1 Samweli 14 - KITABU KITAKATIFU

Kekolwa chuvuluviliri cha Jonazani

¹ Lidiku lilala, Jonazani yavolera muyaayi wamugingiraa iviugi vivie, “Genda kwambuki kuzie mu hokososa ha vandu va Filisitia.” Navuzwa Jonazani siyavolera baba weve Saolo mba,

² Baba weve yaali nalombi hokososa hehe isi wumusala gulangangwa mukomamanga, mu lidaala lia Migironi ahimbi na Gibea. Yaali na vasaza 600 harara naye.

³ Musaalisi waali niyiviiki kisibao yaali Ahija, amwavo wa Ahitubu amwavo Ikabodi, yaali muyaayi wa Finiasi muyaayi wa Eli; musaalisi wa Yahova ha Shilo. Avasaza yavo sivamanya ndi Jonazani yaali naziiyi mba.

⁴ Mu lumbatania lwa Mikimashi, mwa Jonazani yaduukanaa kuvitira kuzia mu hokososa ha Avafilisitia, haali ho na magina manene gaviri amuugi, lilala ku vuli lovega lwu lumbatania: lilala lialangangwa Bozezi na ilindi nililangwa Sene.

⁵ Lilala liali ku lovega lwa Ivaale wiilumbataania, niliheenzi Mikimashi, na ilindi liali ku lovega lwa Isavaalu, niliheenzi Geba.

⁶ Jonazani yavolera musoleri zana, “Genda kwambuki kuzie mu hokososa ha vandu va Filisitia vasindi yavo. Hawundi Yahova alakokoonya; niiva akola ndio, sikeveeye ho kindu kimwigalira avuli kuha kunyi liguuta, kali nikoveeye vakekeeke kuli ndi!”

⁷ Muyaayi zana yativura, “Choosi cha wenya kokora okole inzi mbeeye harara na ivi.”

⁸ Maku Jonazani yavoola, “Vulahi, kulambuka kuzie kunangwa avandu va Filisitia vaduuki kokolola.

⁹ Niiva vakovolera kuvaliindi vaze ku kunyi, ahene yaho kulasingira vuzwa aha koveeye.

¹⁰ Navuzwa niiva vakovolera kuzie kuvo, ahene yaho kulazia, kigira yicho kilava kelolero ndi Yahova ujiri kuvaguuti.”

¹¹ Kunangwa vombi valeka vandu va Filisitia vavalole, kandi avandu va Filisitia vavoola, “Henza! Avalala ku Avaheburaina vatuli mu malina mwa vivisangi!”

¹² Maku valangiriza Jonazani nu muyaayi oyo kovora, “Hambi yinu! Kulamumanyia cha mwenya.” Jonazani yavolera muyaayi oyo, “Nonda! Yahova umali kuha Isiraeli liguuta kuvo.”

¹³ Jonazani yanina ichova kutura mu lumbatania naamola na makono kandi namaru geege, na umusoleri oyo naamulondaa. Jonazani yingilira vandu va Filisitia, navatuula hasi bu; nu muyaayi oyo yaviita.

¹⁴ Mu liita liukutanga yilio, Jonazani numuyaayi weve vita ahimbi avasaza sirini havundu harara haduukana inusu ye yeka ndala.

¹⁵ Avandu va Filisitia vosi avaari mu kiguti vaali ni vadegera lidegera linene ligali. Avalanyi na vasikari vi liihi avaari mu hokososa vaatenga novodegeri vonene kigira uvuti. Lirova liatenga ligali, kandi haali nilidundana linene ligali.

Liguutwa lia Vandu va Filisitia

¹⁶ Avasaza va Saolo yavika ku vulindi mu kivala cha Benjamini valora vandu va Filisitia nivanyagura yiyi na yiyi mu lidandana.

¹⁷ Kunangwa Saolo yavolera vasaza vaali harara naye, “Valizi avasikari kandi mumanye nivwaha utaveeye ho.” Vaakora ndio kandi nivanyoora ndi Jonazani harara numuyaayi wamugingiraa iviuma vivie vaali nivataveeye ho.

¹⁸ Saolo yavolera musaalisi Ahija, “Leeta hano Lisandugu lie Lilagana lia Nyasaye.” Kigira ing'inga yeyo Ahija yaali naligingaa imbiri wa vandu va Isiraeli.

