1 Kyetsinyinga 5 - KITABU KITAKATIFU

Visukululwi via Rubeni

¹ Yivi nivio visukululwi via Rubeni, muyaayi munene wa Yakobo. Rubeni yagotiza vonene vwivwe vwi livulwa, kuli muyaayi wu kutanga na vonene yivwo vwaheevwa Josefu. Kigira yaheya na mulala ku vakali vaviikwa vababa weve.

² Yaali ihiiri ya Yuda yanyoora zinguru ligali kuvita ziosi kandi iyatulizaa mwami ukwamiiha zihiiri ziosi. Navuzwa vonene vwu kwivulwa kutanga vwali vwi ihiiri ya Josefu.

³ Rubeni, wu kutanga kwivulwa ku avayaayi va Yakobo, yaali na vayaayi vane: Hanoki, Palu, Hezoroni na Karimi.

⁴ Visukululwi via Joeli viali: Shemaya, Goga, Shimei,

⁵ Mika, Reaya, Baali,

⁶ Beera uwa Tigilazi - Pileseri mwami wa Asiria yaahira mu vuhambe. Beera yaali mwimiliri wi ihiiri ya Rubeni.

⁷ Livaliza liang'odwa lia vi zinyumba liveeye na aviimiliri vi viliango yava mu ihiiri ya Rubeni: Jaieli, Zakaria,

⁸ Bela, muyaayi wa Azazi nu mwisukulu wa Shema, wi kiliango cha Joeli. Vi kiliango yiki vamenya mu Aroeri, kandi mu kivala kutura ahene yaho kuduuka Nebo na Baali Meoni.

⁹ Vaali ni mitugu minyingi ligali mu kivala cha Gileadi, nandio vagumira kivala ku lovega lwi Ivugwi kutura ku changalangwe kuduuka ku mugera gwa Efurate.

¹⁰ Mu ing'inga yu mwami Saolo, ihiiri ya Rubeni vingilira kulwaana Vahagari, nivavitira mu vulwani, kandi ni vavugura kivala chavo mu lovega lwi Ivugwi wa Gileadi.

Visukululwi via Gadi

¹¹ Ihiiri ya Gadi vamenya lovega lwi Ivaale wa ihiiri ya Rubeni mu kivala cha Bashani kuduuka Ivugwi wa Saleka.

¹² Joeli yaali mutangizi wi kiliango chimiliraa, na Shafamu yaali wa kaviri ku vi kiliango avaari vanene ligali kuvita. Janai na Shafati vaali avatangizi vi iviliango vindi mu Bashani.

¹³ Vandu vandi vi ihiiri ya Gadi vaali vi viliango saba yivi: Mikaeli, Meshulami, Sheba, Jorai, Jaakani, Zia, na Eba.

¹⁴ Vaali visukululwi via Abihaili muyaayi wa Huri, uwa avaguuga veve vanyara kwenyelerizwa kwirana inyima kuli ndi: Abihaili yaali muyaayi wa Huri, Huri yaali muyaayi wa Jaroa, na Jaroa yaali wa Gileadi, Gileadi yaali muyaayi wa Mikaeli, Mikaeli yaali muyaayi wa Jeshishai, na Jeshishai yaali wa Buzi.

¹⁵ Ahi, muyaayi wa Abudieli na mwisukulu wa Guni; yaali mutwi gwi viliango yivi viosi.

¹⁶ Vamenya mu kivala cha Bashani na Gileadi, mu madaala gaali yo kandi muvivala viu vwayiru vwa Sharoni.

¹⁷ Mang'oda yaga goosi gaviikwa harara mu madiku gu vwamihi vwu Mwami Jozamu wi Ivuyuda kandi Mwami Jeroboamu wa Isiraeli.

Amahi gi zihiiri zie Ivugwi

¹⁸ Mu zihiiri zia Rubeni, Gadi, na Ivugwi wa Manase, vaali ho avasikari vi liihi 44,760, avigizwa nu kunalizwa kutumikira zikuuti, uvuta, vivavi kandi mivano vulahi ligali.

¹⁹ Vazia kulwaana zihiiri zia Vahagari, Vajeturu Vanafishi kandi Vanodabu.

²⁰ Vaviika lisuuvira liavo mu Nyasaye, ma nivaanira kuye avahe ovokonyi; na Nyasaye yavativulira lisaala liavo, kandi navakola avaguuti ku Vahagari na vakonyeleri vaavo.

²¹ Vagumira imitugu kutura ku vasigu vaavo izing'amia 50,000, amagondi 250,000, zibunda 2,000, kandi nivavugura avahambe 100,000.

²² Vita avanyingi ku avasigu vaavo kigira Nyasaye yavakonya mu vulwani. Na vazizagilira komenya mu kivala yicho kuduuka ing'inga ya vaahirwa komenya mu kivala chu vuhaambe.

Vandu va Manase vi Ivugwi

²³ Navuzwa avandu vi ihiiri ya Manase vi Ivugwi vamenya mu kivala cha Bashani kali kuduuka Ivaale ha Baali Herimoni, Seniri, kandi ha kiguru cha Herimoni, kandi avandu vameedeka kuva vanyingi ligali.

²⁴ Yava nivo avaari vimiliri vi iviliango viavo: Eferi, Ishi, Elieli, Azirieli, Jeremia, Hodavia na Jahadieli. Vaali avasikari valuviliri kandi vi zinguru ligali, vasaza vi lizominywa vulahi kandi mitwi ji viliango viavo.

Zihiiri zie Ivugwi ziadikizwa

²⁵ Navuzwa avandu yava si vaali avasuuvirifu ku Nyasaye wa avaguuga vaavo mba; valeka Nyasaye wavo nu kuzia kusigamira avanyasaye vi zihiiri zindi ava Nyasaye yaali ni yakunga kutura mu kivala chavo.

²⁶ Kunangwa Nyasaye yakola mwami Puli wa Asiria, uwamanyikana kandi kuli Tigilazi - Pileseri, kwingilira kivala chavo. Yang'anyia avandu vi zihiiri zia Rubeni, Gadi ni Ivugwi wa Manase kuzia mu vuhaambe; kandi vidikira mu kivala cha Harara, Habori na Hara kandi ku mugera gwa Gozani.