1 Kyetsinyinga 29 - KITABU KITAKATIFU

Vihaanwa viu kwumbakira Litembeli

¹ Mwami Daudi yalandizira livugana liosi: “Muyaayi wange Solomoni niye wa Nyasaye amali kotovola, navuzwa akikiri musoleri kandi vugira limanya. Miyinzi jenyekanga kokolwa ni minene, kigira yiyi si eveeye inyumba yu mwami wa avandu, navuzwa Litembeli lia Yahova Nyasaye.

² Inzi mali kokora zinguru ligali kuli nyaliza ukwetegekiza vindu viu kwumbakira Litembeli: Izahabu, ifeza, mugasa, kivia kandi misaala ji midaragwa komeeda ku magina manyingi guvuguli vudinyu ligali - iberulo, magina gikibara magina gukuviikwa, magina govong'orang'ore guvuguli vudinyu ligali;

³ Kuvita yaga goosi, Inzi mali kuhaana livikiru liange mwene lie zahabu ni feza ku Litembeli kigira vuyanzi vwange kwetegekera liumbaka lie Litembeli lia Yahova Nyasaye wange.

⁴ Mali kuhaana kuvita zikilo 100,000 zie zahabu indahi ligali muno, ya Ofura, kandi ahimbi zikilo 240,000 ziefeza indahi iyaasiywa ligali yu, ukusiaha madigi gi Litembeli,

⁵ kandi yu kusiaha iviju viosi via vasiza valomba. Kunangwa kalunu nivwaha ulalira kuhaana nu vuhaani vwosi Vwu mwoyo ku Yahova?”

⁶ Maku aviimiliri vi viliango, aviimiliri vi zihiiri, avanene va mahi gi zielefu ni zimia, avamihi vi miandu ju vwami vihaana kuhaana aveene kuli vayanza

⁷ vindu yivi ku vutumiki vwi Litembeli lia Nyasaye: Kuvita zikilo 170,000 zie zahabu, kuvita zikilo 340,000 ziefeza, ahimbi zikilo 620,000 ziu mugasa, kandi kuvita zikilo 3,400,000 zie kivia.

⁸ Na ku vosi avaari na magina guvuguli vudinyu ligali vagahaana mu livikiru lie Litembeli lia Yahova iliali mu vulindi vulahi vwa Jehieli, uwi kiliango cha Levi cha Gerishoni.

⁹ Avandu vaali nu vuyanzi vonene ligali kigira vaali nivamali kuhaana kuli valalira. Mwami Daudi naye kandi yayanza ligali.

Daudi yizominya Nyasaye

¹⁰ Kunangwa mwami Daudi yizominya Yahova imbiri wi livugana liosi. Yavoola, “Wizominywi O, Yahova, Nyasaye wa guuga witu Yakobo, mihiga ni mihiga!

¹¹ Ivi oveeye Munene kandi wi zinguru; wu vukumi, kandi wu vuguuti, wo kogenyia kandi wuvunyali. Ivindu viosi iviveeye mwigulu kandi mu lirova viveeye vivio, kandi ivi oveeye mwami oveeye igulu ligali ku vindu viosi.

¹² Vutugi vwosi nu vuhinda vuturaa ku ivi; kandi vamiiha vindu viosi mu zinguru harara nu vunyali vuvwo; kandi uveeye nu vunyali kokora mulala kuvo munene kandi wi zinguru.

¹³ Na kalunu, O, Nyasaye witu, kukusandizaa kandi kwizominya lieta liilio.

¹⁴ “Navuzwa inzi mbeeye vwaha, na avandu vange vaveeye ki, kuduuki kuva avanyala kwihana aveene nu mwoyo gwu vulaliri vwosi kuli yivu? Kigira ivindu viosi vituraa ku ivi, na kukuheezaa iviveeye vivio.

¹⁵ Ivi umanya vulahi O, Yahova, ndi kuvitiraa mu livamwoyo kuli avageni kandi avahaminywa imbiri woovo kuli avaguuga viitu vaakora. Madiku giitu mu lirova gaveeye kuli ichiriri kivitaa kandi si kunyala kohona ku likuza mba.