¹⁹ Lwa Saolo yaali nakemoloma numusaalisi, kivihiri kenene mu hokososa ha vandu va Filisitia chakira komedeka ligali, kunangwa Saolo yavolera, musaalisi “Ing'inga yokoteeva vulaliri vwa Yahova sieveeye ho mba.”

²⁰ Maku Saolo harara na vasaza vi liihi vosi avaari naye vaatura kuzia kulwaana na va Filisitia, avaari nivakubanaa aveene na vene mu ligoyana.

²¹ Avandu va Isiraeli yavo avaari harara na vandu va Filisitia ku maziambiri, kandi vaali nivaziiyi harara navo mu hokososa haavo, vazia ku lovega lwa vandu va Isiraeli avaari na Saolo na Jonazani.

²² Lwa vandu va Isiraeli vosi avaari ni viivisi mu kivala chi vigulu cha Efuraimu vahulira ndi avandu va Filisitia vaali kwiruka, navo kandi viiyunga mu vulwani kwingilira nokolondelera Avafilisitia.

²³ Kunangwa uvulwani vwazizagilira kali kuvita lidaala lia Bezihaveni. Yahova yahonyia Isiraeli lidiku liene yilio.

Vindu viekoleka inyima wuvulwaani

²⁴ Avasaza va Isiraeli vadedekera ligali kigira inzara lidiku liene yilio, kigira Saolo yaali nahaani lilago lilulu: “Kilaamo keve ku mundu woosi ulia chukulia choosi ningikiri kuvaanza kisaalia ku vasigu vange.” Kunangwa sihaaliho nu mundu waali naaliyi kindu lidiku yilio mba.

²⁵ Avasikari vosi vi liihi vingira mu mulitu kandi nivanyoora ndi uvwuki voveeye havundu hoosi.

²⁶ Mulitu gwizura uvwuki, navuzwa sihaali nu mulala uwaalia kuvwo, kigira vosi vaatia kilaamo cha Saolo.

²⁷ Navuzwa Jonazani siyaali naahuliiyi baba weve naadegeriza vandu ni kilaamo mba, kunangwa yanyira esonga yi imbimbu ya yaali nayo mu mukono, nadongeriza mu lisang'asa liu vwuki, ma nalia. Nonoho yahulira vulahi ligali.

²⁸ Navuzwa mulala ku vasaza yavo yavoola, “Kunyi kumali kodedekera ninzara, navuzwa baba woovo akodegerizi navoora, ‘Kilaamo keve ku woosi ulia chukulia ku choosi lidiku lia lero.’ ”

²⁹ Jonazani yativura, “Ni kindu kidamanu ki yiki cha baba wange akoli ku vandu viitu! Lola kuli inzi nzihulira vulahi ligali kigira mali kulia vwuki!

³⁰ Sivwakaveeye vulahi ligali kuvita kalunu niiva vandu viitu avasaza yava vakaliiyi chukulia cha vaavugura lwa vaguuta musigu. Ganagana ku vuzwa na vandu va Filisitia vandi vanga va vakiitiywi!”

³¹ Lidiku yilio, avandu va Isiraeli vaaguuta Avafilisitia, nivalwana hoosi kutura Mikimashi kuduuka Aijaloni. Kuduuka ing'inga yene yeyo, avasaza vi liihi lia Isiraeli vaali nivageehi zinguru ligali kigira inzara.

³² Kunangwa vatuma ku vindu via vaali nivagumiyi kutura ku vasigu. Vaavugura magondi ni zing'ombe, nivazisiinzira ahene yaho, nivalia inyama zana nikikiri namasahi.

³³ Maku Saolo yavolerwa, “Henza, avandu vakora uvwoni ku Yahova ku lilia inyama masahi nigakiri mu.” Saolo yavoola, “Munyi muveeye avagaadi. Gomagominyi ligina linene liduuki hano ku inzi.”

³⁴ Ma kandi yahaana lilago lindi, “Muzie hagati ha vandu vosi kandi muvavolere valeete zing'ombe na magondi gaavo hano. Kuduuka vagiitiri na valiri hano vatakolera Yahova uvwoni ku lilia inyama harara na masahi mu mba.” Kunangwa uvudiku yivwo vosi valeta zing'ombe ziavo niviitira hazana yaho.

³⁵ Saolo yumbakira Yahova uvwali uvwukutanga.

