1 Petro 5 - KITABU KITAKATIFU

¹ Inzi, oveeye mukulundu wache, mbolera avakulundu vi livugana avaveeye hagati hinyu. Inzi mbeeye umuloli wuvusaliri vwa Kristo, kandi mbeeye umusangi wu vukumi vuliloleka.

² Mugoonyaa ligali, mwaaye ichayo cha Nyasaye yamuha kulinda kandi mukindu nu vwihaani. Gatava ku linigwa, navuzwa ku mwoyo gwu vuyanzi kuli uvulariri vwa Nyasaye; Gatava kigira linyola mitungu, navuzwa mukore nu mwoyo gwu vwihaani.

³ Mutagerizi kwamiiha kandi gatava kuli mwekora avanene vamulinda mba, navuzwa muve kelolero chi ichayo.

⁴ Mwayi mwene aliloleka, mulakanyoole itaji yu vukumi ilivula kogotiza vwaku vwayo.

Ku avang'erere

⁵ Kali munyi avasaza vang'erere gamuduukira mwegehizi ku vakulundu vinyu. Kandi munyi mwosi mwegehizi, muduuki kutumikirana aveene na aveene; Mang'oda Matakatifu gavoora, “Nyasaye ahingiraa navuzwa ayanziliraa vegehizi.”

⁶ Mwegehizi hasi hu vunyali vwa Nyasaye, naye alamunenehiza mu ing'inga yeeye indahi iduuka.

⁷ Muviiki lihenda mwoyo lienyu liosi ku Nyasaye kigira amulindaa.

⁸ Muve no vogeri, kandi mwetegeke ma mulindi! Umusigu winyu, Setani, avodong'anaa kuli king'ang'a kifuumaa, ni yenya umundu wanyala kumira.

⁹ Musingiri nu vuluviliri mu lisuuvira lienyu kandi mumwigaliri kigira mumanya Avakristayo vandi mu kivala choosi vavitira mu vusaliri vulala vwere kuli munyi.

¹⁰ Navuzwa ni mwakasalira hakekeke, Nyasaye wi zimbavasi ziosi, uwalanga munyi kusanga mu vukumi vwivwe vwi mihiga ni mihiga mu Kristo, alamukola muve vaduukiru kandi alamudinyiriza nu kumuviika zinguru kandi ku musingi mudinyu.

¹¹ Zive kuye mihiga ni mihiga! Amini.

Mirembe ju kumaliriza

¹² Ng'oderaa munyi ibarwa yiyi, Silivano naveeye umukonyeleri wange uwa inzi ndolaa kuva kuli amiitu oveeye umusuuvirifu mu Kristo. Nyenya kudinyiriza munyi nu kwizominya ndi yizi ni zimbavasi zia agiligali zia Nyasaye. Musingiri vudinyu mu zimbavasi yizi.

¹³ Livugana lindi lienyu liveeye mu Babiloni kandi iliatovolwa na Nyasaye, limutumilaa mirembe harara na Mariko umuyaayi wange.

¹⁴ Muchelizane ni livuusana liu vuyanzi vwu Vukristayo. Mirembe jive ku munyi vosi avaveeye va Kristo. Amini.