1 Samweli 18 - KITABU KITAKATIFU

¹ Lwa Daudi yaali niyakamara kuvolerana na Saolo yaga, mwoyo gwu muyaayi wa Saolo Jonazani yayanzizwa ligali na Daudi, ma naamuyaanza ligali kuli yiyaanza mwene.

² Saolo yavugula Daudi amenye naye kutura lidiku yilio na siyamuleka yirane yengo wavo mba.

³ Hene yaho, Jonazani yalomba lilagana liemihiga ni mihiga na Daudi kigira yamuyanza kutura musi mwu mwoyo gwigwe.

⁴ Jonazani yanavuula iganza ya yaali niyiviiki, nagihaana ku Daudi harara nisalamba yeeye kandi kali nikivavi, nuvuta kandi numusibi gwigwe.

⁵ Choosi cha Saolo yatuma Daudi akole, yaakekola vulahi novogeri ligali kali kuduuka Saolo naamuha idalaja yigulu mu liihi. Kekolwa yiki chayaanziza vandu vosi kandi avatumikiri va Saolo.

Saolo akendekeraa Daudi

⁶ Lwa Daudi yaali niyirana inyima wu kwita Goliati, kandi lwa vasikari vi liihi vaali nivirana yengo, avakali kutura mu vuli lidaala mu Isiraeli vaatura ichova kuuza kwaganira Mwami Saolo. Vaali nivimbaa zinyimbu ziu vusangali, nivavina, kandi nivakubaa zitamburini kandi madienyi.

⁷ Mu lisangala liavo, avakali vimba, nivavoora, “Saolo yiiti zielefu na Daudi makomi zielefu.”

⁸ Saolo siyayaanzilira livoora yili mba, kandi yavihilirwa ligali. Yavoola, “Ku Daudi vamutaliraa makomi gi zielefu, navuzwa ku inzi zielefu zieng'ine vuzwa. Kitigaye vuzwa na vamukole mwami.”

⁹ Nandio yakendekera Daudi nu kumuganaganira uvudamanu kutura lidiku yilio kuzia imbiri.

¹⁰ Lidiku lialonda ku, roho mudamanu kutura ku Nyasaye gwamiiha Saolo nonoho, kandi yeetovoza munyumba kuli mulalu. Daudi yaali nakubaa uvukana kuli yakolaa vuli lidiku, na Saolo yaali nagumiyi litimu.

¹¹ Saolo yavoola, “Ndamutumitira ku lidigi ni litimu yili,” ma yaamulasa ni litimu zana haali kaviri, navuzwa Daudi yiivaraa vuli ing'inga.

¹² Saolo yatia Daudi kigira Yahova yaali harara naye, navuzwa Yahova yaali naleki Saolo.

¹³ Kunangwa Saolo yaatuliza Daudi imbiri weve kandi naamukora munene wa vasikari elefu. Daudi yimilira avasikari veve mu vulwani

¹⁴ kandi yaali ni ingavi yi liguuta mu goosi aga yakola; kigira Yahova yaali harara naye.

¹⁵ Lwa Saolo yalora ndi Daudi yaali ningavi yiliguuta linene yaamutia ligali.

¹⁶ Navuzwa vuli umundu mu Isiraeli na Ivuyuda vayaanza Daudi kigira yaali mwimiliri wovogeri mu likora lilie.

Daudi Aletaa Mukaana wa Saolo kuva mukali weve

¹⁷ Maku Saolo yavolera Daudi, “Mukaana wange munene Merabu aveeye hano. Ndamuhaana ku ivi kuli mukali woovo ku livugilirizana ndi undumikiri kuli musikari muluviliri kandi musuuvirifu kandi ulwaane uvulwani vwa Yahova.” Saolo yaali naganagana ndi, munzira yiyi avandu va Filisitia valiita Daudi, vugira oyo kumwita.

¹⁸ Daudi yativura, “Inzi mbeeye vwaha kandi avinyumba yange vaveeye ki inzi nduuki kugwa navizara wu mwami?”

¹⁹ Navuzwa lwa ing'inga yaduuka Merabu ahaanwe ku Daudi, yahaanwa mu vogono yivwo ku musaza walangwa Adurieli kutura mu lidaala lia Mehola.

²⁰ Mukaana wa Saolo Mikali yayanza Daudi, na lwa Saolo yahulira amakuva yaga, yayanzizwa ligali muno.

²¹ Yavoola, “Ndahaana Mikali ku Daudi; Ndamutumikira kotega Daudi. Kandi alakiitwi na vandu va Filisitia.” Kunangwa ku ing'inga ya kaviri, Saolo yavolera Daudi, “Waza ove navizara wange.”

²² Yalaga avatumikiri veve vamolome ku Daudi mu vwivisu na vamuvolere, “Mwami ayanziziywi na ivi kandi avatumikiri veve vosi; kalunu yiyi ni ing'inga indahi ya ivi oleeta mukaana weve.”

²³ Kunangwa vavoolera Daudi Makuva yaga, naye yativura, “Loveeye luyali lonene ligali kugwa navizara mwami, inguuva enene ligali ku mundu mudaka kandi utamanyikani kuli inzi.”

²⁴ Avatumikiri zana vavoolera Saolo aga Daudi yaali navooye;

²⁵ na Saolo yavalaga vavoolere Daudi: “Chu mwami yenya vuzwa kutura ku ivi kuli uvukwi kigira mwiha na magodo 100 agakeveywe kutura ku vandu va Filisitia vakuzi, kuli kisaalia ku vasigu veve.” Nindi Saolo yasavira Daudi yiitwi na Avafilisitia.

²⁶ Avatumikiri va Saolo vavoolera Daudi aga Saolo yaali navooye. Daudi yayanzizwa niganagani yukugwa navizara mwami. Lidiku lie keserero ni likikiri kuduuka,

²⁷ Daudi harara na vasikari veve vazia niviita avasaza Vafilisitia mia mbiri. Yaahira magodo gakeveywe ku mwami naamuvalizira goosi, kunangwa aduuki kuva navizara weve. Kunangwa, Saolo yamanya nahaana Mikali ku Daudi kuli mukali weve.

²⁸ Saolo yamanyiriza vulahi ndi Yahova aveeye harara na Daudi, kandi mukaana weve Mikali yamuyanza ligali.

²⁹ Kunangwa yamanya naatia Daudi ligali kandi yagwa musigu weve ku madiku goosi ga yaali mwoyo.

³⁰ Avanene va mahi ga vandu va Filisitia vazizagilira kutura ichova kulwaana, navuzwa mu vuli vulwani, Daudi yalange ni liguuta ligali kuvita mulala ku vanene vandi va Saolo. Kigira yaga Daudi yamanyikana vulahi ligali.