1 Kyetsinyinga 26 - KITABU KITAKATIFU

Avasikari vi Litembeli

¹ Yili nilio ligavulwa liu vutumiki vwi miyinzi ku vandu va Levi avatumikaa kuli avasikari vi Litembeli. Kutura mu kiliango cha Kora, yaliho Meshelemia muyaayi wa Kore, uwaali wu vwiko ni inyumba ya Asafu.

² Meshelemia yaali na avayaayi saba: wu kutanga yaali Zakaria, wa kaviri yaali Jediaeli, wa kavaga yaali Zebadia, wa kane yaali Jazinieli,

³ wa katano yaali Elamu, wa sita yaali Jehohanani na wa saba yaali Eliehoenai.

⁴ Yaali ho kandi Obedi Edomu, wa Nyasaye yagasiza naamuha avana avayaayi munane: Wu kutanga mu livulwa yaali Shemaya, wa kaviri yaali Jehozabadi wa kavaga yaali Joahi, wa kane yaali Sakari, wa katano yaali Nezaneli, wa sita yaali

⁵ Amieli, wa saba yaali Isakari na wa munane yaali Peulezai.

⁶ Mwana wa Obedi Edomu wu kutanga Shemaya, yivula avayaayi sita avaari avamihi munyumba ya guuga wavo, kigira vaali avasaza vi zinguru kandi avaluviriri ligali.

⁷ Mita ga avayaayi yava gaali: Ozini, Refaeli, Obedi, na Elizabadi, harara na avamwavo vaavo avaari avasaza vu vunyali; Elihu, na Semakia.

⁸ Yava vosi vaali vayaayi vinyumba ya Obedi Edomu, harara na avana avayaayi vaavo, na avamwavo vaavo, avasaza vu vunyali avaadukana mu vutumiki. Vosi vaali avasaza sitini na mbiri.

⁹ Meshelemia yaali na avayaayi harara na vamwaavo, avasaza vu vunyali avaadukana mu vutumiki, vosi harara vaali komi na nane.

¹⁰ Kutura mu kiliango cha Merari, yaali ho Hosa, uwaali na avana avayaayi vane: Shimiri uwa baba weve yakola kuva mwimiliri, kali niiva si yaali muyaayi mukulundu mba;

¹¹ Hilikia yaali muyaayi wa kaviri, Tabalia yaali muyaayi wa kavaga na Zakaria yaali muyaayi wa kane. Vosi harara avana va Hosa harara na avamwavo veve vaali avandu likomi na vavaga, avaari avasikari vi Litembeli.

¹² Avasikari vi Litembeli vagavulanywa mu viduma kolondekana ku zinyumba ziavo, kandi vahevwa miyinzi jo vutumiki mu Litembeli, kuli avandu vinyumba ya Levi vandi vaali.

¹³ Vuli inyumba, vugira kohenza ku vunyingi vwa vandu, vaakuba zikuura kolola ndi ni kirivwa ki cha vasingilira.

¹⁴ Ikura yi kirivwa chi Ivugwi yagwira Shelemia, na ikura yi kirivwa chi Ivaale yagwira Zakaria muyaayi wa Shelemia, yaali musaza wahaanaa zing'anagani zindahi kazozo.

¹⁵ Obedi Edomu yahevwa kulinda kirivwa chi Isavaalu, na avayaayi veve vahevwa kulinda ving'oze viukuvika mu viukulia.

¹⁶ Shupimu na Hosa vahevwa kirivwa chi madioli, kandi kirivwa cha Shalekezi ku imbarabara ya higulu. Vulindi vwagavulwa ku zing'inga, mulindi yatura ho, wundi yingira ho.

¹⁷ Ku lovega lwi Ivugwi, avasikari sita vaali ku vulindi vuli lidiku, ku lovega lwi Ivaale avasikari vane vaali ku vulindi no ku lovega lwi Isavaalu vandi vane; avasikari vane valinda ving'oze viu kuviika mu viukulia vuli lidiku, vasikari vaviri vuli ku keng'oze.

