1 Samweli 17 - KITABU KITAKATIFU

Daudi na Goliati

¹ Avandu va Filisitia vavunga harara ha Soko, mu lidaala lia Ivuyuda kwetegekera uvulwani; valomba hokososa havundu halangwa Efesi Damimu, hagati ha Soko na Azeka.

² Saolo na vandu va Isiraeli vavugana kandi nivalomba hokososa mu livona lia Ela, uwa vetegeka kulwaana na vandu va Filisitia.

³ Avandu va Filisitia veelohiza ku kiguru kilala na avandu va Isiraeli navo nivava ku kiguru kindi, na livona niliva hagati haavo.

⁴ Musaza mulala walangwa Goliati muluviliri kutura mu lidaala linene lia Gazi, yaza kutura mu ahokososa ha vandu va Filisitia kogelana nukulwaana na vandu va Isiraeli. Yaali ahimbi uvutambi vwi zimita zivaga,

⁵ na yiviika likoti liu mugasa liuvulitu vwi zikilo amusini na saba, kandi igudwa yumugasa.

⁶ Virenge vivie viakingwa kandi nisalamba yumugasa, kandi yaginga litimu liumugasa ku mavega geege.

⁷ Luvango lwi litimu lilie lwali kuli musaala gwu muluguyu kandi uvulitu vwu mutwi gwi kivia gwalio gwaali ahimbi zikilo saba. Musikari wi liihi yagendaa imbiri weve nagiingi inguva yeeye.

⁸ Goliati yasingira nahaanzukira vandu va Isiraeli, “Mukoraa ki yaho, mwetegekeeye uvulwani? Inzi mbeeye mundu kutura Filisitia, na munyi muveeye avatugwa va Saolo? Tovoli mulala ku avasaza vinyu alwaane niinzi!

⁹ Niiva alaguuta na anzite, kunyi kulava avatugwa vinyu; navuzwa niiva inzi nguuta, ma mwiti, munyi mulava avatugwa viitu.

¹⁰ Lidiku lia lero mali kuchaya ovonene vwa mahi ga Isiraeli. Mumbe musaza mulala alwaane niinzi.”

¹¹ Lwa Saolo na vasikari veve vahulira makuva gu Mufilisitia yaga vahenda mwoyo nivadegera nuvuti ligali.

Daudi mu hokososa ha Saolo

¹² Daudi yaali muyaayi wa Jese, Umuefurazi kutura mu lidaala lia Bezelehemu mu kivala chi Ivuyuda. Jese yaali na vayaayi munane, kandi ku ing'inga ya Saolo yaali mwami, yaali naveeye musakulu wimihiga jiduuki.

¹³ Avayaayi veve vukutanga vavaga vaali nivaziiyi muvulwani harara na Saolo. Wukutanga yaali Eliabu, uwalonda ku yaali Abinadabu, na uwakavaga yaali Shama.

¹⁴ Daudi yaali mukekeeke ku vosi, kandi lwa avamwavo veve vanene vamenyaa na Saolo,

¹⁵ Daudi yirana kuzia Bezelehemu vuli ing'inga kwaya amagondi ga baba weve.

¹⁶ Vuli mugamba na mugolova, ku madiku arubaini, Goliati yaazaa imbiri na ukulanga avandu va Isiraeli valeete mundu uluvilira kulwaana naye.

¹⁷ Lidiku lilala Jese yavolera Daudi, “Vugula zikilo likomi zia maduma masambe yaga kandi ni milaango ji migadi likomi yiji na uhiliri avamwavo vovo vwangu mu hokososa haavo.

¹⁸ Uhiliri munene wa vasikari wavo zingonye likomi zia maveere gaseezwa yaga. Wenyelerizi kuli avamwavo vaavo vaveeye na okoleetere kindu chukumanyia kunyi ndi waakuvalola kandi vaveeye avalamu.

¹⁹ Umwami Saolo, avamwavo vovo, kandi Avaisiraeli vandi vosi vaveeye mu Livona lia Ela, na valwaana na vandu va Filisitia.”

²⁰ Daudi yavuka mumavwevwe lidiku lialonda ku naleka mwayi wundi amulindili amagondi, navugura chukulia, kandi nazia kuli Jese yaali naamuvoleeye. Yaduuka ahokososa ing'inga ya Avaisiraeli vaali nivaturaa kuzia kuvugura vwiyangu vwi liihi liavo, nivahanzuka uluku lwuvulwaani.

