1 Samweli 22 - KITABU KITAKATIFU

Liitwa lia Vasaalisi

¹ Daudi yiruka kutura mu lidaala linene lia Gazi nazia mu luhangaywa ahimbi ni lidaala lia Adulamu. Lwa avamwavo veve harara na vinyumba ya baba weve vosi vahulira amakuva yaga, vazia yo kwiyunga naye.

² Avandu vosi avadambizangwa anoho avaari mu magovi kinga avavura kuyaanzizwa ni liiva liuvwami, vazia kwiyunga naye, kandi yagwa mwimiliri wavo. Ahimbi avasaza 400 vaali naye.

³ Daudi yazia kutura ahene yaho Mizipa mu kivala cha Moabu. Kandi navolera mwami wa Moabu, “Mwaza nunyaanza leka baba na mama wange vaze komenya na ivi kuduuka lwa manyiriza cha Nyasaye azizaa kongolera.”

⁴ Kunangwa Daudi yaleka aviivuli veve nivamenya nu mwami wa Moabu, na vamenya yo ku madiku goosi ga Daudi yaali niyivisi mu luhangaywa.

⁵ Maku muporofeti Gadi yazia ku Daudi navoora, “Utamenya hano mba; zia nonoho zia mu kivala chi Ivuyuda.” Kunangwa Daudi yatura nazia mu mulitu gwa Herezi.

⁶ Lidiku lilala Saolo yaali mu Gibea, niyikaye isi wu musaala gwu mutamarisiki ku kiguru, ni litimu lilie mu mukono gwigwe, kandi avatumikiri veve vosi vaali nivasingiyi kumukumbiriza. Yavolerwa ndi Daudi harara na vasaza va yaali navo valoleki,

⁷ kandi yavolera avatumikiri veve, “Huliri, avasaza va Benjamini! Muganaganaa ndi Daudi muyaayi wa Jese alahaana milimi ni vizabibu ku munyi mwosi, kandi amukole avanene mu liihi lilie?

⁸ Yicho nicho kivuni kigira nimung'anaganira vudamanu mu vwivisu? Sihali nu mulala ku munyi wambolera ndi muyaayi wange olombi lihambana na Daudi mba. Siali ho numulala ombenderaa mwoyo, anoho kombolera ndi Daudi, mulala ku vasaza vi liihi liange, ku ing'inga yiyi aheenzaa vwiyangu vwu kunzita, ma kandi muyaayi wange mwene umali kumuzuva.”

⁹ Doegi yaali nasingiyi ho harara na vatumikiri va Saolo, na yavoola, “Ndalora Daudi lwa yazia ku Ahimeleki muyaayi wa Ahitubu ha Nobu.

¹⁰ Ahimeleki yamuteevera ku Yahova cha Daudi akola, ma naamuha chukulia kandi kivavi cha Goliati Mufilisitia.”

¹¹ Kunangwa mwami Saolo yatumana musaalisi Ahimeleki kandi aviiko veve vosi, avaari avasaalisi kandi mu lidaala lia Nobu valetwe.

¹² Saolo yavolera Ahimeleki, “Hulira, kalunu Ahimeleki!” Ahimeleki yativura, “Mbeeye hano, mwami wange.”

¹³ Saolo yamuteeva, “Kigira ki ivi na Daudi mungoleraa zimbemba nukuhima inzi? Kigira ki numuha chukulia nikivavi, kandi numuteevera Nyasaye? Kalunu umali kungirung'ana kandi alindaa vwiyangu aduuki kunzita!”

¹⁴ Ahimeleki yativura, “Daudi niyie aveeye mutumikiri musuuvirifu ligali kuvita ava oveeye navo vosi. Aveeye navizara woovo, munene wa vasikari valindaa ivi, kandi wahevwa luyali na vandu vosi munyumba yu vwami.

¹⁵ Yee, ndamuteevera ku Nyasaye, na silwali lwukutanga mba. Ku lovega lwo kokolera ivi zimbemba nukuganaganira ivi vudamanu, Mwami Wuluyali ataanzaala anoho mulala ku avinyumba yange mba. Simanyi kindu choosi kolondekana na makuva yaga mba!”

¹⁶ Mwami yavoola, “Ahimeleki, ivi na viiko voko vosi kuduuka mukuze.”

¹⁷ Maku mwami yalaga vasikari valindi avasingira himbi kuye. “Yiiti avasaalisi va Yahova! Valombi zing'anagani zindamanu ku inzi harara na Daudi, na sivamboleeye ndi wiruki mba, kali niiva vamanya kutura kale.” Navuzwa vasikari valindi vasuura kuginga mukono kwita vasaalisi va Yahova.

¹⁸ Kunangwa Saolo yavolera Doegi, “Ivi uviiti!” Na Doegi yaviita vosi. Ku lidiku yilio yita vasaalisi 85 avaari niviviiki kisibaho chi inguvu.

¹⁹ Saolo yalaga kandi vandu vosi avamenyaa mu lidaala lia Nobu, lidaala linene lia vasaalisi, viitwi; avasaza, navakari, avana vasoleye na vanunaa, zing'ombe, zibunda, amagondi, viosi viitwa.

²⁰ Navuzwa Abiazari, mulala ku vayaayi va Ahimeleki, yiruka kandi yazia niyiiyunga na Daudi.

²¹ Yamuvolera kuli Saolo amali kusinza avasaalisi va Yahova.

²² Daudi yamuvolera, “Lwa ndalora Doegi naveeye yo, ndamanya ndi alakola zinguru azie kovoolera Saolo. Kunangwa inzi niyie ugiri aviiko vovo niviitwa.

²³ Menya na inzi kandi utatia mba. Saolo yenya kwiita, vombi ivi na inzi, navuzwa ivi na inzi kulahononoka.”