1 Kyetsinyinga 9 - KITABU KITAKATIFU

Avandu virana kutura mu vuhambe mu Babiloni

¹ Vandu va Isiraeli vosi vang'odwa kolondekana ku zinyumba ziavo, na amakuva gaavo gang'odwa mu Kitabu cha Vami va Isiraeli. Avandu vi Ivuyuda vaali ni vahaminyiywi kuzia Babiloni mu kivala chu vuhambe, kuli amageri kigira uvwoni vwavo.

² Navuzwa avandu vaali vu kutanga kwirana komenya mu madaala gi miandu jiavo vaali: Visiraeli, Vasaalisi, ihiiri ya Levi na avatumiki vi Litembeli.

³ Na avandu valala vi Ivuyuda, Benjamini, Efuraimu na Manase vamenya mu Jerusalemi.

⁴ Uzai yaali muyaayi wa Amihudi, na umwisukulu wa Omuri. Avaguuga veve vandi vaali Imuri, na Bani. Kandi Perezi muyaayi wa Yuda.

⁵ Visukululwi via Shela viali nu mwimiliri wavo kuli Asaya.

⁶ Visukululwi via Zera viali na Jeweli na viko vaavo. Vosi vaali avandu 690.

⁷ Na vi hiiri ya Benjamini, vaali Salu muyaayi wa Meshilamu, muyaayi wa Hodavia, muyaayi wa Hasenua,

⁸ Ibineya muyaayi wa Jerohamu, Ela muyaayi wa Uzi, muyaayi wa Mikiri na Meshulami muyaayi wa Shefatia, muyaayi wa Reweli, muyaayi wa Ibinija;

⁹ vosi vaali avandu 956 vi zinyumba zie ihiiri ya Benjamini avamenya mu Jerusalemi. Yava vosi vaali aviimiliri vi zinyumba zia vaguuga vaavo.

Vasaalisi vamenya mu Jerusalemi

¹⁰ Yava ni vasaalisi vamenya mu Jerusalemi: Jedaya, Jehoaribu, Jakini,

¹¹ na Azaria muyaayi wa Hiliki, muyaayi wa Meshulami, muyaayi wa Zadoku, muyaayi wa Merayozi, muyaayi wa Ahitubu, munene wi Litembeli lia Nyasaye,

¹² na Adaya muyaayi wa Jerohamu, muyaayi wa Pashuri, muyaayi wa Malikija na Maasai muyaayi wa Adieli, muyaayi wa Jahizera, muyaayi wa Meshulami, muyaayi wa Meshilemizu, muyaayi wa Imeri.

¹³ Vosi vaali avasaalisi 1,760. Vaali avandu vu vugeri avaakoraa miyinzi mu Litembeli lia Nyasaye.

Ihiiri ya Levi vamenya mu Jerusalemi

¹⁴ Yava nivo vi hiiri ya Levi avamenyaa mu Jerusalemi: Shemaya muyaayi wa Hasishubu, muyaayi wa Azirikamu muyaayi wa Hashabia, uwaali wi inyumba ya Merari.

¹⁵ Bakabakari, Hereshi, Galali na Matania, muyaayi wa Mika waali muyaayi wa Zikiri na Asafu;

¹⁶ na Obadia muyaayi wa Shemaya, muyaayi wa Galali, muyaayi wa Zeduzuni, na Berekia muyaayi wa Asa, muyaayi wa Elikana, uwamenyaa mu tudaala twa Netofazi.

Valindi vi virivwa vie Litembeli avamenyaa mu Jerusalemi

¹⁷ Yava nivo avaari valindi vi virivwa vie Litembeli avamenyaa mu Jerusalemi: Shalumu, Akubu, Talimoni, Ahimani harara na avamwavo vaavo. Shalumu yaali munene wavo.

¹⁸ Kutura ing'inga yene yeyo avandu vi zihiiri ziavo vaviikwa mu vwingiliru vwi Ivugwi vwi kirivwa chu mwami. Yava nivo avaari avalindi vi Kirivwa cha hokososa ha vandu va Levi.

¹⁹ Shalumu, muyaayi wa Kore na umwisukulu wa Ebiasafu, harara na avandu veve vi ihiiri ya Kora, yaali nu vunyali vwu kulinda vwingiliru vwi Lihema lia Yahova, kuli avaguuga vaavo vaali avasingiliri vo hokososa ha Yahova.

²⁰ Finiasi muyaayi wa Elieza yamiha kuvo ing'inga yavita; Yahova ave harara naye!

