Urimu na Zumimu anoho ku avaporofeti mba.

⁷ Ahene yaho Saolo yalaga vanene veve, “Nzenyeri mukali musigitiri na inzi nzie kumuteeva zing'anagani.” Vamutivulira, “Aveeye ho nu mulala mu lidaala lia Endori.”

⁸ Kunangwa Saolo yegoyanya; Yiviika zinguvu zindi, kandi lwa isi yaali ni ya ka mwama, yazia harara na vandu veve vaviri kolola mukali zana. Yamuvolera, “Ondevere misambwa na ombolere kizizaa kwekoleka. Nangila chiriri u chu mundu wa inzi manya mutale.”

⁹ Mukali oyo yativura, “Ligali ivi umanya icha mwami Saolo yaakoli, kuli yaniga avalaguli na avasigitiri vatuli mu kivala cha Isiraeli. Kigira ogerizaa kotega nduhi nduuki nzitwa?”

¹⁰ Ahene yaho Saolo yisuha ku Nyasaye. Yamuvolera, “Ku Yahova oveeye mwoyo, ngusuuvirizaa ndi si ulaheevwa mageri ku likora yaga mba.”

¹¹ Mukali zana yateeva, “Ngulangili vwaha?” Saolo yativura, “Samweli”

¹² Lwa mukali zana oyo yalora Samweli, yakuba lukwiri navolera Saolo, “Kigira ki ungaada? Ivi oveeye mwami Saolo!”

¹³ Mwami yamuvolera “Utatia mba. Ololaa ki?” Yamutivulira, “Ndolaa chiriri nikisinuka kutura mu lirova.”

¹⁴ Saolo yateeva, “Kifaanaa ndi?” Mukali oyo yativura, “Aveeye musakulu nakutulaa hasi mu lirova; yiviiki inguvu yafanana ni iganza yukumufuuma.” Ahene yaho Saolo yamanya ndi ni Samweli; na yinama hasi kuhaana luyali.

¹⁵ Samweli yavolera Saolo, “Kigira ki unyangizaa? Kigira ki ni ongora nzirane?” Saolo yativura, “Mbeeye mu kivi kenene ligali. Avandu va Filisitia vaveeye nuvulwani niinzi; na Nyasaye ondeki. Siandivuliraa kandi mba, kali kuvitira mu vaporofeti kinga ku maloto mba. Nandio mali kukulanga uduuki kombolera cha ndukanaa ngole.”

¹⁶ Samweli yavoola, “Kigira unanga lwa Yahova amali kukoleka nukugwa musigu woovo?

¹⁷ Yahova umali kokora ku ivi cha yakovolera kuvitira mu inzi: umali kutuliza vwami kutura ku ivi kandi uvuhaani ku Daudi ha vogono vuvwo.

¹⁸ Ivi wavula kutia lilaga lia Yahova na siwadiviza vandu va Maleki ligali kandi na viosi via vaali navio mba. Yicho nicho kigiraa Yahova akolaa yaga ku ivi kalunu.

¹⁹ Alakuha aha harara na vandu va Isiraeli mu zinguru zia vandu va Filisitia. Mugamba harara na vayaayi vovo mulava harara na inzi, kandi Yahova alaviika kandi liihi lia Isiraeli mu zinguru zia vandu va Filisitia.”

²⁰ Nonoho, Saolo yagwa hasi mam'mama naalambira hasi ku marova, naadegerizwa ligali na makuva ga Samweli yaali navooye. Yaali mudedekere ligali, kigira siyaali naaliyi kindu muvasu nuvudiku vwosi mba.

²¹ Mukali zana yazia kuye nalora ndi atihiiziiywi kunangwa yamuvolera, Mwaza, “Mwami, mbiki livamwoyo liange mu vuhimwa ku likora cha oteevi.

²² Kalunu nuyanza kola icha ngoteva. Leka ngolombere chukulia. Kuduuka ulie kunangwa ove nizinguru kogenda.”

²³ Saolo yasura navoora sialalia kindu choosi kali kidi mba. Navuzwa vanene veve vaamudinyiriza nivamugoonya alie. Mu limalirika yamanya navugilira; yavuka kutura hasi niyikara ku kidali.

²⁴ Mukali oyo yita kemoli vwangu cha yaali naanetizaa nivakilia. Maku yavugula uvusie naavuduvula kandi yuminya umugadi gutali mu na mamera.

²⁵ Yavika chukulia zana imbiri wa Saolo na avanene veve, kandi navo valia. Kandi vamanya ni vazia uvudiku vwene yivwo.