²¹ Liihi lia vandu va Filisitia kandi liihi lia vandu va Isiraeli vavugura vwiyangu vwavo mu lietegekera vulwani, nivaheenzana.

²² Daudi yaleka chukulia, vindu via yaali navio mu vulindi vwu munene ulindaa viukulia ni vindu via vasikari vatumikira, nanyagura kuzia ku liihi lia vasikari, nazia ku avamwavo veve, navacheliza nokoteeva kuli vazizagiliraa.

²³ Lwa Daudi yaali namolomaa navo, Goliati muluviliri kutura Gazi, yisunda imbiri wi liihi nateeva Avaisiraeli kuli kazozo, valeete musaza unyala kulwaana naye. Kandi Daudi yamuhulira.

²⁴ Lwa vasaza vosi va Isiraeli valora Goliati, vamwiiruka mu vuti vonene.

²⁵ Avandu va Isiraeli vavolerana aveene naveene, “Loli mundu uyu! Huliri ku lilegeriza lilie! Mwami Saolo umali kulaga ndi alahaana madanyi manene ku musaza wita Goliati; mwami alamuha mukaana weve ave mukali weve kandi avinyumba ya baba weve sivatungizwa uvusuuru mba.”

²⁶ Daudi yateeva vasaza vaali nivaveeye ahimbi naye, “Musaza uva niyiita mundu Mufilisitia uyu nokovoholola Isiraeli kutura mu zisoni yizi alahevwaki? Kali ndio nivwaha, Mufilisitia musiindi uyu olegeriza liihi lia Nyasaye oveeye mwoyo?”

²⁷ Vamuvolera ichakakoleywi ku mundu wakiiti Goliati.

²⁸ Eliabu, amwavo Daudi munene, yahulira Daudi naavoleranaa navandu. Yasinyikira Daudi ligali navoora, “Uzi hano kigira ki? Olekeeye vwaha magondi mu changalangwe? Inzi manya luyaayi lulwo kandi kuli mwoyo gugwo goveeye mudamanu; Uzi hano kolola vuzwa uvulwani.”

²⁹ Daudi yateeva, “Kalunu ngoli ki? Sinyala kali koteeva liteeva mba?”

³⁰ Yagirung'ana nazia ku mundu wundi kandi namuteeva liteeva lilala liere; yanyoora litivuli lilala liere kuli maziambiri.

³¹ Avandu valala vahulira aga Daudi yaali navooye; ma nivavolera Saolo, wamanya natuma mundu alange Daudi.

³² Daudi yavolera Saolo, “Utaleka mundu ku vosi akuze mwoyo kigira Mufilisitia uyu mba; ndazia kulwaana naye.”

³³ Saolo yativura, “Awa! Wakanyali ndi kumulwaana? Ivi oveeye vuzwa muyaayi mu kekekeeke naye yava musikari mihiga josi ji livamwoyo lilie.”

³⁴ Daudi yavoola, “Mwami wange, Inzi nindaa chayo, cha magondi ga Baba wange. Lwa king'ang'a kinga idubu egerizaa kuuza kugumira kememe chi ligondi, kutura mu chayo.

³⁵ Inzi ngerondaa, nokukitulira, kandi kohonyia kememe chi ligondi kutura mu munwa gwacho. Kandi niiva king'ang'a kinga idubu inzikiluka, inzi ngigumira mwigoti, ngikuya nuku jiita.

³⁶ Inzi, mutumikiri woovo ndayita ving'ang'a kandi ni zidubu, kandi ndakora malala mere ku Mufilisitia musiindi uyu, umali konyega liihi lia Nyasaye, oveeye mwoyo.

³⁷ Yahova, uwahonyia inzi ku ving'ang'a ni zidubu alambonyia kutura ku Mufilisitia musiindi uyu.” Saolo yativura “Vulahi! Kazie, kandi Yahova ave harara niivi.”

³⁸ Yaaha Daudi isalamba yeeye mwene yiviiki, igudwa yu mugasa, ya yavika ku mutwi gwa Daudi, kandi likoti lie kivia.

³⁹ Daudi yavoha kivavi cha Saolo ku isalamba yumugasa ma nageriza kogenda, navuzwa siyanyala kogenda mba, kigira siyaali niyanala kuvieviika mba. Yavolera Saolo, “Sinyala kuzia kulwaana mu vindu yivi viosi mba, kigira sindanala kuvitumikira mba.” Kunangwa yaavinaavuula.