²¹ Zakaria muyaayi wa Meshelemia yaali kandi mulindi ha vwingiliru vwi Lihema lia Yahova.

²² Yava vosi avatovolwa kuli avalindi ha vwingiliru nu mu virivwa, vaali avandu 212. Vaang'odwa kolondekana na amadara ga vamenya mu. Yaali mwami Daudi nu muporofeti Samweli avaviika avaguuga vaavo mu miyinzi ji lisuuvirizwa yili.

²³ Vandu yava harara ni visukululwi vaavo vazizagilira kulinda virivwa vie Litembeli lia Yahova.

²⁴ Vaali ho avalindi vi virivwa ku zimbega zine: Ivugwi, Imadioli, Ivaale na Isavaalu. Vuli lovega lwali nu mulindi munene.

²⁵ Valindi yava, vakora miyinzi jiavo, na vakonywa na aviiko vaavo, avamenyaa mu tudaala na vaakora miyinzi jaavo ju vulindi ha virivwa ku ing'inga ya madiku saba.

²⁶ Valindi vanene vane vaali kutura mu ihiiri ya Levi na vaali nu vunyali vwu kumaliriza. Vasingilira zinyumba ni miandu jaali mu Litembeli lia Yahova.

²⁷ Vamenya ahimbi ni Litembeli, kigira giali miyinzi jaavo julinda Litembeli nu kwigura virivwa vuli mugamba zuri.

Vandu va Levi vandi

²⁸ Vandu va Levi vandi vaali nu vunyali vwu kulinda viju vindi iviatumikaa mu kusigamira Yahova mu Litembeli. Vaavituliza kutumika kandi vilanyia ni viakatumika vuli ing'inga ya vienyeka kutumika.

²⁹ Na vandu va Levi vandi vaavikwa kusingilira viju vindi vitakatifu, nu vusie vunyuki ni iwaini, na amaguta ga muzeituni ni vimuli vifunya mwayu.

³⁰ Navuzwa, vasaalisi vandi vaali nu vunyali vwu kuzuganyia no kolomba ivifunyaa mwayu.

³¹ Mundu wi ihiiri ya Levi mulala walangwa Matizia muyaayi wukutanga kwivulwa wa Shalumu, wi ihiiri ya Kora, yaali nu vunyali ku miyinzi ju okolomba vihaanwa vie migadi.

³² Na avandu vi kiliango cha Kohazi, vaali nu vunyali kusingilira kolomba migadi mitakatifu vuli lidiku lie Lisabato mu Litembeli.

³³ Vandu vandi vi zinyumba zia Levi vasingilira liemba zinyimbu mu Litembeli. Avanene vi zinyumba yizi vamenya mu zinyumba zindala zie Litembeli na vaali avavoholore ku miyinzi gindi, kigira vaali ku miyinzi mbasu nu vudiku.

³⁴ Avandu yava vaali aviimiliri vi zinyumba zia vandu va Levi kolondekana na avaguuga vaavo. Vaali aviimiliri vamenya mu Jerusalemi.

Vaguuga ni visukululwi viu mwami Saolo

³⁵ Jeyeli yatangiza lidaala linene lia Gibeoni, ma namenya mu, mukali weve yalangwa Maaka.

³⁶ Muyaayi weve wimbiri yaali Abidoni, na vayaayi vandi vaali Zuru, Kishi, Baali, Neri, Nadabu,

³⁷ Gedori, Ahio, Zakaria, Mikilozi;

³⁸ na Mikilozi yaali baba wa Shimea. Visukululwi vaavo vamenya mu Jerusalemi, ahimbi na avizinyumba zia avikiliango chavo.

³⁹ Neri yivula Kishi, na Kishi yivula Saolo. Saolo yivula vayaayi vane: Jonazani, Malikishua, Abinadabu na Eshibaali.

⁴⁰ Jonazani yivula Meribaali na Meribaali yivula Mika.

⁴¹ Mika yaali na avayaayi vane: Pizoni, Meleki, Tarea na Ahazi.

⁴² Ahazi yivula Jara, Jara yivula vayaayi vavaga: Alemezi, Azimavezi na Zimuri. Zimuri yivula Moza,

⁴³ na Moza yivula Bineya, na Bineya yivula Refaya, na Refaya yivula Eliasa na Eliasa yivula Azeli.

⁴⁴ Azeli yaali na avayaayi sita: Azirikamu, Bokeru, Ishimaeli, Shearia, Obadia na Hanani.