1 Samweli 13 - KITABU KITAKATIFU

Uvulwani na Vandu va Filisitia

¹ Saolo yaali ni mihiga salasini lwa yavikwa mwami, kandi yaali niyaamiihi Isiraeli ku mihiga 42.

² Saolo yatovola avasaza 3,000 kutura mu vandu va Isiraeli, vasaza 2,000 vaali harara naye ha Mikimashi kandi mu kivala chi vigulu cha Bezeli, na avasaza 1,000 vaali na Jonazani ha Gibea mu kivala chi ihiiri ya Benjamini. Saolo yatuma vasaza vandi vosi vazie yengo wavo.

³ Jonazani yita munene wi liihi lia vandu va Filisitia mu lidaala lia Geba, na vandu va Filisitia vosi vahulira inguuva yiyi. Maku Saolo yatuma avatumwa kulanga Avaheburaina vosi vazie mu vulwani ku likuba kisiriva hoosi mu kivala choosi.

⁴ Avandu va Isiraeli vosi vavolerwa ndi Saolo umali kwita munene wi liihi lia vandu va Filisitia ma kandi avandu va Filisitia vavadunyira ligali. Kunangwa vandu va Isiraeli vahulira mulango gwu kwiyunga na Saolo ha Giligali.

⁵ Avandu va Filisitia vavunga harara kulwaana Avaisiraeli; vaali na magare gu vulwani 30,000, avasaza vu kuniina ku zibarasi 6,000, na avasikari vuvulwani avanyingi kuli muyeke gwu ku lujinga lwi inyanza. Vazia Mikimashi, ivugwi wi lidaala lia Bezaveni, kandi nivalomba ho ahokososa.

⁶ Maku vingilira vandu va Isiraeli ni induta enene ligali nivavakola kuva avadedekere. Avalala ku vandu va Isiraeli viivisa mu zimbangaywa numumaliina, anoho hagati mu zinyanda, anoho m'mbogo kandi mu visima.

⁷ Avalala ku Avaisiraeli vaambuka mugera gwa Jorodani nukwingira mu kivala cha Gadi na Gileadi. Saolo yaatigara ha Giligali kandi avandu vosi avaari harara naye vaadegera nuvuti.

⁸ Yalindilira Samweli ku madiku saba, kuli Samweli yaali naamulagi akole, navuzwa Samweli yaali nakikiri kuduuka ha Giligali. Avandu vatanga kwiruka Saolo.

⁹ Kunangwa yavoola, “Ndeteri visiuviliru viu kusambwa kandi visiuviliru vie mirembe.” Yahaana kisiuviriru chu kusambwa,

¹⁰ kandi lwa yaali naamalirizaa, Samweli yaduuka. Saolo yatura kuzia kumwaganira nukumwingiriza,

¹¹ navuzwa Samweli yamuvolera, “Okoli ki?” Saolo yamutivulira, “Avandu vaali nivaanzirukaa, na ivi waali nukikiri kuuza kuli wavoola; komeeda ku agene yago, avandu va Filisitia vavunga ha Mikimashi.

¹² Kunangwa ndaaganagana ndi, ‘Avandu va Filisitia vazizaa kunzingilira ha Giligali, na singerizi ku kwenyeleriza liyaanzilira lia Yahova mba.’ Kunangwa ndoli kuduuka mbane kihanwa chukusambwa.”

¹³ Samweli yamuvolera, “Okoli kindu chu vusiru. Watia malago ga Yahova Nyasaye woovo akoheeye mba. Ulatia, yaali yakaleki ivi harara ni kisukururwi chicho ukwaamiiha ku Isiraeli mihiga ni mihiga.

¹⁴ Navuzwa kalunu uvwami vuvwo sivulazizagilira mba. Kigira siuhuliyi Yahova, alanyoola lugano lwu mundu wa yenya amukole mwamihi wa vandu veve.”

¹⁵ Samweli yatura Giligali nazizagilira nologendo lwilwe kuzia Gibea mu kivala cha Benjamini. Saolo yavaliza vandu vayaali harara naye. Vaduuka ahimbi avasaza 600.

¹⁶ Saolo, muyaayi weve Jonazani, kandi avasaza vi liihi avaari naye valomba hokososa haavo mu Geba mu kivala cha Benjamini; navuzwa avandu va Filisitia valomba hokososa haavo ha Mikimashi.

¹⁷ Avasikari vu vulwani vwa vandu va Filisitia vaatura mu hokososa haavo mu viduma vivaga kuzia kwingilira vandu va Isiraeli nukuvalaanya: Kiduma kilala chazia kolovega loheenza mu lidaala lia Ofura mu kivala cha Shuali;

¹⁸ Kiduma kindi chazia kolovega loheenza mu lidaala lia Bezi-horoni, na ikindi chazia ku lwako loheenza livona lia Zeboiimu, kolovega loheenza mu ligendanyama.

¹⁹ Sihaaliho na vatuli vi viuzi mu kivala cha Isiraeli kigira avandu va Filisitia vakora zinguru kwigalira vandu va Isiraeli kolomba vivavi na matimu.

²⁰ Avandu va Isiraeli vanigika kuzia ku vandu va Filisitia kusiagala magembe gaavo mihizu jaavo, zimbazi ziavo, na magembe gizing'ombe ziavo.

²¹ Mitungu jukusiagala imbaazi kandi ligembe lie zing'ombe nilioneki jali zisiringi 2, nu kusiagala uvwuma nu lubanga ni isiringi 1.

²² Kunangwa ku lidiku liu vulwani sihaali ho numulala ku vasikari va vandu va Isiraeli uwaali nikivavi kandi nilitimu nitali Saolo nu muyaayi weve Jonazani.

²³ Avandu va Filisitia vaatuma valala ku vasikari vu vulwani kuzia kukinga inzira ya Mikimashi.