1 Samweli 15 - KITABU KITAKATIFU

Uvulwani na Vandu va Maleki

¹ Samweli yavolera Saolo, “Inzi niyie wa Yahova yatuma kuuza kukuvaka amaguta ove mwami wa vandu veve Isiraeli. Kalunu uhulirize ku icha Yahova Wanyala Viosi avoora.

² Azizaa kuhaana amageri ku avandu va Amaleki kigira vaguuga vaavo vaahing'ana na avandu va Isiraeli lwa vaali nivatulaa Egebeti.

³ Zia wingiliri avandu va Maleki na udivize ligali vindu viosi via vaveeye navio. Mutavalekela kindu kali kilala mba. Mwiite avasaza, avakali, avana vosi kandi avana vadoto vosi; zing'ombe, amagondi, zing'amia kandi zibunda ziosi.”

⁴ Kunangwa Saolo yalanga amahi geege goosi harara kandi naagavaliza ha Teleimu. Vaali ho avasikari 200,000, kutura Isiraeli na vasikari 10,000 kuvo vosi vaatura Ivuyuda.

⁵ Ahene yaho, Saolo harara na vasikari veve vazia mu lidaala linene lia vandu va Maleki kandi ni vazia kuvagonekera mu livona liu mugera gwaakama.

⁶ Yatuma lieganihiza ku vandu va Vakeni, avandu va vaguuga vaavo vakolera vandu va Isiraeli vulahi lwa vaatura Egebeti navoora: “Muturi! Muzie, muleke avandu va Maleki kunangwa mburi kumudiviza harara navo.” Kigira mwamanyia uvugasu ku vandu va Isiraeli lwa vaatura Egebeti. Maku avandu vakeni vaatura ni vazia.

⁷ Saolo yaguuta vandu va Maleki, nalwaanaa navo hoosi kutura Havila kuduuka Shuri, liveeye Ivugwi wa Egebeti;

⁸ yagumira Agagi mwami wa vandu va Maleki naveeye mwoyo, na niyiita avandu vandi vosi.

⁹ Navuzwa Saolo na vasaza vi liihi vahonyia livamwoyo lia Agagi kandi siviita magondi ni zing'ombe ziali zindahi ligali mba; vimoli kandi vimeme vilahi ligali mba, anaho kindu choosi ichaali kilahi, vononyia vuzwa yivio viavula kuduukana kandi vidamanu.

Saolo asuulangwa kuli mwami

¹⁰ Yahova yavolera Samweli,

¹¹ “Mbereraa ndi ndaakola Saolo kuva Mwami; umali kugirung'ana kutura ku inzi kandi uvuli kuhulira malago gange.” Samweli yavihilirwa ligali, na uvudiku vwosi yanira ku Yahova namugoonyaa.

¹² Samweli yatura mugambazuri lidiku lialonda ku, nazia kwenya Saolo. Yahulira ndi Saolo yaali namali kuzia mu lidaala lia Karimeli, uwa yaali niyiyumbakiyi kelolero chukwiyizulizira ku, kandi naziiyi Giligali.

¹³ Samweli yazia kuduuka ku Saolo. Yamucheliza, navoora, “Yahova akugasizi, Samweli! Inzi mali kuduukiza malago ga Yahova.”

¹⁴ Samweli yamuteeva, “Kigira ki mbulira iliaana lia magondi ni zing'ombe?”

¹⁵ Saolo yativura, “Avasikari vange vi liihi vazivugula kutura ku vandu va Maleki. Vavugura magondi malahi ligali kandi zing'ombe zindahi ligali kuhaana kuli visiuviliru ku Yahova Nyasaye woovo; na kumali kwononyia ligali ivindu vindi viosi.”

¹⁶ Samweli yavolera Saolo, “Hera yaho! Leka ngovolere cha Yahova yamboleeye vudiku vwa mugolova.” Saolo yavoola, “Mbolera!”