⁴⁰ Yavugula imbimbu yeeye yu mwayi ma naadoora magina materere gatano kutura mu mugera kandi nagaviika musigo gwigwe. Niyeetegekiza olokova lwukulasa magina, yazia imbiri kwagana na Goliati.

Daudi aguutaa Goliati

⁴¹ Mufilisitia zana yaatanga kogenda nazia wa Daudi yaali, mugiingi wi inguva yeeye naagendaa imbiri weve. Yaazizagilira kwisuunda ahimbi,

⁴² na lwa yahenza Daudi vulahi ligali, yakolera Daudi kehenyahenye, kigira yaali vuzwa muyaayi mulahi, wiligondo lilahi.

⁴³ Yavolera Daudi, “Imbimbu yeyo ni yaaki? Uganaganaa inzi mbeeye imbwa?” Na yaleeta vilaamo kutura ku vanyasaye va Vafilisitia viduuki ku Daudi.

⁴⁴ Yavolera Daudi, “Hamba hano noveeye musaza, na ndahaana muviri gugwo ku manyonyi ni zinyama zilie.”

⁴⁵ Daudi yativura, “Ivi uzaa kunwana ni kivavi, litimu, lubanga kandi inguva; navuzwa inzi ndakulwaana mu lieta lia Yahova Wuvunyali, Nyasaye wa mahe ga Isiraeli, uwa ivi umali konyega.

⁴⁶ Lidiku lia lero yili Yahova alaviika ivi hasi hi zinguru ziange. Ndakuguuta kandi ndatema mutwi guugwo gutuli. Ndahaana miviri ja vasikari Vafilisitia ku manyonyi kandi zinyama zilie. Ahene yaho avandu vosi mu lirova valamanya ndi Isiraeli vaveeye na Nyasaye.

⁴⁷ Kandi avandu vosi avavungi hano valalola ndi Yahova siyeenyaa ivivavi na matimu, okohonyia avandu veve mba. Aveeye muguuti mu vulwani kazozo, na alaviika munyi mwosi mu zinguru zietu.”

⁴⁸ Goliati yaatanga kogenda kuzia wa Daudi yaali kandi Daudi kunyagula kuzia wa amahi ga vandu va Filisitia gaali kulwaana naye.

⁴⁹ Yavika mukono gwigwe mu musigo natuliza ligina, lia yavika ku lokova lwukulasira, nalasa Goliati. Ligina liamuduya ku vweni niliatanyia ikihanga chiche. Goliati yagwa hasi mam'mama bu.

⁵⁰ Nandio, vugira kivavi, Daudi yaguuta kandi niyiita Goliati nolokova lwukulasira niligina!

⁵¹ Daudi yanyagula kuye, nasingira ku, nasomola kivavi cha Goliati kutura mu lwula lwacho, naatema mutwi gwigwe pa, kandi naamwita. Lwa vandu va Filisitia valora ndi muluviliri muguuti wavo ukuzi, viiruka mbitilira.

⁵² Avasaza va Isiraeli kandi Ivuyuda vaakuba uluku nivanyagura kuvalondelera nivavalondelera zimbiru kuduuka Gazi kandi kuduuka ku virivwa via Ekironi. Avafilisitia vaagwa nizing'oma kolondekana kunzira yoosi izizaa Shaaraimu kuduuka Gazi na Ekironi.

⁵³ Lwa vasaza va Isiraeli virana kutura mu lilondelera, valaanya ahokososa haavo.

⁵⁴ Daudi yadoola mutwi gwa Goliati naaguhila Jerusalemi, navuzwa yavugula viugi via Goliati viu vulwani naviika mu lihema lilie.

Daudi ahilangwa ku Saolo

⁵⁵ Lwa Saolo yalora Daudi nazizaa kulwaana Goliati, yateeva Abineri, munene wi liihi lilie, “Abineri! Uyu nu muyaayi wa vwaha?” Abineri yativura, “Inzi si manyi mba, O, mwami wange.”

⁵⁶ Saolo yamulaga, “Zia otevelerize.”

⁵⁷ Kunangwa, lwa Daudi yirana mu ahokososa, inyima wukwita Goliati, Abineri yamuhira ku Saolo. Daudi yaali naakigingi mutwi gwa Goliati.

⁵⁸ Saolo yamuteeva, “Muyaayi, ivi oveeye muyaayi wa Vwaha?” Daudi yativura, “Inzi mbeeye muyaayi wu mutumikiri woovo Jese kutura mu lidaala lia Bezelehemu.”