1 Kyetsinyinga 27 - KITABU KITAKATIFU

Daudi agavulanyia vanene va Amahi

¹ Yaga nigo mita ga avandu va Isiraeli avaari aviimiliri va avizinyumba ni viliango, avanene va vasikari elefu, avanene vi zimia, kandi na vanene vaavo, avatumikiraa umwami mu makuva goosi kolondekana ni ligavulanywa lie liihi lia yavo avaari ku miyinzi vuli mweli ku muhiga gwosi. Vuli muganda gwaali navasaza vi liihe 24,000; hasi hu munene uwaali ku miyinzi ku mweli gwene yigwo.

² Jashobeamu muyaayi wa Zabidieli yasingilira muganda gwu kutanga, ku mweli gwu kutanga. Mu muganda gwigwe vaali mu avasaza 24,000.

³ Yaali kisukururwi cha Perezi kandi munene wa vanene vi liihi ku mweli gwu kutanga.

⁴ Dodai kisukururwi cha Ahohi, yasingilira muganda gwa kaviri gwi liihi ku mweli gwa kaviri. Mikilozi yaali mulondeleri weve ku vonene. Vaali ho avasaza 24,000 vi liihi mu muganda gwigwe.

⁵ Benaya muyaayi wa musaalisi Jehoyada yaali munene wu muganda gwa kavaga gwi liihi ku mweli gwa kavaga. Muganda gwigwe gwaali na vasaza vi liihi 24,000.

⁶ Uyu niye Benaya waali musaza wi zinguru wa vasaza vi zinguru salasini kandi munene wa vasaza valuviliri vi liihi salasini. Amizabedi muyaayi weve yaali mwimiliri wu muganda.

⁷ Munene wa kane, ku mweli gwa kane, yaali Asaheli amwavo Joabu si yamaliriza mweli gwene yigu mba. Muyaayi weve Zebadia yavugula ovogono vwivwe gwa vasaza 24,000 vi liihi.

⁸ Munene wa katano, ku mweli gwa katano yaali Shamuhuzi, kisukururwi cha Izirahi. Muganda yigu gwaali na vasaza 24,000.

⁹ Munene wu muganda gwa sita ku mweli gwa sita yaali Ira muyaayi wa Ikeshi kutura Tekoa. Vaali ho avasaza vi liihi 24,000.

¹⁰ Munene wu muganda gwa saba, ku mweli gwa saba yaali Helezi, kisukururwi chi ihiiri ya Efuraimu kutura Peloni. Muganda gwigwe gwaali na vandu 24,000.

¹¹ Munene wu muganda gwa munane ku mweli gwa munane yaali Sibekai kutura Hushazi wi kiliango cha Zera mu ihiiri ya Yuda. Muganda yigu gwaali na vasaza vi liihi 24,000.

¹² Munene wu muganda gwa tisa ku mweli gwa tisa yaali Abiezeri kutura Anazozi, uwi ihiiri ya Benjamini. Haali ho na vasaza 24,000 vi liihe.

¹³ Munene wu muganda gwi likomi ku mweli gwi likomi yaali Maharai kutura Netofa uwi kiliango cha Zera. Haali ho na vasaza 24,000 vi liihi.

¹⁴ Munene wu muganda gwa komi na moja, ku mweli gwa komi na moja yaali Benaya kutura Pirazoni, mu kivala chi ihiiri ya Efuraimu. Haali ho na vasaza vi liihi ine 24,000.

¹⁵ Munene wu muganda gwa komi na mbiri, ku mweli gwa komi na mbiri, yaali Helidai kisukururwi cha Ozinieli kutura Netofazi. Gwaali muganda gwa vandu 24,000.

Uvwamihi vwi zihiiri zia Isiraeli

¹⁶ Yili nilio lilohiza lia amita ga avamihi vi zihiiri zia Isiraeli: Elieza muyaayi wa Zikiri yaali mwamihi ku ihiiri ya Rubeni; Shefatia muyaayi wa Maaka yaali mwamihi ku Ihiiri ya Simioni.

