1 Petro 1 - KITABU KITAKATIFU

¹ Inzi Petero, mutumwa wa Yeso Kristo; ng'oderaa munyi avatovole va Nyasaye, avaasalana, avamenyaa muvivala vio vogeni via Ponto, Galatia, Kapadokia, Asia, numu Bizinia.

² Mwatovolwa kolondekana kulienya lia Nyasaye Baba, kandi ni mutakaswa na Roho weve kutia Yeso Kristo kandi nimwogizwa na masahi geege. Zimbavasi ni mirembe vive ku munyi ligali.

Ilisuuvirizwa liveeye mwoyo

³ Yizominywi Nyasaye Baba wu Mwami wiitu Yeso Kristo! Kigira mu zimbavasi zizie zinene, yakuha livamwoyo lihia lwa yasimugukiza Yeso Kristo kutura mu likuza. Yaga goosi gakoheezaa lisuuvirizwa liveeye mwoyo,

⁴ na ndio kulindiliraa konyoora uvutugi vwu vugasu vwa Nyasaye aviikiraa avandu veve. Aviikiraa munyi uvugasu vwene yivu mwigulu, havutanyala kuguunda, kwoneka anoho kogota.

⁵ Vugasu yivu voveeye ku munyi, avakingwa ni zinguru zia Nyasaye kuvitira mu lisuuvira kigira vohonyi vwetekekiziywi kololekizwa mu ing'inga ye keheri.

⁶ Musangare ligali mu yaga, kali niiva gamudukira muve niliverera kigira magerizu manyingi aga munyoora

⁷ Kivuni cha magerizu yaga kimanyia ndi lisuuvira liange liveeye lia giligali kali izahabu inyala kusambwa mu muliru; kandi ndio lisuuvira lienyu liveeye lilahi ligali kuvita izahabu, ligerizwa kunangwa liduuki kuhindira. Maku mulakanyoole lizominywa, vukumi kandi luyali ku lidiku lia Yeso Kristo aliloleka.

⁸ Munyi mumuyanzaa kali niiva simwamulola, kandi musuuviraa muye, kali niiva simumulolaa kalunu mba. Kunangwa musangare nu vusangali ovonene uvutanyala kovoolwa mu makuva vuzwa,

⁹ kigira munyoora ovohonyi vwi mioyo jinyu; Yiki nicho ekeveeye kivuni kenene chi lisuuvira lienyu muye.

¹⁰ Gaali kigira govohonyi yivu, avaporofeti vaateveleriza ligali, kandi nivenyereriza vamanye kandi ni vaporofeta kigira ikihaanwa yiki icha Nyasaye alimuha.

¹¹ Vageriza kwenya kumanyiriza ni ing'inga ki, kandi ni liiva lia lugano ki lwa Roho wa Kristo alilolekiza uvusaliri vulinyoola Kristo nu vukumi vuliva ho inyima wa yaga.

¹² Nyasaye yavulira avaporofeti yava ndi, miyinzi jaavo sijali kigira madanyi gaavo aveene mba, navuzwa kigira munyi, kandi kuli mwahulira vatumwa avamwilwazira Makuva Malahi mu zinguru zia Roho Mutakatifu uwatumwa kutura mwigulu. Ivindu yivi nivio vie zingelosi venyeleriza nu vuha kuvimanya.

Muve Vatakatifu

¹³ Kunangwa mwetegeke mu zing'anagani zienyu ku vikolwa mwilindi vulahi; kandi muviiki lisuuvira lienyu ku zimbavasi zia muliheevwa ulwa Yeso Kristo aliloleka.

¹⁴ Kuli avana vahuliri, mutavugilira likayirwa lienyu lidamanu lia mwali nalio ing'inga ya mwamenyaa mu vusiru mba.

¹⁵ Nitali kuli Nyasaye wamulanga aveeye mutakatifu, kandi munyi muve avatakatifu ndio mu liiva liosi.

¹⁶ Mang'oda matakatifu gavoora, “Muve avatakatifu kigira inzi mbeeye mutakatifu.”

¹⁷ Munyi mumulangaa Baba, lwa musaala ku Nyasaye, oyo ukalagiraa avandu vosi, kolondekana ku ne kegero kilala. Kunangwa mumenye mu lirova linu ni muhaanaa uluyali ku Nyasaye.

¹⁸ Mwamanya vulahi chatungwa kumuvoholora kutura mu limenya lia vuzwa, liatura ku vaguuga vinyu. Sichali kindu kinyala kwononywa kuli ifeza ni zahabu mba.

¹⁹ Gaali masahi guvuguli ga Kristo, agaveeye kuli gu mwana wi ligondi utaveeye nimbala anoho ikindu kidamanu.

²⁰ Yatovolwa na Nyasaye ing'inga yi lirova liali ni likikiri kolombwa kandi yalolekizwa mu madiku gukumaliriza yaga kigira munyi.

²¹ Kuvitira muye, munyi musuuviraa Nyasaye wasimugukiza Yeso kutura mu likuza, nu kumuha uvukumi. Kulwayago lisuuvira lienyu ni lisuuvirizwa lienyu viveeye ku Nyasaye.

²² Kigira kalunu ku lihulira ni liitia lienyu ku agiligali, mumali kwitakasa kandi mumali kuuza kuva nu vuyanzi vwiligali ku vandu avasuuviraa vache vinyu, muyaanzane aveene naveene ligali nimioyo jiinyu josi.

²³ Kuvitira mu likuva lia Nyasaye iliveeye mwoyo kandi ilihindiraa mihiga ni mihiga, munyi mumali kwivulwa kaviri kuli avana vu mwivuli utakuzaa.

²⁴ Mang'oda Matakatifu gavoora, “Avandu vosi vaveeye kuli uvunyasi, kandi uvukumi vwavo voveeye kuli kimuli. Vunyasi vwuma, kandi kimuli chavwo kivungulukaa

²⁵ navuzwa likuva lia Nyasaye lihindiraa mihiga ni mihiga.” Likuva yili liveeye Makuva Malahi ya mwilwazirwa.