1 Samweli 20 - KITABU KITAKATIFU

Jonazani yakonya Daudi kwiluka

¹ Maku Daudi yiruka kutura Nayozi mu Rama nazia ku Jonazani. Yateeva, “Ngoli ki? Nzoni ki? Ngoleeye baba woovo vudamanu ki uvugiraa niyenya kunzita?”

² Jonazani yativura, “Awa, ku Nyasaye ivi si unzizaa kukuza mba. Henza, baba wange si akolaa ku kindu choosi, ekenene anoho kekekeeke natambuuliyi mba. Kigira ki avisi agene yaga kutura ku inzi? Si gaveeye ndio mba!”

³ Navuzwa Daudi yisuha navoora, “Baba woovo amanyi vulahi ndi ivi unyaanzaa, na aganagana ndi, ‘Jonazani atamanya yili mba gase alaverera.’ Navuzwa ligali kuli Yahova aveeye mwoyo kandi kuli oveeye mwoyo, keveeye ho vuzwa kika kilala hagati hange ni likuza!”

⁴ Jonazani yavolera Daudi, “Ndakora kindu choosi cha wenya.”

⁵ Kunangwa Daudi yativura, “Mugamba ni Lisavo liu Mweli Muhia, na gandukira kulia harara nu mwami. Navuzwa niiva voveeye vulahi ku ivi, ndazia kwivisa mu mulimi kuduuka hamugorova gwi lidiku liakavaga.

⁶ Niiva baba woovo alolaa ndi si mbeeye komesa mu lilia, muvoolere ndi ngusavi munwa kuzia yengo vwangu Bezelehemu, kigira eveeye ing'inga yukuhaana visiuviliru viu muhiga uwene yeyo ku avinyumba yange vosi.

⁷ Niiva avoora, ‘Ni vulahi’ ndava ni mirembe, navuzwa niiva asinyika, ivi ulamanya ndi usaaviyi kusaliriza inzi.

⁸ Mwaza, ngolera vulahi yivu, na ulindi lilagana litakatifu yili lia walomba ku inzi. Navuzwa niiva mbeeye namahiolo, unziti ivi mwene. Kigira ki umbiri ku baba woovo nduuki kwitwa?”

⁹ Jonazani yativura, “Utaganagana kindu chu lugano yilu mba. Niivandamanya ligali ndi baba wange usaaviyi ku kusaliriza, ngano si ndakakovoleeye?”

¹⁰ Maku Daudi yateeva, “Nivwaha waza ombolere niiva baba woovo akutivulira nu vutima.”

¹¹ Jonazani yativura, “Genda kuzie mu milimi.” Kunangwa vazia

¹² na Jonazani yavolera Daudi, “Yahova Nyasaye wa Isiraeli ave muloli wiitu! Mugamba, ku ing'inga kuli yiyi kandi ku lidiku lilonda ku, ndateeva baba wange. Niiva liiva lilie ku ivi ni lilahi, ndakutumira likuva.

¹³ Niiva baba asaaviraa kukusaaliriza, Yahova yanguyi nguzi, niiva si ndakuvuulira makuva yaga, na ngutumi uzie mu mirembe, Yahova ave niivi kuli yaali na baba wange!

¹⁴ Na niiva ndava mwoyo, mwaza yaanza gumira lilagana litakatifu liilio na ove musuuvirifu ku inzi; navuzwa niiva nguza,

¹⁵ yaanza umanyie uvusuuvirifu vulala vwere ku vinyumba yange mihiga ni mihiga. Na lwa Yahova amala kudiviza vasigu vovo vosi,

¹⁶ lilagana lietu ku sa mulala ku kunyi livuli kuvunanywa. Niiva lilavunanywa, Yahova alahaana mageri ku ivi.”

¹⁷ Jonazani yisuuhiza Daudi ing'inga ya kaviri ku vuyanzi vwa yamuyanza, kigira Jonazani yayanza Daudi kuli yiyaanza.

¹⁸ Maku Jonazani yamuvolera, “Kigira mugamba liveeye Lisavo liu Mweli Muhia, livula kuva ho liilio lilaloleka niiva ulavula kuva komesa ing'inga yi chukulia.

¹⁹ Lidiku lilonda mugamba, niiva ulavula kuvaho, ulamanyikana ligali kuvita; kunangwa, zia havundu ha wivisa ing'inga yu vudinyu yivu vwatanga, na wivisi yaho inyima wi kitumi cha magina.

²⁰ Inzi naandase mivano juvuta jivaga halovega lwacho, nang'ana liveeye isaba ya ndasaa

²¹ ma nambolere mutumikiri wange azie kujenya. Niiva ndamuvolera, ‘Henza, mivano juvuta jiveeye lovega lulwo yilu, jileete hano’, yilio liveeye kovora ndi oveeye ni mirembe na unyala kutura ichova. Nzisuha ku Yahova oveeye mwoyo ndi siulava mu vuhimwa vwosi mba.