¹⁶ O, Yahova, Nyasaye witu, kumali koleta uvuhinda vunyingi yivu ukwumbaka Litembeli ukuhaana luyali ku Lieta liilio Litakatifu, navuzwa yivu vwosi vwatula ku ivi kandi vwosi voveeye vuvwo.

¹⁷ Inzi manya, O, Nyasaye wange, ivi ugerizaa mwoyo gwa vuli mundu na uyanzizwa na avandu vu vulungi nu vusuuvirifu. Na mu vulungi nu vusuuvirifu vwange, mali kuhaana vindu yivi viosi ku ivi, kandi mali kolola kuli avandu vovo avamali kuvunga hano vayanzi koleta vihaanwa viavo ku ivi nu mwoyo gwosi.

¹⁸ O, Yahova Nyasaye wa vaguuga viitu Aburahamu, Isaka na Yakobo, viika liehaana yili mu mwoyo, live Lie zinguru mu mioyo ja avandu vovo ku mihiga ni mihiga, na ugikole give misuuvirifu ku ivi kazozo.

¹⁹ Haana ku Solomoni muyaayi wange lienya nu mwoyo gwosi ukuhulira vindu viosi via ulaga, ma kandi aduuki kwumbaka Litembeli yili lia ndaviikira livikiru yili liosi.”

²⁰ Maku Daudi yavolera livugana liosi, “Mwizominye Yahova Nyasaye winyu.” Kunangwa livugana liosi lizominya Yahova, Nyasaye wa vaguuga vaavo; kandi vinaminya mitwi jaavo haasi kusigamira Yahova kandi nivahaana luyali ku mwami Daudi.

²¹ Lidiku lialonda ku, viitira Yahova visiuviliru vie zinyama kandi ni vahaana vihaanwa viu kusambwa kuye kuli ndi: Zigiriki 1,000 magondi mamigu 1,000 kandi vimeme vikole 1,000. Valeta kandi ivia vasamba ivihaanwa viavo vie iwaini, vigima ku vwali.

²² Kunangwa, lidiku liene yilio, vaali nu vusangali ligali lwa valia kandi ni vanwa imbiri wa Yahova. Ku ing'inga ya kaviri, vaakora Solomoni kuva mwami. Mu lieta lia Yahova, vamuvaka amaguta kuli mwamihi wavo, na Zadoku kuli musaalisi.

²³ Hene yaho Solomoni yavugula ovogono vwa baba weve Daudi ni yikala ku endeve yu vwami ya Yahova yaali nasingilizi. Solomoni yaali mwami wagasizwa ligali, na ihiiri yoosi ya Isiraeli vamuhulira.

²⁴ Avanene vosi na avasikari, kandi na vayaayi vandi vosi va Daudi visuha kuva avasuuvirifu ku Solomoni kuli mwami.

²⁵ Yahova yanenehiza Solomoni ligali imbiri wi ihiiri yoosi ya Isiraeli, nu kumuha uvukumi vwu vwami, uvwavula kuva ho ku mwami wundi woosi mu Isiraeli.

Liamiiha lia Daudi mu vwimbi

²⁶ Daudi muyaayi wa Jese yamiha ku Isiraeli yoosi

²⁷ ku mihiga 40. Yamiha mu Heburoni ku mihiga 7, na mu Jerusalemi ku mihiga 33 na tatu.

²⁸ Mwami Daudi yakuza naveeye mundu muhindira ligali, mundu wu vutugi vwivwe, kandi ni lizominywa lilie lilahi. Mwana muyaayi weve Solomoni yavugula ovogono vwivwe kuli mwami.

²⁹ Makuva ga kale gu mwami Daudi kutura mu litanga kuduuka ku keheri, gang'odwa mu kitabu cha makuva ga vaporofeti vavaga: Samweli, Nazani na Gadi.

³⁰ Makuva gang'odwa yaga gavoora kuli mwami Daudi yamiha, kuli yaali ni zinguru zizie, kandi vindu viosi viakoleka kuye, nu ku Isiraeli, kandi ku vwami vundi vwosi vwe vivala vindi!