1 Petro 2 - KITABU KITAKATIFU

¹ Kunangwa, mwerehe ku vudamanu vwosi; ovovehi uvugadi, embodoka kandi amanyego.

² Muve kuli avana vadoto vuli ing'inga vaveeye nuvuluhu kwenya amaveere malahi gu mu Roho, kunangwa lwa muganwezaa, muduuki kuviruka no kohonywa.

³ Munyi mumali kumanya kuli Mwami aveeye nizimbavasi.

⁴ Hambi ku Mwami, oveeye ligina limenya ilia vandu vambakana ligali, navuzwa mu zimoni zia Nyasaye yatovola kuva lio vokonyi kandi liu vuguli.

⁵ Munyi muveeye, kuli amagina ga veeye mwoyo, agumbakiywi kuva Litembeli Litakatifu, kuva avasaalisi vatakatifu, avahaana ivihaanwa via Roho, ivivugilirwa imbiri wa Nyasaye mu Yeso Kristo.

⁶ Mang'oda Matakatifu gavoora, “Henza, ndatovora ligina linene liuvuguli vonene, ilia mbikaa kuli ligina liu mukoona mu Ziyoni; kandi mundu woosi usuviraa mu ligina yilio, sialaduuka mu zisoni mba.”

⁷ Ligina yili liveeye liu vuguli vonene ligali ku vandu avasuuviraa; navuzwa yavo avatasuuvira, “Ligina zana liavumbaki vasuura, kuli ilitaveeye novokoonyi, ligirung'ani kugwa ligina lie kivuni kenene ku goosi.”

⁸ Mang'oda Matakatifu gavoora, “Yili nilio ligina liu kwikigitariza avandu, ulwanda ululivalomba vagwi.” Vikigitara kigira sivasuuvira mu likuva yivwo vwali uvulariri vwa Nyasaye kuvo.

⁹ Navuzwa munyi muveeye ihiiri etovoleywi, avasaalisi vu Mwami, avandu avatakatifu, avandu va Nyasaye mwene, yavo avatovolwa valandizi uvulahi vwa Nyasaye, uyu wamulanga munyi muturi mu kisundi muduuki mu vulavu vwivwe vwokogenyia.

¹⁰ Lwimbiri munyi simwali avandu va Nyasaye, navuzwa kalunu muveeye avandu veve; lwimbiri simwamanya zimbavasi zizie, navuzwa kalunu mwamala konyoora zimbavasi zizie.

Avatugwa va Nyasaye

¹¹ Avalina vange avayaanze, ng'oonya munyi kuli avageni kandi avamenya mu kivala yiki, mwiyahuli ku likayirwa liu muviri, ilihing'anaa nu mwoyo vuli Iwosi.

¹² Ligenda lienyu live lilahi ligali hagati ha vandu vatamanyi Nyasaye kunangwa kali lwa vamuginaa kuli muveeye avadamanu, gave kuvo aveene, navuzwa kigira ivikolwa vienyu vilahi via valora, vaduuki kwizominya Nyasaye ku lidiku lia aliiza.

Liegehiza ku avamihi

¹³ Mwegehizi ku malago goosi ga avandu kigira Mwamihi. Mwegehizi kali ku yavo avamiiha mu kivala.

¹⁴ Mwegehizi kandi ku vamiihi avatovolwa nu Mwami kuhaana amageri ku yavo avakolaa uvudamanu, kandi mwizominye yavo avakolaa uvulahi.

¹⁵ Uvulariri vwa Nyasaye voveeye ku likora vulahi muduuki kukiring'anyia limoloma lia vandu avasiru.

¹⁶ Mumenye kuli avandu vaveeye avavoholore navuzwa muvuli kutumikira ovovoholore vwinyu kuvisa vudamanu. Navuzwa mumenye kuli avatugwa va Nyasaye.

¹⁷ Muhaane uluyali ku vandu vosi; muyanze avaamitu avasuuviraa; muhaane luyali ku Nyasaye, kandi mutie mwamihi munene wamihaa ikivala.

Vusaliri vwa Kristo

¹⁸ Munyi vatumikiri mwegehiziri avanene vinyu, nu luyali Iwosi, sigaveeye ku avalahi venyine mba, navuzwa kandi ku avalulu.

¹⁹ Nyasaye alamugasiza kigira yaga niiva mulikuzira ku vusaliri vutaveeye vwu vulungi kigira mioyo jaavo jiveeye ku vulaliri vwa Nyasaye.

²⁰ Mulava ni lizominywa ki niiva mulikuzira ilikuywa lidukanaa munyore kigira likora vudamanu? Navuzwa niiva mulikuzira mu vusaliri, kali nimumalikokola vulungi, Nyasaye alamugasiza.

²¹ Nyasaye yamulanga kigira Kristo yasaalira kigira munyi, naamulekera chokohenzera kunangwa muduuki kolonda zinduvatiru zizie.

²² Siyakola uvwoni, kandi siyanyooleka nu vugadi kutura mu munwa gwigwe mba.

²³ Lwa vamunyega, siyavanyega mba; ing'inga ya yaasalirizwa, siyavatiihiza mba, navuzwa yavika lisuuvira lilie ku Nyasaye, oveeye mukalagi wu vulungi.

²⁴ Mwene yaginga uvwoni vwitu mu muviri gwigwe ku musalaba, kunyi kuduuki kukuza ku uvwoni, kandi kove mwoyo ku vulungi. Kigira zingwagu zizie, munyi mwahonywa.

²⁵ Mwali ni mwagota kuli amagondi, navuzwa kalunu mumali kwilanywa muduuki kolonda umwayi oveeye umulindi wi mioyo jinyu.