²² Navuzwa niiva muvooleraa, ‘Mivano juvuta jiveeye imbiri ku lovega lulwo lundi,’ hene yaho tula uzie kigira Yahova akutumaa uzie ihale.

²³ Kolondekana ni lilagana lia kumali kwelombera aveene na vene, Yahova alalola ndi kulilindi mihiga ni mihiga.”

²⁴ Kunangwa Daudi yivisa mu mulimi. Ku ing'inga yi Lilia liu Mweli Muhia, Mwami Saolo yaza kulia chukulia.

²⁵ Yikala kandi kuli mwima mu vogono vwivwe vwa kazozo ahimbi nilidigi. Abineri yikala himbi kuye; na Jonazani naye niyikara lovega lundi lohenzana na Saolo. Ovogono vwa Daudi vwali uvwere,

²⁶ navuzwa Saolo siyaavoola kindu lidiku yilio mba; kigira yaganagana, “Hawundi kindu chekoleki kuye; ma siaveeye mutakase mba.”

²⁷ Lidiku lialonda ku, lidiku inyima wu Mweli Muhia uvwiyangu vwa Daudi vwali ni vukikiri uvwere, na Saolo yateeva, Jonazani “Kigira ki Daudi si yaazi kulia chukulia mugolova anoho kalunu?”

²⁸ Jonazani yativura, “Agoonyi inzi muleke azie Bezelehemu.

²⁹ Yamboleeye, ‘Mwaza ndeka nzie, kigira avinyumba yange vosi vaveeye ni lilia lie kisiuviriru chu muhiga mu lidaala, na mwavo wange alagi inzi mbe yo. Kunangwa, niiva oveeye mulina wange, ndeka nzie kandi nduuki kolola aviiko vange.’ Yicho nicho kivuni kijiri navula kuva mu vogono vwivwe komesa yooyo.”

³⁰ Hene yaho uvutima vwa Saolo vwaka ku Jonazani, kandi yamuvolera, “Ivi muyaayi wu mukali utaveeye musuuvirifu kandi mwibaali! Inzi manya ivi watovola kuva ku lovega lwa Daudi na weheezaa zisoni harara na mama wowo!

³¹ Si umanyi ndi kolohoono lwa Daudi mwana wa Jese aveeye mwoyo ku lirova, ivi ulava mwami wi kivala yiki? Kalunu tula uzie kumuleeta hano kigira kuduuka akuzi ligali!”

³² Jonazani yateeva Saolo, “Kigira ki yiitwi? Akoli ki?”

³³ Navuzwa, Saolo yalasa Jonazani ni litimu lilie amwiti; kunangwa Jonazani yamanyiriza ndi ligali baba weve usaaviyi kwita Daudi.

³⁴ Jonazani yasingira kutura komesa mu vutima vululu na siyaalia kindu lidiku yilio mba, lidiku lia kaviri lie Lisavo liu Mweli Muhia. Yavererela Daudi mumwoyo gwigwe ligali, kigira Saolo yaali naamunyegi.

³⁵ Mugamba gwalonda ku, Jonazani yazia mu mulimi kwagana na Daudi kuli vaali nivavugilirizani. Yavugula muyaayi nazia harara naye,

³⁶ Kandi namuvolera; “Nyagura wenye mivano juvuta ja nziza kulasa.” Muyaayi zana yanyagura, kandi Jonazani yalasa umbano ihale imbiri weve.

³⁷ Lwa muyaayi oyo yaduuka havundu hu muvano gwuvuta gwaali nigugwiiyi, Jonazani yamuhanzukira, “Muvano goveeye imbiri ihale kutura yaho!

³⁸ Utasingira yaho vuzwa mba! Kola vwangu, uzie.” Musoleri yadoola muvano niyirana ku munene weve.

³⁹ Vugira kumanya cha gavoora; Jonazani na Daudi veng'ine vamanya.

⁴⁰ Jonazani yahaana viugi vivie viu vulwani ku muyaayi, namuvolera avilanyie mu lidaala.

⁴¹ Inyima wu muyaayi, kuzia, Daudi yasingira kutura inyima wi kitumi cha magina, yasigama hasi kandi niyinama haali kavaga. Vombi vaalilirana kandi nivavusana. Ovovereri vwa Daudi vwali ovonene kuvita vwa Jonazani.

⁴² Maku Jonazani yavolera Daudi, “Nyasaye ave na ivi. Yahova alalola ndi ivi na inzi, ni visukululwi vivio kandi viange vilaliinda lilagana litakatifu lia kumali kwisuhizanira.” Ahene yaho Daudi yatura nazia, kandi Jonazani yirana mu lidaala.