1 Samweli 25 - KITABU KITAKATIFU

Likuza lia Samweli

¹ Samweli yakuza, kandi avandu va Isiraeli vosi vavugana harara nivamusiomera. Maku vaamuta hango hehe ha Rama. Inyima wa yaga, Daudi yazia mwigendanyama lia Parani.

Daudi na Abigaeli

² Yaali ho mundu mulala mukiranyi mu lidaala lia Parani. Mundu uyu yaali mutugi ligali; yaali namagondi 3,000 kandi nizimbuli 1,000. Yaali nakalaga vwoya vwa magondi geege mu kiguru cha Karimeli.

³ Lieta lilie liali Nabali, mukali weve yalangwa Abigaeli, wiligondo lilahi kandi wovogeri vulahi ligali, navuzwa Nabali yaali mwimani kandi wi miima midamanu. Yaali wi ihiiri ya Kalebu.

⁴ Lwa Daudi yaali mwigendanyama, yahulira makuva yaga.

⁵ Kunangwa yatuma avayaayi veve likomi. Daudi yavolera vayaayi yavo; “Muzie kuduuka Karimeli, muzie ku aebali, kandi mumuchelize mu lieta liange.”

⁶ Mumuvolere ndi: “Mirembe ku ivi, ku avinyumba yooyo, kandi ku viosi via oveeye navio.

⁷ Mbulira ndi ivi oveeye na vandu vakala uvwoya vwa magondi googo. Nyenya ivi umanye ndi avayi vovo vaveyange nikunyi, na si kwa vasalirizi mba kandi sivadaka kindu choosi ku ing'inga yoosi ya vaali mu Karimeli mba.

⁸ Teeva vuzwa avayaayi vovo navo valakovolera. Kunangwa leka vayaayi vange vanyoore livugilirwa mu zimoni zizio, kigira kunyi kuzaa ku ivi ku lidiku lie lilia. Kukusaala mwaza yaanza haana choosi cha unyala ku kunyi avatumikiri vovo kandi ku Daudi, mwana muyanze woovo.”

⁹ Avasaza va Daudi yatuma vahaana likuva yili ku Nabali mu lieta lia Daudi. Maku vaalinda hazana yaho,

¹⁰ na mu limalirika, Nabali yativulira vatumikiri va Daudi, “Daudi? Nivwaha? Ngikiri ku hulira ku makuva geege kali hakuzu! Kivala kizuuyi avatugwa virukaa kutura ku vanene vaavo amadiku gano!

¹¹ Si ndavugura mugadi gwange na mazi, nizinyama zia ndaali kwitira vakalagi vu vwoya vwa magondi gange, kandi mbane ku vasaza vatura wa ndamanyi?”

¹² Avasaza vayaayi va Daudi virana kuye nivamuvoolera cha Nabali yaali navooye.

¹³ Daudi yalaga, avasaza veve, “Yevohi vivavi vienyu!” Kandi vosi vaakora ndio. Daudi naye kandi yevoha kivavi chiche kandi natura na vandu vasaza vaduuka 400, naalekaa 200 inyima kulinda misigo jaavo.

¹⁴ Mulala ku avatumikiri va Nabali yavolera Abigaeli, mukali wa Nabali, “Uhuliyi ku? Daudi atumi avatumwa veve valala kutura mwigendanyama ni licheliza ku munene wiitu, navuzwa munene wiitu avanyegi.

¹⁵ Navuzwa vaali avalahi ligali ku kunyi; sivakunyangizi ku da, kandi zing'inga ziosi kwaali navo mu milimi, kindu chiitu sicha yivwa ku mba.

¹⁶ Vaakukia vudiku numbasu ing'inga yoosi ya kwaali navo nikwaayaa magondi giitu.

¹⁷ Mwaza yaanza ganagana ku makuva yaga, na ukalage cha okola. Yili linyala koleta kivi ku munene wiitu na vinyumba yeeye vosi. Aveeye kiyingwa ligali kali mundu anyala kumuvolera kindu mba.”

¹⁸ Abigaeli yakola vwangu navugura migadi 200 zimuya ziviri zie visero ni zizuuyi iwaini, inyama ya magondi 5 gasambiywi, zikilo 17 zia maduma masambe, visaganyi 100 via mazabibu, kandi zikeki 200 zia makuyu guminywa, kandi yavivika ku zibunda.

¹⁹ Maku yavolera vatumikiri zana, “Munyi mukore nimuzia imbiri na inzi ndamulonda.” Navuzwa siyavoola kindu choosi ku musaza weve mba.

²⁰ Abigaeli yaali naahira ibunda yeeye kovondong'ana ku kiguru, nonoho yagana na Daudi harara na vasikari veve nivatuliyi imbiri weve.

²¹ Daudi yaali naganagana, “Kigira ki nininda nukukinga imiandu ju mundu ula mwigendanyama? Si haali ni kindu chiche kali kilala chivwa mba! Nindi yandungaa ku vokonyi vwa ndaamuha!

²² Nyasaye yanzite niiva sindita vasaza yavo vosi mugambazuri nigukiri kuduuka!”