¹⁷ Hashabia muyaayi wa Kemueli, yaali mwimiliri wi ihiiri ya Levi, na Zadoku yaali mwimiliri wi ihiiri ya Haruni.

¹⁸ Elihu waali mulala ku vamwavo va Daudi, yaali mwimiliri wi ihiiri ya Yuda. Omuri muyaayi wa Mikaeli, yaali mwimiliri wi ihiiri ya Isakari.

¹⁹ Ishimaya muyaayi wa Obadia yaali mwimiliri wi ihiiri ya Zabuloni. Jeremozi muyaayi wa Azirieli yaali mwimiliri wi ihiiri ya Nafutali.

²⁰ Hoshea muyaayi wa Azazia yaali mwimiliri wi ihiiri ya Efuraimu. Joeli muyaayi wa Pedaya yaali mwimiliri wi inusu yi ihiiri ya Manase, iyaali kolovega lwi Madioli.

²¹ Ido muyaayi wa Zakaria yaali mwimiliri wi inusu yindi yi ihiiri ya Manase, iyaali Ivugwi mu Gileadi. Jasieli muyaayi wa Abineri yaali mwimiliri wi ihiiri ya Benjamini.

²² Azareli muyaayi wa Jerohamu yaali mwimiliri wi ihiiri ya Dani.

²³ Mwami Daudi si yavaliza avandu vaavo avaari haasi hi mihiga sirini mba, kigira Yahova yaali niyasuuviriza kokora Isiraeli kuva vanyingi kuli zing'ereng'ana ziu mwigulu.

²⁴ Joabu muyaayi wa Zeruya yaatanga kuvaliza, navuzwa si yamala kokora ndio mba, nitali uvutima vonene vwa Nyasaye vwaduuka ku Isiraeli kigira agene yaga. Livaliza yili si liang'odwa mu vitabu viu mwami Daudi viu vwami.

Vi miandu ju vwami

²⁵ Yili ni lilohiza lia mita ga avamiiha ku miandu juvwami: Azimavezi muyaayi wa Adieli yaali mwamihi ku amaviikiru gu vwami. Jonazani muyaayi wa Uzia, yaali mwamihi ku mavikiru ga vandu mu kivala, mu madaala manene, mu tudaala kandi mu minaara.

²⁶ Eziri muyaayi wa Kelubu yaali mwimilibi ku vandu vakora miyinzi ju kulima mu milimi.

²⁷ Shimei kutura Rama yaali mwimiliri wi vizabiba; na Zabadi kutura Shifuni yaali mwimiliri wi viamo vie vizabibu kigira Iwaini yu kugunaminya.

²⁸ Bali Hanani kutura Gederi yaali mwimiliri wi Mizeituni, misaala ja makuyu mu kivala che kereremo isi wi vigulu vie madioli. Joashi yaali mwimiliri wi ligavula lia maguta ga Muzeituni.

²⁹ Shitirai yaali mwimiliri wi biayo mu kereremo cha Sharoni. Shafati muyaayi wa Adilai, yaali mwimiliri wi viayo mu mavoona.

³⁰ Obili wi ihiiri ya Shimaeli yaali mwimiliri wi zing'amia. Jehidaya kutura Merozozi yaali mwimiliri wi zibunda.

³¹ Jazizi kutura Hagiritu yaali mwimiliri wi chayo chi zimburi na magondi Haguriti.

³² Jonazani, koza wa Daudi yaali muhaani wi ziganigani mugeri ligali kandi mwigizi wi Lilaga. Oyo na Jehieli, muyaayi wa Hakimoni, vaali avasingiliri vi lisoma lia avana va avami.

³³ Ahizofeli yakonya mwami na makuva; na Hushai kutura Akiti, yaali mulina wu mwami Daudi kandi umwideeri.

³⁴ Inyima wi likuza lia Ahizofeli, Abiazari na Jehoyada muyaayi wa Benaya vaagwa vahaani vi zing'anagani. Joabu yaali munene wi liihi liu vwami.