1 Samweli 1 - KITABU KITAKATIFU

Elikana na vinyumba yeeye ha Shilo

¹ Haali ho nu mundu mulala uwalangwa Elikana, kutura mu ihiiri ya Efuraimu, wamenyaa mu lidaala lia Rama mu kivala chi vigulu cha Efuraimu. Yaali muyaayi wa Jerohamu kandi mwisukulu wa Elihu, kisukururwi cha Tohu, na kesoni cha Zufu.

² Elikana yaali navakari vaviri, Haana na Penina. Penina yaali na avana, navuzwa Hana siyaali navo mba.

³ Vuli muhiga Elikana yaturaa Rama kuzia kusigamira Yahova Wuvunyali nukuhaana visiuviliru kuye ha Shilo, ha Hofini na Finiasi, avayaayi vaviri va Eli, vaali avasaalisi va Yahova.

⁴ Vuli ing'inga ya Elikana yahaana kisiuviriru chiche, yahaana kedonye kilala chi inyama ku Penina kandi kedonye kindi ku sa mulala ku avana veve.

⁵ Na kali niiva yaali niyayaanza Hana ligali, yamuheza vuzwa kedonye kilala kigira Yahova yaali niyavoha inda yeeye avuli kwivura.

⁶ Penina muhalikwa weve yaali anyala kumudambiza nukumuleganyia ligali muno kigira Yahova yaali niyavoha inda yeeye avuli kwivura.

⁷ Makuva yaga gazizagilira vuli muhiga. Vuli ing'inga ya vaziza munyumba ya Yahova, Penina yaleganyiaa Hana ligali, kuduuka atiguka maliga kandi asuraa kulia kindu choosi.

⁸ Musaza weve Elikana yaali anyala kumuteeva, “Hana, kigira ki uliraa? Kigira ki utaliizaa? Kigira ki overeraa kazozo? Inzi simbeeye mulahi ku ivi kuvita avayaayi likomi?”

Hana na Eli

⁹ Lidiku lilala lwa vaali nivakamara lilia ni linwa liavo munyumba ya Yahova, ha Shilo, Hana yasingira. Musaalisi Eli yaali niyikaye ku endeve ahimbi nililiva lie kiliango chi Litembeli lia Yahova.

¹⁰ Hana yaali novovereri vululu ligali muno, na yasaala nuvuzunu ligali ku Yahova.

¹¹ Hana yalagana na Nyasaye navoora, “O, YAHOVA WANYALA VIOSI, henza ku inzi mutumikiri woovo! Lola vudinyu vwange na unzizulizi! Utanzivilira mba! Numba mwana muyaayi, inzi suuvirizaa ndi ndamuhaana ku ivi, Yahova, mu livamwoyo lilie liosi na sialivega liisu lilie.”

¹² Hana yaazizagilira kusaala ku Yahova ku ing'inga indambi, na Eli yahenza munwa jije.

¹³ Yaasaalaa mmwoyo, namwemwendaa navuzwa siyativula kindu mba kunangwa Eli yaganagana ndi aveeye muhambiku,

¹⁴ kandi yamuvolera, ulahambika kuduuka ng'inga ki? Lekera uvuhambiki vuvwo.

¹⁵ Hana yamutivulira, “Awa; Simbambiki mba, mwami wange, sinweyange iwaini mba. Mbeeye nekehenda mwoyo kenene ligali. Ndakusaalaa, nimbika vudinyu vwu mwoyo gwange ku Yahova.

¹⁶ Utaganagana ndi inzi mbeeye mukali mudamanu utali nuvukara mba. Ndakusaalaa kuli ndi kigira mbeeye nuvuzunu kandi ovovereri vonene ligali.”

¹⁷ Eli yamuvolera, “Zia ni mirembe; na Nyasaye wa Isiraeli akohe cha umali kumusaala.”

¹⁸ Naye Hana yamutivulira, “Leka mukali woovo anyoore livugilirwa mu zimoni zizio” kunangwa yazia, nalia viukulia. Mumoni mwimwe simwali novovereri kandi mba.

Liivulwa ni livikwa ku makono lia Samweli

¹⁹ Mugambazuri lidiku lialonda ku, Elikana harara na vinyumba yeeye vavuuka mu mavwevwe, kandi inyima wukusigamira Yahova, virana yengo wavo ha Rama. Elikana yaali harara numukali weve Hana na Yahova yamutivulira lisaala lilie.

²⁰ Na gaali ndio, yavereka kandi yivula mwana muyaayi. Yamugulika Samweli, kandi niyiivaala, “Ndateeva Yahova yambe mwana uyu.”

²¹ Ing'inga yaduuka kandi ku Elikana harara na vinyumba yeeye kuzia Shilo kuhaana ku Yahova kisiuviriru cha vuli muhiga kandi kisiuviriru kidukiru cha yaali niyalagana kuhaana.

²² Navuzwa ing'inga yiyi Hana siyaazia yo mba. Yavolera musaza weve “Lwu mwana uyu alekela kunuuna, ndamuhila munyumba ya Nyasaye, uwa alimenya madiku geege goosi.”

²³ Elikana yamutivulira, “Vulahi, kola choosi cha uganagana kuva kilahi ligali. Ove hango kuduuka lwa umulekiza kunuuna. Kandi Nyasaye akole lilagana liilio kuye liduukizwe.” Kunangwa Hana yamenya hango naanyuunyia mwana weve.

²⁴ Lwu mwana yaleka linuna, yamuhira Shilo, navugura harara naye igiriki yi mihiga jivaga, zikilo likomi ziuvusie, imuuya yekeseero niyizuuyi iwaini. Yavugula Samweli nakikiri mudoto kuli ndio, kuduuka munyumba ya Yahova ha Shilo.

²⁵ Lwa vaali nivakiita igiriki, vahiraa mwana ku Eli.

²⁶ Hana yavolera Eli, “Mbeera zimbavasi, mwami. Ukanzizulizaa naho? Inzi mbeeye mukali wa walola nasingiyi hano, nisaalaa ku Yahova.

²⁷ Ndasaara mbeevwe umwana uyu, na Yahova umali kumba cha ndamuteva.

²⁸ Kunangwa kalunu muhaanaa ku Yahova. Alava mutumikiri wa Yahova madiku geege goosi.” Kunangwa, vaasigamira Yahova ahene yaho.