1 Petro 4 - KITABU KITAKATIFU

¹ Kigira Kristo yasaalira mu muviri, munyi kandi mwidinyirizi kwivika mu liiva liukuva kuli ndio; kigira uyu wasalirizwa mu muviri umali kolekana nu uvwoni.

² Kutura kalunu, mutazizagilira komenya mu likaayirwa lia vandu mba navuzwa mu vulaliri vwa Nyasaye.

³ Mwamenya ing'inga indambi mu madiku gaavita nimwagotera mu likora aga avi kivala vayaanza kokora. Ilimenya lienyu liali lie miima midamanu, liegomba lidamanu, uvuhambiki, ilisieva, uvuhambiki vwu mu viduma, ni lisigamira liu kuvihiliriza lie vifananyi.

⁴ Vaveeye ni ligenya kalunu kolola simuhambana navo mu limenya lidamanu kandi lie kivihiri mba, maku vatanga limunyega.

⁵ Navuzwa valakivaale ku Nyasaye aga vaakora. Nyasaye wetegeki kukalagira avaveeye mwoyo kandi avakuza.

⁶ Yiki nicho ichagira Ivangeri niyilwaazwa kali ku vaakuza, kuli mundu woosi akalagirwa. Vilwazirwa kunangwa vuduuki komenya livamwoyo liu mu Roho kuli Nyasaye amenyaa.

Avatumwa avalahi ve vihaanwa via Nyasaye

⁷ Keheri chi vindu viosi keveeye ahimbi. Kuduuka kandi mwilinda kandi, mwetegeke kunangwa munyalizi kusaala.

⁸ Kuvita vindu viosi muyaanzane ligali aveene naveene, kigira uvuyanzi vukunikaa uvwoni uvunyingi.

⁹ Mugenihizane aveene naveene vugira kwigana.

¹⁰ Vuli mundu, kuli umulindi mulahi wi vihaanwa via Nyasaye lugano lugano, kuduuka atumikiri ikihaanwa chiche ekenene yiki kulwo kugasiza avandi, ni kihanwa kilahi yiki chamali konyoora kutura ku Nyasaye.

¹¹ Mundu woosi naava niyilwaza, gamudukira yilwaaze likuva lia Nyasaye amali kumuha; uyu utumikaa, atumiki mu zinguru zia Nyasaye amuhezaa. Kunangwa mu vindu viosi, Nyasaye aduuki kwizominyirwa kuvitira mu Yeso Kristo, udukana anyoore uvukumi kandi zinguru mihiga ni mihiga. Amini.

Lisalirizwa kuli Mukristayo

¹² Avalina avayaanze vange, mutagenya ku ligerizwa lilulu lia musaliranga kuvikwa mu muliru, kuli keveeye ikindu ekegeni chekoleka ku munyi mba.

¹³ Nitali musangare kulwo kuva avasangi mu vusaliri vwa Kristo kunangwa muduuki kwizura uvusangari kuvita kegero, lwu uvukumi vwivwe vu liloreka.

¹⁴ Musangare lwa munyegwa kigira muveeye avalondi va Kristo; yili limanyia Roho wu vukumi kandi Roho wa Nyasaye asoseraa mu munyi.

¹⁵ Niiva mulala ku munyi alasalirizwa, atasalirizwa kigira aveeye umwiti, umwivi, muvudamanu, anoho mwingilirwa amakuva ga vandu vandi mba.

¹⁶ Navuzwa, niiva ulasalirizwa kigira oveeye Mukristayo, utava soni mba, nitali wizominyi Nyasaye kigira waginga ilieta lia Kristo.

¹⁷ Ing'inga yi likalaga imali kuduuka na avandu va Nyasaye valava vukutanga kukalagirwa. Niiva kunyi kulava avukutanga kukalagirwa, galiva ndi ku yavo avatasuuvira Ivangeri ya Nyasaye?

¹⁸ Mang'oda gavoora, “Niiva voveeye vudinyu ku vandu valahi kohonywa; galiva ki ku yavo avoni, avatamanyi Nyasaye?”

¹⁹ Yavo avasaaliraa kigira uvulariri vwa Nyasaye, gavadukiraa vihaane ku mulombi wavo musuuvirifu kandi vazizagiliri kokora vulahi.