1 Samweli 21 - KITABU KITAKATIFU

Daudi yiruka kutura ku Saolo

¹ Daudi yazia ku musaalisi Ahimeleki mu lidaala lia Nobu. Ahimeleki yatura ichova nadegeraa kwagana na Daudi, nateeva, “Kigira ki uzi yinu ivi weng'ine?”

² Daudi yativura, “Mbeeye hano ku miyinzi ju mwami. Yamboleeye mburi koleka mundu ku vosi amanye cha yandumi ngole. Amakuva kigira vasikari vange, mali kuvalaga vaagane na inzi havundu navoleve.

³ Kunangwa, kalunu, oveeye ni viukulia ki. Mbeeye ni milaango jitano ji migadi, anoho choosi cha oveeye nacho.”

⁴ Musaalisi yavoola, “Simbeeye nimigadi ja kazozo mba, nijitali mitakase jeng'ine; unyala kujivugula niiva vasikari vovo si vaali harara navakari ku vwangu yivu mba.”

⁵ Daudi yativura, “Ligali vakikiri. Avasaza va mbeeye navo vilindaa aveene kuva vatakase kali lwa kuziiza ichova ku vutumwa vwa kazozo; nasindi ing'inga yiyi lwa koveeye ku vutumwa vuduukiru!”

⁶ Kunangwa musaalisi yaaha Daudi mugadi mutakatifu kigira migadi ja yaali najo jaali vuzwa migadi jahaanwa ku Nyasaye; migadi yiji jaali nijituliziywi komesa indakatifu kandi nivaviikiku jindi mihia.

⁷ Mwayi munene wa Saolo, Doegi, watura mu lidaala lia Edomu, yaali niyaazi yo lidiku liene yilio, kusigamira Yahova.

⁸ Daudi yateeva Ahimeleki, “Oveeye ku ni litimu anoho kivavi cha unyala kumba? Malago gu mwami gaanombi nduli vwangu kali sindaali ning'inga yukuvugula kivavi change anoho viugi vindi ku viosi mba.”

⁹ Ahimeleki yativura, “Mbeeye nikivavi chaali cha Goliati Mufilisitia, wa ivi wiitira mu livona lia Ela; keveeye inyima wi kisibaho, kilingiywi mu inguvu. Niiva uchenya, kivuguli. Yicho nicho chugi chu vulwani cha inzi mbeeye nacho cheng'ine.” Daudi yavoola, “Mbe, sikeveeye ho nikivavi kilahi ligali kuvita yiki havundu hoosi mba!”

¹⁰ Kunangwa Daudi yatura niyiruka kutura ku Saolo, nazia ku Mwami Akishi wa Gazi.

¹¹ Avatumikiri vu mwami vavoolera Akishi, “Uyu siaveeye Daudi mwami wi kivala chiche? Uyu niyie musaza wa avakali viimba nivavina, ‘Saolo yiiti zielefu, navuzwa Daudi yiiti makomi zielefu.’ ”

¹² Daudi yavika makuva yaga mu mwoyo gwigwe kandi yatia Akishi mwami wa Gazi ligali.

¹³ Kunangwa lwa valange ahimbi naye, Daudi yiigadizaa kuva muyingu kandi yakolaa vindu kuli mulalu lwa vaagerizaa kumugaya; yaali anyala kong'olang'ola ku virivwa vie lidaala linene kandi olote nilwiidoloka ku zinderu zizie.

¹⁴ Kunangwa Akishi yavolera avanene veve, “Heenzi! Mundu zana yaalaluka! Kigira mumuleeti ku inzi?

¹⁵ Siimbeye navalulu vanyingi mba. Kigira ki muleete wundi yaambihilirize ni vikolwa vivie viuvuyingu hano munyumba yange?”