¹⁷ Samweli yativura, “Kali nuwiganagana kuva mukekeeke, ivi oveeye mwimiliri wi zihiiri zia Isiraeli. Yahova yakuvaka maguta ove mwami wa Isiraeli.

¹⁸ Vakutuma kandi namalago kudiviza vandu vadamanu yavo va Avamaleki. Yakovolera ulwaane kuduuka lwa umala kwiita vosi.

¹⁹ Kunangwa kigira ki utahuliiyi Yahova? Kigira ki udidikani kutuuma ku vilaanye nokora gatayanzizaa Yahova.”

²⁰ Saolo yativura, “Inzi mali kutia Yahova. Inzi mali kokora kuli Yahova yambolera, nindeeta mwami Agagi, kandi niinzita Avamaleki vosi.

²¹ Navuzwa avasikari vange siviita amagondi malahi kandi zing'ombe zindahi zia vagumira mba; mu vogono yivwo, vaavileeta hano ha Giligali ukuhaana kuli visiuviliru ku Yahova, Nyasaye woovo.”

²² Samweli yativura, “Ni ki cha Yahova ayaaziliraa kuvita? Kutia anoho vihaanwa viukusambwa kandi visiuviliru? Ni vulahi ligali kuhulira Yahova kuvita kuhaana visiuviliru via magondi malahi ligali kuye.

²³ Uvwibaali kuye voveeye uvudamanu kuli ovologi kandi kizalo keveeye kuli uvwoni uvwu kusigamira misambwa. Kigira wasuula lilago lia Yahova, naye umali kusuura ivi kuli mwami.”

²⁴ Saolo yavoola, “Yee, inzi mali kwona. Mali kutinguha lilago lia Yahova kandi amigizu googo. Ndaatia avandu vange, kandi ningora aga venya.

²⁵ Navuzwa kalunu ngogonya, mwaza, samiiha uvwoni uwange, ma kwirane inyima, kunangwa nduuki kusigamira Yahova.”

²⁶ Samweli yativura, “Sindirana niivi mba. Ivi wasuula malago ga Yahova, naye ukusuuye kuli mwami wa Isiraeli.”

²⁷ Ahene yaho, Samweli yagirungana atuli kuye, navuzwa Saolo yagumira lukigiti lwi iganza yeeye nayo yatanduka.

²⁸ Samweli yamuvolera, “Yahova umali kutandura uvwami vwa Isiraeli kutura ku ivi kalunu na uvuhaani ku wundi oveeye mulahi ligali kuvita ivi.

²⁹ Nyasaye Wuvunyali, wa Isiraeli siaveehaa kandi siagirunganyia zing'anagani zizie mba. Siaveeye mundu kandi sianyala kugirung'anyia zing'anagani zizie mba.”

³⁰ Saolo yavoola, “Inzi mali kokora uvwoni. Navuzwa nuyanza, manyia utanzangalariza imbiri wa vimiliri va vandu vange kandi Isiraeli vosi. Yirana nainzi kunangwa nduuki kusigamira Yahova Nyasaye woovo.”

³¹ Kunangwa Samweli yirana na Saolo, kandi Saolo yasigamira Yahova.

³² Samweli yavoola, “Ndeteri Mwami Agagi hano mwami wa vandu va Meleki.” Agagi yaza kuye nuvuluviliri, naganagana mu mwoyo gwigwe, “Vululu vwi likuza vumali kohera.”

³³ Samweli yavoola, “Kuli kivavi chicho chakola avakali vanyingi kuva vugira avana, nindio kandi mama woovo alagwa vugira umwana.” Kandi yaatemanyia Agagi mu vidonye imbiri wa Yahova ha Giligali.

³⁴ Maku Samweli yazia Rama, na mwami Saolo naye nazia yengo weve Gibea.

³⁵ Kumadiku goosi ga Samweli yaali mwoyo, siyaazia kolola mwami Saolo kandi mba; navuzwa yamusiomera ligali. Yahova yavelera kigira yakola Saolo kuva mwami wa Isiraeli.