1 Samweli 24 - KITABU KITAKATIFU

Daudi siyenya kwita Saolo mba

¹ Lwa Saolo yirana kutura mu vulwani, avandu va Filisitia, yavolerwa ndi Daudi aveeye mwigendanyama ahimbi Engedi.

² Hene yaho Saolo yavugula vasikari vuvulwani 3,000 avaari avalahi ligali kuvita mu Isiraeli ma nazia kwenya Daudi na vasaza vuvulwani veve ivugwi wi zinyanda zie zimburi zi muvulimu.

³ Yaza ha luhangaywa ahimbi ni vigo vilala via magondi viali kunzira kandi yingira mu ukwekonya. Muluhangaywa zana yilwo nimwo mwa Daudi na vasaza veve vaali nivivisi musi ligali.

⁴ Avasaza va Daudi yaali navo vamuvolera, “Yivu nivwo uvwiyangu vuvwo! Yahova umali kokovoolera ndi alaviika musigu woovo mu zinguru zizio kandi unyala kokora kuye choosi cha wenya okole.” Daudi yanyenyeka nazia kuye makiriri nakalaga kilaka ku iganza ya Saolo vugira Saolo kumanya.

⁵ Navuzwa lwinyima zing'anagani ziu mumwoyo gwa Daudi ziatanga kumunyangiza kigira yakala lukigiti lwi iganza ya Saolo.

⁶ Yavolera avasaza veve, “Yahova yanzigaliri mburi kokora vudamanu vwosi ku mwami wange, wa Yahova yatovola kuva mwami! Kuduuka mburi kumusaliriza munzira yoosi, kigira aveeye mwami waatovolwa na Yahova!”

⁷ Kunangwa Daudi yagoonya vasikari veve ndi vatingilira Saolo mba. Saolo yasingira natura mu luhangaywa, kandi natanga logendo lwilwe.

⁸ Maku Daudi yatura ichova naamulondelera kandi naamulanga, “Mwami wange!” Saolo yikivuka kandi Daudi yinama hasi kuhaana luyali

⁹ navoora, “Kigira ki uhuliriza vandu avavoora ndi inzi ngerizaa kukusaaliriza?

¹⁰ Unyala kololera ndi ulwene yilu noveeye muluhangaywa, Yahova akuviiki mu zinguru ziange. Valala ku vandu vange vamboleeye ngwiti, navuzwa ngovererera kandi nimbora ndi sindakusaliriza munzira yoosi mba, kigira ivi niyie wa Yahova yatovola kuva mwami.

¹¹ Henza, baba wange, henza kilaka chi iganza yooyo cha ngumiyi mu mukono! Ndaali nyara kukwita navuzwa mu vogono yivwo ngali vuzwa kilaka yiki. Yiki kidukanaa kikumanyie ndi simbeeye niganagani yukwibaala ku ivi kinga kukusaliriza mba. Ivi umbizaa uduuki kunzita, kali nindavula kukokolera kindu choosi kidamanu.

¹² Yahova akalage hagati hange niivi nivwaha ku kunyi oveeye mudamanu! Yahova ahane ku ivi amageri kigira likora liilio ku inzi, navuzwa inzi sindakusaliriza kali hakuzu mba.

¹³ Ivi umanya chu lugano lovoolaa, ‘Uvudamanu vokolangwa vuzwa na vandu vadamanu veng'ine’ Kandi ndio sindakusaaliriza mba.

¹⁴ Henza chu mwami wa Isiraeli agerizaa kwita! Henza cha kunga! Imbwa inguzu, olololo!

¹⁵ Yahova alakakalage, kandi alakalole nivwaha ku kunyi oveeye mudamanu. Yahova aheenze mu makuva yaga, ma yangingi kandi yaambonyie kutura ku ivi.”

¹⁶ Lwa Daudi yaali niyakamara limoloma makuva yaga, Saolo yavoola, “Ligali ni ivi Daudi muyaayi wange?” Kandi yaatanga kulira.

¹⁷ Maku yavolera Daudi, “Ivi oveeye mulungi, na inzi mbeeye vudamanu. Ivi waali mulahi ku inzi ligali, lwa ndakokolera vudamanu kuvita.

¹⁸ Lero umali kumanyia kuli oveeye mulahi ku inzi ligali muno, kigira si unziti mba, kali niiva Yahova yambiki mu zinguru zizio.

¹⁹ Ni haali kanga mundu agumiraa musigu weve ma aleka azia vugira kumusaliriza? Yahova akugasize kigira ku cha ongoleeye kalunu!

²⁰ Kalunu mbeeye nagiligali ndi ulakave mwami wa Isiraeli, ma kandi uvwami vwa Isiraeli vulazizagilira hasi hi liamiiha liilio.

²¹ Navuzwa usuuvirizi mu Lieta lia Yahova ndi ivi ulakahonyie visukululwi viange, kunangwa lieta liange harara ni lieta lia avinyumba yange sigalivilirwa ligali mba.”

²² Daudi yamusuuviriza ligali ndi alakola ndio. Hene yaho Saolo yirana yengo. Na Daudi harara na vasaza vi liihi veve virana mu havundu haavo hu kwivisa.