1 Samweli 12 - KITABU KITAKATIFU

Limoloma lia Samweli ku Vandu va Isiraeli

¹ Ahene yaho, Samweli yavolera avandu vosi va Isiraeli, “Mali kokora cha mwandeeva ngole. Mali kuha munyi umwami amwamihi,

² na kalunu muveeye nu mwami kuli mwimiliri winyu. Ku lovega lwange, inzi mbeeye musakulu kandi wizimbuzi; na avana vange vaveeye harara ni munyi. Ndakava mwimiliri winyu kutura mu vwana vwange kuduuka lero.

³ Mbeeye hano. Niiva ndamala kokora kindu kidamanu choosi, munzaale kalunu imbiri wa Yahova kandi imbiri wu mwami wamali kotovola. Ni eng'ombe ya vwaha kinga ni ibunda ya vwaha ya ndavugura kuzinguru? Nivwaha wa ndaga vindu vivie, anoho wa ndadambiza? Nivwaha wa ndavugura ku viambeti nduuki kuhaana likalaga litali lirungi? Niiva ndaakola kilala ku vindu yivi, ndirana kutunga cha ndaavugura.”

⁴ Avandu vaativura, “Awa, ivi siwagaanga ku vindu vietu, anoho kukudambiza; siwaavugula kindu ku choosi kutura ku kunyi mba.”

⁵ Samweli yavavolera, “Yahova kandi mwami wamali kotovola vaveeye avaloli lidiku lia lero ndi munyi si munyooye nimbara mba.” Vativura nivavoola, “Yee, Yahova aveeye muloli wiitu.”

⁶ Samweli yaazizagilira, “Yahova niyie uwatovola Musa na Haruni, kandi watuliza avaguuga vinyu mu Egebeti.

⁷ Kalunu singiri aha muveeye, na inzi ndamuyaala imbiri wa Yahova ku limwizuliza vindu vilungi viezingulu viosi via Yahova yakola kohonyia munyi na vaguuga vinyu.

⁸ Lwa Yakobo harara na vinyumba yeye vazia Egebeti, na Avaegebeti nivavadambiza, avaguuga vinyu vanira ku Yahova vanyoore vokonyi, na yatuma Musa na Haruni, vavatuliza mu Egebeti kandi naavidikiriza mukivala yiki.

⁹ Navuzwa avandu zana vivilira Yahova Nyasaye wavo, naye yaleka avandu va Filisitia, mwami wa Moabu kandi Sisera, uwaali munene wi liihi lielidaala linene lia Hazori, kulwaana na avaguuga vinyu nukuvaguuta.

¹⁰ Ahene yaho, vanira ku Yahova avakonye nivavoora, ‘Kunyi kwayona kigira kwagirung'ana nikutula ku ivi, Yahova, kandi nikusigamira vifananyi via Baali na Asitarite. Mwaza akohonyie kutura ku vasigu viitu, na kunyi kulakusigamira!’

¹¹ Na Yahova yatuma Gidioni, Baraka, Yafeza, kandi lwu kumaliriza Samweli. Sa mulala ku kunyi yamuhonyia kutura ku vasigu vinyu kutura ku vuli lovega na munyi mwamenya mumirembe.

¹² Navuzwa lwa mwalora ndi mwami Nahashi wa Amoni aveeye ahimbi kumwingilira, mwambakana Yahova kuli mwami winyu kandi muvooleraa Inzi, ‘Kweenyaa mwami akwamihi.’

¹³ “Kalunu mwami wa mwatovora aveeye hano; niyie wa mwateeva muhevwe, na kalunu Yahova umali kumuhaana ku munyi.

¹⁴ Goosi galava malahi ni munyi niiva mulahaana luyali ku Yahova Nyasaye winyu mumutumikiri, mumuhulirize kandi muhuliri amalago geege, kandi niiva munyi harara nu mwami winyu, mulamulonda.

¹⁵ Navuzwa niiva muvura kuhuliriza Yahova nukuvula kutia malago geege hene yaho Yahova alamwikiruka munyi kandi mwami winyu.

¹⁶ Kunangwa, singiri aha muveeye yaho, kandi mulalora inguuva enene ligali ya Yahova azizaa kokora.

¹⁷ Eveeye ing'inga ye kemeyu? Navuzwa ndasaara, na Yahova aleetaa inguba ni imbura. Lwayaga gakolekaa, mulamanya ndi mwamala kokora uvwoni vonene ligali ku Yahova lwa mwamuteeva amuhe mwami.”

¹⁸ Kunangwa Samweli yasaala Yahova, kandi ku lidiku liene yilio, Yahova yaleeta inguba niimbura. Ahene yaho avandu vaatia Yahova kandi Samweli ligali

¹⁹ kandi vavoolera Samweli, “Mwaza kusaaliri ku Yahova Nyasaye woovo, kunangwa kunyi avatumikiri vovo kuvuli kukuza. Kalunu kumanyi ndi, komeeda ku vwoni vwitu vundi vwosi, kwakora uvwoni ku liteeva koheevwe mwami.”

²⁰ Kunangwa Samweli yavativulira, “Mutatia mba. Kali niiva mwakora kindu kidamanu kuli yiki, mutagirung'ana kutura ku Yahova mba, navuzwa mumutumikiri nimioyo jinyu josi.

²¹ Mutalondi avanyasaye vuvugadi mba; sivanyala kumukonya anoho kumuhonyia mba; kigira sivaveeye aviligali mba.

²² Yahova umali kulagana ligali kandi si alamuleka mba, kigira umali kukalaga akole munyi kuva vandu veve.

²³ Kolovega lwange si gandukira ngolere Yahova uvwoni ku livula kusaalira munyi. Mu vogono yivwo, ndamwigiza agaveeye malahi kandi malungi ku munyi kokora.

²⁴ Mutie Yahova kandi mumutumikiri nu vusuuvirifu ni mioyo gwinyu josi. Mwizurizi vindu vinene via yamukolera.

²⁵ Navuzwa nimuzizagilira kokora vwoni, munyi harara nu mwami winyu muladivizwa.”