²³ Lwa Abigaeli yalora Daudi, yika ku ibunda yeeye vwangu naagwa hasi mam'mama,

²⁴ ha virenge via Daudi, namuvolera, “Mwaza, Mwami wange, umbulirize! Leka inzi mbuguli lidulwa.

²⁵ Mwaza, nuyanza, utahuliriza amakuva ga Nabali muyingwa oyo mba. Aveeye vuzwa kuli kivuni chi ilieta lilie livoora, ‘umusiru’. Inzi sindaaliyo lwa vatumikiri vovo vaza mba.

²⁶ Yahova niyie wigalira ivi uvuli kuvanza kisaalia kwita avasigu vovo. Kandi kalunu ngwisuuhiraa ku Yahova oveeye mwoyo ndi avasigu vovo kandi yavo vosi avenyaa kukusaaliriza valahevwa mageri kuli Nabali.

²⁷ Mwaza, mwami wange, vugilira kihanwa yiki cha inzi mali kukoleetera, na ukihaane ku vandu vasaza vovo.

²⁸ Mwaza, nuyanza, ombere, mwami wange ku vudamanu vwa inzi mali kokora. Yahova alakola mwami, kandi kisukururwi chicho, kigira ulwaanaa amahe geege; na siulakola kindu kidamanu kali hakuzu ku lohono lwa ivi oveeye mwoyo mba.

²⁹ Niiva mundu alakwingilira na agerize kukwita, Yahova Nyasaye woovo alakohonyia, kuli mundu ulindaa livikilu lia vuguli vonene. Kolovega lwa vasigu vovo, Yahova alavasiuva ihale kuli mundu utumikira mugoye gwo lokova kulasa ligina.

³⁰ Lwa Yahova amali kokora vindu viosi vilahi viamali kukusuuviriza kandi okokoli mwami wa Isiraeli,

³¹ hene yaho kilambolera sikilava mu ivi kinga vovereri kigira wita vugira kivuni anoho kigira wivanzira kisaalia. Lwa Yahova amala kukugasiza, mwami wange, mwaza, utakanziviliri mba.”

³² Daudi yavolera Abigaeli, “Yahova Yizominywi Nyasaye wa Isiraeli, ukutumi lidiku linu kuuza kwagana niinzi!

³³ Nyasaye akugasizi kigira likalaga liilio nililahi kandi ku ligaya inzi mburi kuluminda lidiku lia kalunu kandi mburi kwiivaanzira kisaalia.

³⁴ Yahova umali kungaya mburi kukusaliriza. Navuzwa nzisuuhaa mu lieta lia Nyasaye oveeye mwoyo wa Isiraeli ndi ivi ulavula kokora vwangu kuuza kunzaganira, ngano vwali vuchezange vuzwa na vandu va Nabali vosi nivamali kukuza.”

³⁵ Maku Daudi yaavugilira cha Abigaeli yaali naamuleeteye, ma namuvolera, “Yirana yengo na utahenda mwoyo mba. Ndakora icha wenyaa.”

³⁶ Abigaeli yirana ku Nabali, uwaali naveeye nilisavo hango hehe, lidukanaa mwami. Yaali nahambiki kandi mu liiva lilahi ligali, kunangwa siyamuvolera kindu choosi mba kuduuka lwa vwacha mugamba.

³⁷ Kunangwa, lwi iwaini yaali ni yakatula mu mutwi, Abigaeli yamuvolera vindu viosi. Yalwala uvulwaye vwi linagandi nu muviri gwosi gwagwa lichilu.

³⁸ Inyima wa madiku likomi, Yahova yakuya Nabali ma nakuza.

³⁹ Lwa Daudi yahulira ndi Nabali umali kukuza, yavoola, “Yahova yizominywi! Umali kuvaanza kisaalia ku Nabali kigira linyega kandi umali kunzigalira inze mutumikiri weve mburi kokora vudamanu. Yahova umali kuha Nabali amageri kigira vudamanu vwivwe.” Maku Daudi yatuma avateevi ku Abigaeli mbula aduuki kumuvugula ave mukali weve.

⁴⁰ Avatumikiri va Daudi vazia kuye ha Karimeli nivamuvoolera, “Daudi atumi kunyi ku ivi kukuhiri kuye ove mukali weve.”

⁴¹ Abigaeli yavoola, “Inzi mbeeye mutumikiri weve wetegeki kwogiza virenge via vatumikiri vu munene wange.”

⁴² Yasingira vwangu naniina ku ibunda yeeye. Yazia na vatumikiri va Daudi, kugwa mukali weve kandi vakana 5 vatumikiri veve vaamulonda.

⁴³ Daudi yaali niyaleeta Ahinoamu kutura mu lidaala lia Jezireeli, na kalunu Abigaeli kandi yagwa mukali weve.

⁴⁴ Ing'inga yeyo, Saolo yaali nahaani mukaana weve Mikaili, uwaali mukali wa Daudi, ku Paliti, muyaayi wa Laishi kutura mu lidaala lia Galimu.