1 Samweli 11 - KITABU KITAKATIFU

Saolo Yaguuta Avandu va Amoni

¹ Inyima wu mweli mulala Saolo niyakagwa umwami, Nahashi mwami wa Amoni yimilira liihi lilie kuzia kulwaana lidaala lia Yabeshi mu kivala cha Gileadi kandi naalikumbiriza. Avasaza vosi va Yabeshi vavoolera Nahashi, “Lomba lilagana ni kunyi, na kunyi kulakuvugilira kuli mwami wiitu.”

² Navuzwa Nahashi yativura, “Ndalomba lilagana ni munyi niiva muvugiliraa mbuduli emoni yu mundu woosi yu mukono mulungi nandio ndaleta zisoni ku vandu va Isiraeli vosi.”

³ Aviimiliri va Yabeshi vamuvolera, “Okohe uvwiyangu vwa madiku saba kutumi avatumwa mu kivala choosi cha Isiraeli. Niiva sihalava nu mulala ohonyia kunyi, ahene yaho kuliihaana ku ivi.”

⁴ Avatumwa vaduuka ha Gibea, aha Saolo yamenyaa, na lwa vavoola amakuva yaga, avandu vosi vatanga kulira ni vakuzi mioyo.

⁵ Saolo yaali niyazaa kutura mu mulimi ni zing'ombe ziukulima. Yateeva, “Ni ki chekoleki? Kigira ki mundu woosi aliraa?” Vamuvolera makuva ga vatumwa kutura Yabeshi vaali nivavooye.

⁶ Lwa Saolo yahulira amakuva yaga, Roho wa Nyasaye yaza kuye nizinguru zinene ligali muno; kandi uvutima vwivwe vwaka ligali kuli muliru.

⁷ Yavugula zing'ombe ziukulima ziviri, naazitemanyia mu vidonye kandi natuma vatumwa mu kivala choosi cha Isiraeli ni lieganihiza yili, “Ku vosi utalonda Saolo na Samweli mu vulwani zing'ombe ziukulima zizie zilakolerwa yaga.” Avandu va Isiraeli vaatia icha Yahova anyala kokora, kandi vosi, vugira mulala kutigala, vazaa harara.

⁸ Saolo yaavavungiza ha Bezeki; vaali ho avasaza 300,000 kutura Isiraeli, kandi avasaza 30,000 kutura Ivuyuda.

⁹ Vavoolera vatumwa kutura Yabeshi, “Vooleri avandu vinyu ndi mugamba nivukiri kuduuka mbasu hagati, valava nivasooleywi.” Lwa vandu va Yabeshi vanyoola amakuva yaga, vasangala ligali.

¹⁰ Kunangwa vaavoolera Nahashi, “Mugamba kulaaza kwihana ku ivi, na ivi unyala kokora ku kunyi choosi cha olola kuva kilahi.”

¹¹ Vudiku yivwo Saolo yagavula vasaza vukulwaana veve mu viduma vivaga; kandi mugambazuri mumavwevwe, vazia zimbiru mu hokososa ha vasigu kandi niyingilira avandu va Amoni. Kuduuka mbasu hagati vaali nivaviiti. Avaari nivahononoki, musaza sa mulala niyirukaa ku vwivwe.

¹² Maku avandu va Isiraeli vavoolera Samweli, “Vaveeye haliha vandu vavoola ndi Saolo sialava mwami wiitu? Vahane ku kunyi, na kunyi kulaviita!”

¹³ Navuzwa Saolo yavoola, “Sihaveeyeho nu mundu unyala kwitwa kalunu mba, kigira lidiku yili, Yahova umali kosoola Isiraeli.”

¹⁴ Kandi Samweli yavavolera, “Gendi kwosi kwirane Giligali lwa kaviri kulandizi mwami Saolo kuli mwami wiitu.”

¹⁵ Kunangwa avandu vosi vazia Giligali, na uwene yeyo havundu Hatakatifu zana, valandiza Saolo kuva mwami. Vaahana visiuviliru vie mirembe imbiri wa Yahova kandi Saolo harara na vandu vosi va Isiraeli vasaangala ligali.