1 Samweli 19 - KITABU KITAKATIFU

Saolo Adambizaa Daudi

¹ Saolo yavolera muyaayi weve Jonazani harara na vatumikiri veve ndi asaavilaa kwita Daudi. Navuzwa Jonazani yaali ni yayanza Daudi kuvita kegero,

² kandi Jonazani yamuvolera, “Baba wange agerizaa kukwita. Mwaza nuyanza ove manyo mugambazuri; wivise havundu hatamanyikani na omenye ho.

³ Ndazia kusingira na baba wange mu mulimi aha waza ove nuwivisi kandi naamolome naye amakuva googo. Niiva nyora kindu ku choosi kutura kuye ndaaza ngovolere.”

⁴ Jonazani yizominya Daudi ku Saolo navoora, “Mwami, utakola kindu kidamanu ku mutumikiri woovo Daudi mba. Akikiri kukokolera ku uvudamanu ku vwosi. Kuvita goosi vindu viosi via yakola vialange viovokonyi vonene ku ivi.

⁵ Yavika livamwoyo lilie mu vuhimwa lwa yita Goliati, na Yahova yahaana liguuta linene ku Isiraeli. Lwa ivi walola inguuva yiyi, waasangala. Maku, kigira ki wenyaa kokora uvudamanu kalunu ku mundu utali niimbala, na wiite Daudi vugira kivuni kali kilala?”

⁶ Saolo yahuliriza makuva ga Jonazani ma ni yisuha ndi, “Ligali Yahova naveeye mwoyo, Daudi sialiitwa mba.”

⁷ Kunangwa Jonazani yalanga Daudi namuvolera amakuva goosi. Yamuhira ku Saolo, na Daudi yaali na Saolo kuli maziambiri.

⁸ Uvulwani na avandu va Filisitia vwatanga kandi. Daudi yavingilira niyiita vanyingi ligali kandi naavaguuta kuduuka vosi niviruka.

⁹ Lidiku lilala roho mudamanu kutura ku Yahova gwaaza nigwamiiha Saolo. Yaali niyikaye munyumba yeeye naveeye ni litimu mu mukono gwigwe. Daudi yaali naakubaa uvukana vwivwe munyumba yeeye.

¹⁰ Saolo yageriza kutumita Daudi kuduuka kwidigi nilitimu lilie, navuzwa Daudi yeveendelera, na litimu liatoza mu lidigi. Daudi yiruka naahona.

¹¹ Uvudiku vulala vwere yivwo Saolo yatuma vasaza valala kuzia kogoneka Daudi vamwiite mugambazuri. Mikali, mukali wa Daudi yaamwiganihiza; “Niiva siuliruka vudiku vwa lero, mugamba ulakuza.”

¹² Yaamwikizira mwidirisha, kandi yiruka niyehonyia.

¹³ Maku Mikali yavugula kifananyi chi inyumba yaavo, naakegonyia kukidali, naviika mudo gwalombwa ku vwoya vwizimbuli ha mutwi gwacho ma naakifuma ni inguvu.

¹⁴ Lwa vasaza va Saolo yatuma vaze kugumira Daudi, Mikali yavavolera ndi, alwalaa.

¹⁵ Navuzwa Saolo yaaviranyia yo vazie kwelolera Daudi aveene. Yavalaga, “Mumugingiri mukidali chiche mu muleete hano, na inzi ndamwita.”

¹⁶ Vingira munyumba kandi nivanyoora kifananyi mu kitanda nu mudo gwu vwoya vwi zimburi ha mutwi gwacho.

¹⁷ Saolo yateeva Mikali, “Kigira ki umali kungada kuli ndi kandi noleka musigu wange naahona?” Mikali yamutivulira, “Yamboleeye ndi alaanzita niindamukonyi kwiruka ahononoke.”

¹⁸ Daudi yiruka nazia ku Samweli mu lidaala lia Rama namuvolera goosi ga Saolo yaali naamukoleye. Maku oyo na Samweli vazia komenya mu lidaala lia Nayozi.

¹⁹ Saolo yavolerwa ndi Daudi amenyi ha Nayozi mu Rama.

²⁰ Kunangwa yatuma vasaza valala kumugumira. Valora muganda gwa vaporofeti nivavina kandi niiva porofetaa harara na Samweli kuli mwimiliri wavo. Ahene yaho Roho gwa Nyasaye gwaaza ku vasaza va Saolo yatuma kandi vatanga kuvina no koporofeta.

²¹ Lwa Saolo yahulira makuva yaga, yatuma vatumwa vandi, navo vatanga koporofeta kandi. Yatuma vatumwa ing'inga yakavaga ni kindu kilala chere chekoleka kuvo.

²² Maku mwene yaatanga kuzia Rama. Lwa yaduuka ha kidaho kenene mu Seku, yateeva wa Samweli na Daudi vaali ni vaveeye na yavolerwa ndi, vaveeye ha Nayozi.

²³ Lwa yaali naaziizaa yo, Roho wa Nyasaye yaza kuye kandi, naye yagenda kunzira naaporofetaa kuduuka Nayozi.

²⁴ Yaatuliza zinguvu zizie kandi naaporofeta imbiri wa Samweli, naagona hasi chahonyo mbasu yigwo gwosi nuvudiku yivwo vwosi. Yiki nicho chagira avandu nivavoora, “Saolo naye kandi ugwiyi muporofeti?”