1 Samweli 27 - KITABU KITAKATIFU

Daudi hagati ha Avafilisitia

¹ Maku Daudi yaganagana mu mwoyo gwigwe, “Lilala ku madiku yaga, Saolo yaza yanzite. Kindu kilahi chokokola nukwirukira mu kivala cha vandu va Filisitia. Ahene yaho Saolo alatuliza mwoyo ku lienya inzi mu Isiraeli, na ndio inzi ndahonyia livamwoyo liange.”

² Kunangwa Daudi harara na avasikari 600 vazia vwangu ku Mwami Akishi, mwana wa Maoku, mwami munene wa Gazi.

³ Daudi harara na vasaza 600 va yaali navo, harara na avizinyumba ziavo vamenya mu Gazi. Daudi yaali na vakali veve vaviri, Ahinoamu kutura Jezireeli, na Abigaeli, namulekwa wa Nabali kutura Karimeli.

⁴ Lwa Saolo yahulira ndi Daudi umali kwirukira mu lidaala linene lia Gazi, yaatuliza mwoyo ku ligeriza kumwenya kandi.

⁵ Daudi yavolera Akishi, “Niiva ivi oveeye mulina wange, leka mbe ni lidaala lilala likekeeke, nduuki komenya mu. Mwami, sindora kivuni kigira inzi komenya harara na ivi mu lidaala linene liu vwami mba.”

⁶ Kunangwa Akishi yamuha lidaala lia Zikilaga; kandi ku kivuni yiki Zikilaga liveeye lidaala lia vami va Avayuda kuduuka na lero.

⁷ Daudi yamenya mu kivala cha vandu va Filisitia ku mieli 16.

⁸ Ku ing'inga yeyo yoosi, Daudi na vandu vasaza veve avingiliraa vandu va Geshuru, Girizi, kandi Amaleki, avamenyaa mu kivala yicho kale ku ing'inga indambi. Yaali anyala kwingilira kivala chavo kali kuduuka Shuri, kandi kuduuka Egebeti,

⁹ niyiita vasaza na vakali vosi, kandi navugura magondi, zing'ombe, zibunda, zing'amia, kandi zinguvu. Maku yirana ha Akishi

¹⁰ uwaali unyala kumuteeva, “Ni hayi aha uziiyi kwigilira ing'inga yiyi?” Ahene yaho Daudi yamutivuliraa ndi aziyi kolovega lwi Isavaalu wi Ivuyuda, anoho ku kivala cha ihiiri ya Jerahameeli, anoho ku kivala cha ivaale wa Avakeni.

¹¹ Daudi yaali anyala kwiita vosi, avasaza navakari, kunangwa havuli kuva nu mundu uzia Gazi ukuhilaa makuva ga oyo na avandu vasaza veve vamali kokora. Yaga nigo aga Daudi yakola ing'inga yoosi ya yamenya mu Filisitia.

¹² Navuzwa Akishi yasuuvira Daudi ma niyevolera, “Adunyirangwa ligali na vandu veve mwene Avaisiraeli, ku lwayaga kuduuka andumikiri madiku gi livamwoyo lilie liosi.”