³⁶ Saolo yavolera avasaza vi liihi lilie, “Gendi kusulunguti na kwingiliri vandu va Filisitia vudiku kandi kuvalaanye vindu viavo kuduuka mugambazuri na kuviiti vosi.” Vaativura, “Kola choosi cha uganagana kuva kilahi.” Navuzwa musaalisi yavoola, “Gendi koteeve Nyasaye kutanga.”

³⁷ Kunangwa Saolo yateeva Nyasaye, “Nyara kuzia kwingilira vandu va Filisitia? Ulakwimilira kuguutia?” Navuzwa Nyasaye siyativula kindu lidiku yilio mba.

³⁸ Ahene yaho Saolo yavolera vimiliri vosi va vandu va Isiraeli, “Hambi hano mwosi kuduuki kumanya nivwoni ki vokoleywe lidiku lia lero.

³⁹ Musuuviriza munyi ku lieta lia Yahova oveeye mwoyo, ohezaa vandu va Isiraeli liguuta, ndi umuhioli oyo aliitwa, kali yava naveeye muyaayi wange Jonazani.” Navuzwa sihaali numulala wavoola kindu.

⁴⁰ Maku Saolo yavavolera, “Munyi mwosi, singiri lovega lulala, na Jonazani harara niinzi kulasingira lovega Lundi.” Vamutivulira, “Kola choosi cha uganagana kuva keveeye kilahi ligali kuvita.”

⁴¹ Saolo yavolera Yahova, Nyasaye wa Isiraeli, “Yahova, kigira ki nuvula kundivulira kaluna? Yahova, Nyasaye wa Isiraeli, ndivulira kuvitira Kumagina Matakatifu. Niiva lihiola liveeye lia Jonazani kinga iliange, undivuliri ku Urimu; navuzwa niiva lihiola liveeye lia vandu vovo Isiraeli, undivuliri kuvitira Zumimu.” Litivuli lialolekiza ndi Jonazani na Saolo; na vandu vaali vavoholorwa.

⁴² Maku Saolo yavoola, “Kalaga hagati hu muyaayi wange Jonazani niinzi”, na Jonazani yalolekizwa.

⁴³ Ahene yaho Saolo yateeva Jonazani, “Okoli ki?” Jonazani yativura, “Ndaali kulia ku vwuki nu lusaalia wa ndaali nalwo mu mukono. Mbeeye hano! Nzetegeki kukuza.”

⁴⁴ Saolo yamuvolera, “Nyasaye yanduyi nguzi niiva siuliitwa mba!”

⁴⁵ Navuzwa vandu vavoolera Saolo, “Jonazani umali koletera Isiraeli liguuta linene, anyala ndi kwitwa? Awa! Kwisuuhaa mu lieta lia Yahova oveeye mwoyo ndi Jonazani sialagotiza liisu kali lilala ku mutwi gwigwe mba. Chakoli kalunu, kekoleeywe novokonyi vwa Nyasaye.” Kunangwa avandu vaahonyia Jonazani kutura mu liitwa.

⁴⁶ Inyima wa yaga, Saolo yaleka kolondelera vandu va Filisitia, ma nivirana mu kivala chavo.

Vwamihi vwa Saolo na Vinyumba Yeeye

⁴⁷ Inyima wa Saolo yaali niyakagwa mwami wa Isiraeli, yalwana na vasigu veve havundu hoosi ku vuli lovega: avandu va Moabu, ava Amoni na Edomu, avami va Zoba kandi vandu va Filisitia. Yaali muguuti havundu hoosi ha yalwana.

⁴⁸ Yalwana nuvuluviliri ligali kandi naguuta vandu va Maleki. Yahonyia vandu va Isiraeli kutura ku makono ga yavo avaari nivingilira nukuvanuula miandu jaavo.

⁴⁹ Avayaayi va Saolo vaali Jonazani, Ishivi na Malikishua. Mukaana weve mukulundu yalangwa Merabu na umuke yalangwa Mikali.

⁵⁰ Mukali weve yaali Ahinoamu, Mukaana wa Ahimaazi: Munene wi liihi lilie yaali Abineri, muyaayi wa Neri uwaali amwavo baba wa Saolo.

⁵¹ Baba wa Saolo, Kishi na baba wa Abineri Neri vaali avayaayi va Abyeli.

⁵² Madiku goosi ga Saolo yaali mwoyo, yaali nuvulwani vululu na Vafilisitia. Kunangwa, lwa yanyoolaa musaza wizingulu anoho muluviliri yamuvugulaa ave mulala ku vasaza vi liihi lilie.