1 Samweli 26 - KITABU KITAKATIFU

Saolo ahononokaa kwitwa na Daudi kandi

¹ Avandu valala kutura Zifu vaza ku Saolo ha Gibea nivamuvoolera ndi Daudi yivisaa ku Kiguru cha Hakila kunyasi kwu mwigendanyama lie Ivuyuda.

² Saolo yazia nonoho na vasikari 3,000 vi liihi avalahi ligali mu Isiraeli kuduuka mu ligendanyama lia Zifu ukwenya Daudi

³ ma nalomba ahokososa kunzira ahimbi ku kiguru cha Hakila. Daudi yaali nakikiri mwigendanyama, na lwayaavolerwa ndi Saolo umali kumulondelera,

⁴ yatuma vatunyirizi kandi nanyoora ndi Saolo ligali uduuki yo.

⁵ Yazia nonoho kandi naamanya havundu hazana aha Saolo na Abineri muyaayi wa Neri, munene wi liihi lia Saolo yagona. Saolo yagona mugati ahokososa; na avasikari veve vaamukumbiriza.

⁶ Ahene yaho Saolo yateeva Abimeleki umuhiti, na Abishai amwavo Joabu mama wavo yalangwa Zeruya, “Nivwaha ku munyi vaviri uzia harara niinzi hokososa ha Saolo?” Abishai yativura, “Inzi ndazia.”

⁷ Kunangwa uvudiku yivwo Daudi na Abishai vingira mu hokososa nivanyoora Saolo naagonaa hagati hokososa ni litimu nilitungiywi hasi ahimbi hamutwi hehe. Abineri na vasikari vi liihi vaali nivagonaa nivamukumbirizi.

⁸ Abishai yavolera Daudi, “Nyasaye umali kuviika musigu woovo mu zinguru zizio vudiku vwa lero. Kalunu leka mutumiti ni litimu lilie mwene lulala vuzwa kuduuka liduuki mumarova - sindamutumita kaviri mba.”

⁹ Navuzwa Daudi yavoola, “Utamusaliriza mba! Yahova alahaana amageri ku wosi usaaliriza mwami mutovole weve.”

¹⁰ Daudi yaazizagilira kovora, “Ku Yahova oveeye mwoyo, inzi manya ligali Yahova mwene aliita Saolo, niiva ing'inga yi likuza lilie liduka, anoho akuziri mu vulwani.

¹¹ Yahova angaye mburi kogeriza kusaliriza uyu mulala wa Yahova amali kokora umwami munene! Leka kuvuguli litimu lilie kandi kimuga chiche cha mazi, ma kuzie.”

¹² Kunangwa Daudi yavugula litimu kandi kimuga cha mazi kutura hamutwi gwa Saolo, kandi oyo na Abishai vaatulaho. Sihaali ho nuwavalola yaga anoho uwamanya chekoleka, anoho kali kuvuuka mba. Vosi vaali nivagonaa zindolo zinditu, kigira Yahova yaali natumi zindolo zia maveere kuvo vosi.

¹³ Ahene yaho Daudi yambuka engereka ku lovega lundi lwi livona nasingira kondongozi kwi kiguru, ihale ligali kutura kuvo,

¹⁴ naahanzukira vasikari va Saolo kandi Abineri “Abineri! Unyala kumbu ulira?” Abineri yateeva, “Nivwaha uhanzuka ku mwamioyo?”

¹⁵ Daudi yativura, “Abineri sioveeye musaza muhaga ligali kuvita vasaza vandi mu Isiraeli mwosi? Kunangwa kigira ki ivi si osoolaa munene woovo, umwami? Ulwene yilu mundu yingiyi hokososa kwita mwami munene woovo.

¹⁶ Ivi waali kugwa mu miyinzi jijo, Abineri! Nzisuha ku Yahova oveeye mwoyo ndi munyi mwosi muduukana mukuzi, kigira simusooye munene winyu mba, uwa Yahova yakola ave mwami. Litimu liu mwami liveeye hayi? Kimuga cha mazi chaali hamutwi hehe keveeye hayi?”

¹⁷ Saolo yaamanyiriza mwoyo gwa Daudi kandi yateeva, “Daudi, oyo ni ivi mwana wange?” Daudi yativura “Yee, Mwami wange.”

¹⁸ Kandi yameda kovora, “Kigira ki okenondeleraa, inzi mutumikiri woovo? Inzi ngoli ki? Kinga nzoni ki?

¹⁹ Mwami munene wange, huliriza ku cha nyenya mbore? Niiva ni Yahova okoli ivi unzikiruki, ikihaanwa kuye kilamukola agirung'anyie zing'anagani zizie; navuzwa niiva na vandu vakoli yaga, kilaamo cha Yahova kivagwiri. Kigira vamali kungunga kutura mu kivala cha Yahova kuzia mu kivala uwa inzi nyara vuzwa kusigamira vanyasaye vageni

²⁰ utaleka nzitirwi mu kivala cha vageni, ihale kutura ku Yahova mba. Kigira ki mwami wa Isiraeli yaaze kwita ulororo kuli inzi? Kigira ki ahimaa inzi kuli linyonyi liumuvulimu?”

²¹ Saolo yativura, “Mali kwona. Yirana, Daudi, mwana wange! Sindakusaliriza kandi mba, kigira ivi umali kohonyia livamwoyo liange vudiku vwa lero. Inzi ndaaveyange musiru! Mali kokora kindu kidamanu chukutiihiza ligali.”

²² Daudi yativura, “Litimu liilio ndili, mwami wange. Leka mulala ku avandu vovo yaaze yinu na alivuguli.

²³ Yahova ahaanaa madanyi ku yavo avaveeye avasuuvirifu kandi avalungi. Lero Yahova aviiki ivi mu zinguru ziange, navuzwa inzi singokoli kindu kidamanu ukusaliriza ivi mutovole wa Nyasaye yakola Mwami Munene mba.

²⁴ Kuli inzi mali kohonyia livamwoyo liilio kalunu, Yahova naye yangolere malala mere kandi amboholore kutura mu vudinyu vwosi!”

²⁵ Saolo yavolera Daudi, “Nyasaye akugasizi, mwana wange! Ivi ulanyora na ulava muguuti mu vindu viosi via okola!” Kunangwa Daudi yazia kunzira yeeye, na Saolo yirana yengo weve.