1 Samweli 23 - KITABU KITAKATIFU

Daudi ahonyiaa lidaala lia Keila

¹ Daudi yahulira ndi avandu va Filisitia vavingilira lidaala lia Keila kandi vavanuulaa uvuswage vuhia kutura koloze.

² Kunangwa yateeva Yahova, “Ngazia kwingilira vandu va Filisitia naho?” Yahova yativura, “Yee, vingiliri na ohonyie Keila.”

³ Navuzwa avasaza va Daudi yaali navo vamuvolera, “Henza, koveeye nuvuti mu Vuyuda. Gavaki niiva kuzia Keila kwingilira nukulwana mahi ga vandu va Filisitia!”

⁴ Kunangwa Daudi yateeva uvulariri vwa Yahova kandi. Yahova yamuvolera, “Zia wingiliri Keila kigira ndakokola uguuti avandu va Filisitia.”

⁵ Kunangwa Daudi na vasaza vu vulwani veve vazia Keila kwingilira vandu va Filisitia; vita vanyingi kuvo kandi nivavugura mitugu jaavo. Nindio Daudi yahonyia lidaala lia Keila.

⁶ Lwa Abiazari muyaayi wa Ahimeleki yiruka niyiiyunga na Daudi, mu Keila; yazia ni kisibaho.

⁷ Saolo yavolerwa ndi Daudi umali kuzia Keila, kandi yavoola, “Nyasaye umuviiki mu vunyali vwange. Daudi umali kwetegera mutego ku lizia mu lidaala liumbakwa ni lidigi litambi nivirivwa viumbakwa vudinyu.”

⁸ Kunangwa Saolo yalanga amahi goosi vazie mu kukumbiriza nukulwana, Keila, na Daudi ni vi liihi lilie.

⁹ Lwa Daudi yahulira ndi Saolo alohizaa kumwingira, yavolera musaalisi Abiazari, “Leeta kisibaho hano.”

¹⁰ Maku Daudi yavoola, “Yahova Nyasaye wa Isiraeli, mali kuhulira ndi Saolo alohizaa kuuza ku lidaala lia Keila nukulidiviza kigira inzi, mutumikiri woovo.

¹¹ Avandu vamenyaa mu Keila valahaana inzi ku Saolo? Na hene Saolo alaza ligali kuli mbuliiyi? O, Yahova, Nyasaye wa Isiraeli, ngogonya undivuliri!” Yahova yativura, “Saolo alaza.”

¹² “Na avandu va Keila, valahaana vandu vange na inzi mwene ku Saolo?” Yahova yativura, “Valakola ndio.”

¹³ Kunangwa Daudi harara na vandu vasaza veve, ahimbi 600, vaatura Keila nonoho kandi nivazizagilira kuzia havundu yaaha na hala. Lwa Saolo yavolerwa ndi Daudi yiruki kutura Keila, yamanya naleka uvusaaviri vwivwe.

Daudi mu kivala chi vigulu

¹⁴ Daudi yamenya mu lievisa mu kivala chi vigulu, mu mwigendanyama ahimbi na Zifu. Saolo yaagerizaa kazozo kumwenya, navuzwa Nyasaye siyahaana Daudi kuye mba.

¹⁵ Daudi yatia kigira ndi Saolo yaza mu kivala yicho kumwiita. Daudi yaali mu Horeshi, mwigendanyama ahimbi na Zifu.

¹⁶ Jonazani yazia yo kuye naamudinyiriza nukumusuuviriza kigira likingwa lia Nyasaye,

¹⁷ namuvolera, “Utatia mba. Baba wange Saolo si alanyala kukusaliriza mba. Umanyi vulahi ndi ivi niyie uwaza ove mwami wa Isiraeli, ma kandi inzi ndava wakaviri mu vonene ku ivi.”

¹⁸ Vombi vaviri valomba lilagana litakatifu liu vulina. Daudi yamenya ha Horeshi, na Jonazani yazia yengo.

¹⁹ Avandu valala kutura mu lidaala lia Zifu vazia ku Saolo ha Gibea nivavoora, “Daudi yivisaa mu kivala chietu ha Horeshi ku kiguru cha Hakila, mu lovega lwa isavaalu lwi ligendanyama lie Ivuyuda.

²⁰ Kunyi kumanyi vulahi ndi, Mwami Wuluyali kuli wenyaa umugumiri; kunangwa hamba mu kivala chietu, na kunyi kulalola ndi umugumiyi.”

²¹ Saolo yativura, “Yahova amugasize ku liiva avalahi ku inzi!

²² Muzie na mwenyelerizi ligali ahaveeye kandi nivwaha umuloli. Mbulira ndi siaveeye musuuvirifu ligali mba.

²³ Mumanyirize ligali havundu hoosi aha yivisaa, kandi muve nagiligali koleta ku inzi mativuli vwangu ligali. Hene yaho naanzie ni munyi, na niiva naave nakikiri mu kivala zana, ndamwenyeleriza havundu hoosi, kali niiva gandukira kwenyeleriza kivala choosi chi Ivuyuda.”

²⁴ Kunangwa vaatura nivirana Zifu imbiri wa Saolo. Daudi na vandu vasaza veve vaali mwiligendanyama lia Maoni, mu livona lie kesoma mu lovega lwi Isavaalu wu mwigendanyama lie Ivuyuda.

²⁵ Saolo harara na vandu vasaza veve vazia kwenya Daudi, navuzwa Daudi yahulira makuva ma ni vazia mu kiguru chi zinyanda mwigendanyama lia Maoni kandi nivamenya yo. Lwa Saolo yahulira makuva yaga, yalondelera Daudi.

²⁶ Saolo na vandu veve vaali ku lovega lulala lwi kiguru, niyavukanyiywi kutura ku Daudi na vandu vasaza veve avaari ku lovega lundi. Vaali niviruka kutura ku Saolo na vandu veve; avaari nivisuunda ahimbi kuvakumbiriza nivaveeye ahimbi kuvagumira.

²⁷ Hene yaho mutumwa yaduuka navolera Saolo, “Yirana vwangu! Avandu va Filisitia vingilira kivala!”

²⁸ Kunangwa Saolo yalekera lilondelera Daudi nazia kulwaana vandu va Filisitia. Yicho nicho kigira havundu yaho nihalangwa Kiguru chi Liavukanyia.

²⁹ Daudi yatura nazia mu kivala cha Engedi, wa yaali niyivisi.