1 Samweli 16 - KITABU KITAKATIFU

Daudi avakwaa maguta kuli mwami

¹ Yahova yavolera Samweli, “Ulasiomera Saolo kuduuka ng'inga ki? Inzi mali kumusuura kuli mwami wa Isiraeli. Navuzwa kalunu vugula maguta ga Muzeituni na uzie Bezelehemu, ho mundu ulangwa Jese, kigira mali kotovola mulala ku vayaayi veve kuva mwami.”

² Samweli yateeva, “Nyara ndi kokora ndio? Niiva Saolo alahulira amakuva yaga, alaanzita!” Yahova yativura, “Vugula kemoli uzie nacho ma ovoole ndi uziiyi yo kuhaana kisiuviriru ku Yahova.

³ Langa Jese yaaze kulia ku kisiuviriru, na inzi ndakovolera cha okola. Ndakovolera mundu wa vakaa maguta ave mwami. Ulavaka makuta kuli mwami, musaza wa inzi ngovolera.”

⁴ Samweli yakola icha Yahova yamuvolera akole, nazia Bezelehemu, uwa viimiliri vi lidaala linene vaza kumwaaganira nivadegeraa; kandi vamuteeva, “Umuloli, ukaazi kukuluuta ku mirembe naho?”

⁵ Yativura, “Yee, nziizi kuhaana kisiuviriru ku Yahova. Mwitakase aveene kandi muuze harara niinzi.” Yavolera Jese harara na vayaayi veve vitakase, na vavoolera vaze ku kisiuviriru.

⁶ Lwa vaduuka, Samweli yalora muyaayi wa Jese Eliabu niyevolera mwene, “Musaza usingiyi hano imbiri wa Yahova uyu niyie ligali wa amali kotovola.”

⁷ Navuzwa Yahova yamuvolera, “Utahenza ku vutambi kinga ku vulahi vwi ligondo lilie mba. Mali kumusuura, kigira inzi sindora kuli mundu alolaa mba. Umundu aheenzaa ku ligondo liukwiigulu, navuzwa inzi mbenzaa ku mwoyo.”

⁸ Maku, Jese yalanga muyaayi weve Abinadabu naamuleeta ku Samweli. Navuzwa Samweli yavoola, “Awa, Yahova siatovooye uyu kandi mba.”

⁹ Maku Jese yaleeta Shama. Samweli yavoola, “Awa, Yahova siamutovooye uyu kandi da.”

¹⁰ Munzira yiyi Jese yaleeta vayaayi veve saba imbiri wa Samweli. Na Samweli yamuvolera, “Awa, Yahova siatovooye kali mulala ku yava mba.”

¹¹ Ahene yaho Samweli yateeva Jese, “Ukaveeye ku na vayaayi vandi naho?” Jese yativura navoora, “Akikiri ho mukogoti, navuzwa aveeye ihale, yayizaa magondi.” Samweli yamuvolera, “Muvoolere yaaze hano. Sikunyala kuhaana kisiuviriru kuduuka lwa yaza.”

¹² Kunangwa Jese yatumana yaaze. Yaali muyaayi wiligondo lilahi ligali, wuvulamu vulahi, na zimoni zizie ziavereng'anaa vulahi. Yahova yavolera Samweli, “Uyu niyie; singira muvake amaguta!”

¹³ Samweli yavugula lwiga lwa maguta ga muzeituni navaka Daudi amaguta imbiri wa vamwavo veve. Nonoho, Roho wa Yahova yagumira Daudi kandi yaali naye kutura ing'inga yeyo. Maku Samweli yirana Rama.

Daudi munyumba yu vwami ya Saolo

¹⁴ Roho wa Yahova yatura ku Saolo, kandi Yahova yatuma roho mudamanu kudambiza Saolo.

¹⁵ Avatumikiri vamuvolera, “Kumanya vulahi ndi roho mudamanu watumwa kutura ku Nyasaye akudambizaa.

¹⁶ Kunangwa ukulage, mwami, kweenye musaza wamanya kukuba uvukana. Maku lwa roho mudamanu guzaa ku ivi, musaza zana alakuba vukana vwivwe, na ivi ulirana kuva vulahi kandi.”

¹⁷ Saolo yavalaga, “Nzenyeri musaza ukubaa vukana vulahi ligali kandi mumuleete ku inzi.”

¹⁸ Mulala ku vatumikiri veve yavoola, “Jese, wi lidaala lia Bezelehemu, aveeye nu muyaayi oveeye mwimbi kandi ukubaa vukana vulahi. Aveeye musaza muluviliri kandi wi ligondo lilahi musikari wi liihi mulahi kandi mimolomi mulahi. Yahova aveeye harara naye.”

¹⁹ Kunangwa Saolo yatuma avatumwa ku Jese kovora, “Ndumira muyaayi woovo Daudi, oyo uwayaa magondi.”

²⁰ Jese yatuma Daudi ku Saolo nekememe chi imburi, ibunda nigingi migadi kandi nu musigo gwe kesero nigwiizuyi iwaini du.

²¹ Daudi yaza ku Saolo kandi nava mulala ku vatumikiri veve. Saolo yamuyanza ligali kandi naamutovola kuli mundu wukumugingira viugi vivie.

²² Ahene yaho, Saolo yatuma amakuva ku Jese navoora, “Nyanza Daudi. Leka amenye hano mu vutumiki vwange.”

²³ Kutura ulwene yilwo na kazozo, lwa roho mudamanu kutura ku Nyasaye gwaazaa ku Saolo, Daudi yavugulaa uvukana nu kuvukuba vulahi. Roho mudamanu gwaturaa kuye, Saolo yaali anyala kwihulira vulahi ligali.