1 Kyetsinyinga 28 - KITABU KITAKATIFU

Daudi yalohiza kuli Litembeli liumbakwa

¹ Mwami Daudi yavolera avanene vosi va Isiraeli kuvugana mu Jerusalemi. Kunangwa aviimiliri vi zihiiri, avanene vamiiha ku miyinzi ju vwami, aviimiliri vi viliango, avahenzi vi miandu ni mitugu ju mwami na avayaayi veve, avanene vosi vinyumba yu vwami, avasikari na vasaza vaduukiru vosi, vavunga harara mu Jerusalemi.

² Mwami Daudi yasingira imbiri wavo navavoolera, “Munyi huliri icha nziza kumuvolera, avaamitu vange na avandu vange, mumbulirize. Ndeenya ukwumbakira Lisandugu lie Lilagana lia Yahova, Litembeli lie mihiga ni mihiga kandi live endeve yi virenge via Nyasaye witu. Mali kolomba lietegeka kuliumbaka kuhaana luyali kuye.

³ Navuzwa Nyasaye yambolera, ‘Siunyala kunyumbakira Litembeli mba, kigira walwaana amahi manyingi kandi watahiza masahi manyingi ligali.’

⁴ Navuzwa Yahova, Nyasaye wa Isiraeli, yandovola kutura ku avinyumba ya baba wange vosi kuva mwami wa avandu va Isiraeli vosi kulwa mihiga ni mihiga. Yatovola ihiiri ya Yuda ukuhaana aviimiliri, na kutura mu ihiiri yiyi, yatovola avinyumba ya baba wange. Kutura munyumba yange yoosi, uvulariri vwivwe kumbugura no kongola mbe mwami ku Isiraeli vosi.

⁵ Nyasaye yamba avayi, na kutura muvo vosi yatovola Solomoni ukwamiiha ku Isiraeli, uvwami vwa Yahova.

⁶ “Yahova yambolera, ‘Muyaayi woovo Solomoni niyie uliumbaka Litembeli liange. Mali kumutovola kuva mwana wange, na inzi ndava baba weve.

⁷ Ndakora vwami vwivwe vuhindira mihiga ni mihiga niiva alazizagilira kutia malago gange goosi ni likalaga liange.’

⁸ “Kunangwa kalunu, avandu vange imbiri wi zimoni zia Nyasaye, kandi ku vandu vosi va Isiraeli, livugana lia Yahova, imbiri wa Nyasaye witu, muhenze vulahi kolonda amalago goosi ga Yahova Nyasaye winyu, muduuki kuvugura kivala kilahi yiki, kandi na mukilekere avana vinyu kuli miandu ku visukululwi vinyu mihiga ni mihiga.”

⁹ Daudi yavolera Solomoni, “Mwana wange, ngovolera umanye Nyasaye wa baba woovo, ma kandi umutumikiri nu mwoyo gwugwo gwosi, nu vulaliri vwi zing'anagani zizio ziosi. Yahova amanya zing'anagani zietu ziosi kandi lienya lietu liosi. Niiva ulazia kuye, alakuvugilira; navuzwa niiva ulagirung'ana kutura kuye, alakoleka mihiga ni mihiga.

¹⁰ Kunangwa kuduuki kumanyiriza ndi Yahova umali kotovola ivi ukwumbaka Litembeli lilie litakatifu. Kalunu uve mugulu ma wumbake Litembeli nu mwoyo gwugwo gwosi.”

¹¹ Daudi yaaha Solomoni muyaayi weve zing'anagani ni lilohiza liosi liu kwumbaka Litembeli, ving'oze via mavikiru harara ni ving'oze vindi viosi, kandi havundu hi igulu, ha vundu hatakatifu kuvita hoosi hu vwasamihilwaa.

¹² Yamuha kandi zing'anagani zie lilohiza liosi lia yaali nalio kigira migizi ji Litembeli lia Yahova, ni ving'oze viosi viagikumberiza, kandi amaviikiru gi iviju vie Litembeli lia Nyasaye harara na mavikiru gi vihaanwa viatakasirwa Yahova.

¹³ Kandi yamuha volohizi vwa avasaalisi na vandu va Levi okokora miyinzi jaavo josi mu Litembeli lia Yahova, kandi kulinda vulahi iviju viosi viu mu Litembeli lia Yahova.

¹⁴ Yahaana amalago kuli ekegero chi izahabu ni ifeza itumikirwa okolomba iviju,

¹⁵ ekegero kitumika okolomba vinara vie zitaya zie zahabu ni zitaya ziavio,

¹⁶ kegero chi zimesa zie zahabu kandi zie ifeza ukwa vaviika mugadi kuli guhaanwa ku Nyasaye.

¹⁷ Kandi yahaana amalago kuli ekegero chi izahabu indahi itumikirwa okolomba uvwuma, zindavo, ni vikombe, kegero chi ifeza ni zahabu mu lilomba zisahani,

¹⁸ kandi kegero chi zahabu indahi itumikirwa mu lilomba uvwali vwu kusambira ku vimuli, mu lilomba amagari gi vilombe vie zimbaha ivivaambulaa zimbaha ziavio ni zikunika Lisandugu lie Lilagana lia Yahova.

¹⁹ Mwami Daudi yavoola, “Yaga goosi gaveeye mu lilohizwa liang'odwa kolondekana na malago ga Yahova mwene yahaana ku inzi nduuki kokora.”

²⁰ Mwami Daudi yavolera muyaayi weve Solomoni, “Uve mugulu kandi muluviliri. Tanga likora miyinzi na utaleka kindu kali kilala kukusingiriza mba. Yahova Nyasaye wange, alava harara nivi. Yahova si alakoleka mba. Alava nivi kuduuka lwi miyinzi yigi josi jiu vwumbaki vwi Litembeli lilie gitweeka.

²¹ Avasaalisi na vandu va Levi vahevwa miyinzi jokokola mu Litembeli. Na vuli musaza wu vusiza ni limanya lia vuli muyinzi vaveeye nu mwoyo gwu vuha kokonya ivi, kandi avandu vosi na aviimiliri vaavo valava haasi hi lilaga liilio liosi.”