1 Samweli 10 - KITABU KITAKATIFU

¹ Ahene yaho Samweli yavugula ijuba ya maguta ga muzeituni naazuka ku mutwi gwa Saolo kandi naamuvusa, kandi navoora, “Yahova akuvakaa maguta kuli mwamihi wa vandu veve Isiraeli. Ulamiha vandu veve na uvakingi kutura ku vasigu vaavo. Na yiki kilava kimanyiru ku ivi ndi Yahova umali kokotovolo kuva mwami wa vandu veve.

² Lwa kwavukana kalunu, ulagaana na vasaza vaviri ahimbi ni kilindwa cha Raheli ha Zeliza, mu kivala cha Benjamini. Valakovolera ndi zibunda zia weenyangi zimali konyoleka, kunangwa baba woovo siazihenderaa mwoyo kandi mba, navuzwa ivi; kandi nazizagilira koteeva, ‘Ngola ki ku muyaayi wange?’

³ Ulazizagilira kutura ahene yaho kuduuka lwa uzaa ku musaala mutakatifu ha Taba, aha nuwaagane na vasaza vavaga nivaziizaa kuhaana vihaanwa viavo ku Nyasaye ha Bezeli mulala kuvo naave niyimiliyi vimeme vivaga vie zimburi, na wundi nagingi migadi jivaga na wakavaga naave naveeye niimuuya ye kesero ni yizuuyi iwaini.

⁴ Valakucheliza na vakohe migadi giviri ku migadi zana; na ivi ulajivugilira kutura kuvo.

⁵ Ahene yaho ulazia ku kiguru cha Nyasaye mu Gibea, wa vandu va Filisitia vasoosa. Ha vwingiliru vwi lidaala, ulavugaana nu muganda gwa vaporofeti nivasulunguta kutura ku vwali ku kiguru, nivakubaa uvukana, zindumba, amarere na madungu. Valava nivavinaa kandi nivaporofetaa.

⁶ Nonoho Roho wa Yahova alaza ku ivi ni zinguru, na ivi ulaporofeta harara navo, kandi ulagirung'anywa kugwa umundu wu lugano lundi.

⁷ Lwi vilolekizu yivi vikoleka, okole choosi cha Nyasaye akwimilira okole.

⁸ Ulimila imbiri wange kuzia mu lidaala lia Giligali, uwa na kwaganili yo niivi, kandi nduuki kuhaana vihaanwa viukusambwa kandi vie mirembe ulalinda yo ku madiku saba kuduuka lwa nziza ku ivi kandi na ngovolere cha okola.”

⁹ Lwa Saolo yagirung'ana atuli ku Samweli, Nyasaye yaaha Saolo liiva lihia. Kandi vindu viosi via Samweli yamuvolera viekoleka lidiku yilio.

¹⁰ Lwa Saolo nu mutumikiri weve vaduuka ha Gibea, muganda gwa avaporofeti gwagaana naye. Nonoho Roho wa Nyasaye yaza kuye nizinguru, kandi yahambana navo mu liporofeta liavo.

¹¹ Lwa vandu vaali nivamanya Saolo ku maziambiri, vamulola kuli yaporofetaa navaporofeti vateevana, “Ni ki chekoleki ku muyaayi wa Kishi? Saolo aveeye mulala ku muporofeti?”

¹² Mundu mulala wamenyanga yo, yateeva, “Na avaporofeti vandi yava vaveeye ndi, uganaganaa avababa vaavo ni vanga vwaha?” Nindio livoora yili liatanga, “Saolo aveeye mulala ku muporofeti?”

¹³ Lwa Saolo yamala liporofeta lilie yazia ku vwali ku kiguru.

¹⁴ Lwa mwavo baba wa Saolo yamulola numutumikiri weve, yamuteeva, “Muturaa hayi?” Saolo yativura, “Kwenya zibunda. Lwa kwavula kuzinyoola, kwazia kolola Samweli.”

¹⁵ Amwavo baba wa Saolo yamuteeva, “Naye akovooleeye ki?”

¹⁶ Saolo yativura, “Akovooleeye ndi zibunda zinyoleki.” Navuzwa Saolo siyamuvolera aga Samweli yaali namuvooleye ku liigwa mwami lilie mba.

Saolo akolangwa kuva mwami

¹⁷ Samweli yalanga vandu vosi vavugane harara imbiri wa Yahova ha Mizipa

¹⁸ navavoolera, “Yahova, Nyasaye wa Isiraeli avoora, ‘Ndaamutuliza mu kivala cha Egebeti kandi nimuhonyia kutura ku vandu va Egebeti kandi ku vandu vandi vosi avaari nivamudambizaa.

¹⁹ Inzi mbeeye Nyasaye winyu, umuhonyiaa kutura mu kivi chienyu kandi mu vudinyu vwinyu vwosi, navuzwa kalunu, mumali kunyambakana kandi muteevi inzi muhe mwami. Vulahi ligali; kunangwa, mwivungize imbiri wa Yahova kolondekana ku zihiiri zienyu kandi ku miliango jinyu.’ ”

²⁰ Maku Samweli yalaga vuli ihiiri ya Isiraeli vaze imbiri, na Yahova yatovola ihiiri ya Benjamini.

²¹ Kandi Samweli yaleeta avizinyumba zia ihiiri ya Benjamini kuuza imbiri wa Yahova, na Yahova yatovola avinyumba ya matiri. Kandi avasaza vi inyumba ya Matiri vaza imbiri wa Yahova, na Saolo muyaayi wa Kishi yatovolwa. Vaamwenya navuzwa lwa vavura kumunyoola,

²² vateva Yahova, “Mundu wundi akakiri yo naho?” Yahova yativura, “Saolo ngula, yiivisi inyima wi misigo.”

²³ Kunangwa vanyagura nivaleeta Saolo ku vandu. Lwa yasingira hagati ha vandu valora ndi aveeye mutambi ligali kuvita mundu wundi woosi.

²⁴ Samweli yavolera vandu yavo, “Uyu niyie musaza wa Yahova atovooye! Sihaveeye ho nu wundi hagati hiitu oveeye kuli uyu mba.” Avandu vosi vahaanzuka nu mwoyo munene nivavoora, “Mwami ahindiri!”

²⁵ Samweli yiivalira avandu vosi agadukanaa vakolere mwami kandi miyinzi ju mwami adukanaa avakolere; ma kandi naagang'oda mu kitabu, icha yavika mu havundu hatakatifu. Maku Samweli yaasindukiza vandu, sa mulala kuzia yengo weve.

²⁶ Saolo yirana yengo weve mu lidaala lia Gibea. Avasaza valala vizingulu, ava Nyasaye yaali nadiiyi mioyo jaavo, vazia naye.

²⁷ Navuzwa vandu valala avikivihiri vavoola, “Mundu uyu anyala kokokolera malahi ki?” Vachaaya Saolo kandi si vamuleetera ku kihanwa choosi mba. Navuzwa Saolo yakiring'ana.