¹⁸ Hiimbi nu mugizi gwi madioli vaali ho avasikari vane ku mbarabara, kandi avasikari vaviri mu mugizi gwene.

¹⁹ Yili nilio ligavula lia avasikari valinda mu virivwa hagati hi inyumba ya Kora ni inyumba ya Merari.

Miyinzi gindi ji Litembeli

²⁰ Ku ihiiri ya vandu va Levi, Ahija yaali nu vunyali kusingilira amaviikiru gi Litembeli lia Nyasaye, ma kandi keng'oze chi vihaanwa viatakaswa via Nyasaye.

²¹ Ladani, mulala ku avayaayi va Gerishoni, yaali guuga wi miganda ji zinyumba zinyingi, kandi harara ni inyumba yu muyaayi weve Jehieli.

²² Avayaayi va Ladani vandi vaviri vaali: Zezamu na Joeli, vaali mu vunyali kusingila livikiru lie Litembeli kandi ving'oze viu kuviika mu viukulia.

²³ Miyinzi kandi jaheevwa ku avinyumba ya Amuramu, Izihari, heburoni, na uzieli.

²⁴ Shebueli, wi kiliango chu mwana wa Musa muyaayi - Gerishomu, yaali musingiliri munene wuvunyali kusingilira livikiru lie Litembeli.

²⁵ Kuvitira ku amwavo weve Elieza, Shelomozi waali nu vwiko ni inyumba ya Gerishomu Elieza yaali baba wa Rehabia, uwaali baba wa Jeshia, baba wa Joramu, baba wa Zichiri, baba wa Shelomizi.

²⁶ Shelomozi harara na avandu vi inyumba yeeye vaali nu vunyali kusingilira amaviikiru goosi gi vihaanwa via viikirwa Nyasaye nu mwami Daudi, aviimiliri vi viliango via vaguuga, avanene vi zielefu ni zimia, kandi avanene va mahi.

²⁷ Vavugura vindu vilala ku viahulwa mu vulwani nivavika ku litumika mu Litembeli.

²⁸ Shelomozi harara na avinyumba yeeye vaali nu vunyali kusingila vindu viosi viavikwa kigira uvutumiki mu Litembeli, harara ni vihaanwa viu muporofeti Samweli, nu mwami Saolo, Abineri mwana muyaayi wa Neri kandi Joabu mwana muyaayi wa Zeruya.

Miyinzi ja vandu va Levi vandi

²⁹ Mu visukululwi via Izihari, Kenania na vayaayi veve vagavulilwa miyinzi ju kwamiiha: kulinda mang'oda, kumala ovosooro nu kuhambanyia avandu va Isiraeli.

³⁰ Mu visukululwi va Heburoni, Hashabia harara na aviiko veve 1,700, avasaza vosi avadukiru, vaviikwa kusingilira uvulindi vwi miyinzi ja Yahova, kandi amakuva gu vuyinziri mu Isiraeli, Imadioli wu mugera gwa Jorodani.

³¹ Jeria yaali mwimiliri wi Ivisukulurwi va Heburoni. Mu muhiga gwa arubaini gwa Daudi yaali mwami, litunyiriza liali ho ku aviiko vi zinyumba zia ivisukulurwi va Heburoni, makandi avasikari avadukiru avaari nu vwiko ni inyumba yiyi vaanyoolwa nivamenyi ha Jazeri mu kivala cha Gileadi.

³² Mwami Daudi yatovola aviimiliri avadukiru vi zinyumba; kutura mu aviiko va Jeria 2,700 saba ma navavika kusingila uvulindi vwi miyinzi ja Yahova josi, makandi amakuva gi miyinzi mu Isiraeli Ivugwi wu mugera gwa Jorodani, vivala via Rubeni, Gadi na Ivugwi wa Manase.