1 Kyetsinyinga 24 - KITABU KITAKATIFU

Miyinzi Jahaanwa ku Vasaalisi

¹ Visukululwi va Haruni vagavulanywa mu miganda yigi: Nadabu, Abihu, Elieza, na Izamara.

² Navuzwa Nadabu na Abihu vakuza baba wavo nakikiri kukuza, vakuza ni vakikiri kwivura avana. Kunangwa Elieza na Izamara avamwavo vaavo vaagwa avasaalisi.

³ Mwami Daudi yalohiza visukululwi via Haruni mu viduma kolondekana nu vutumiki vwavo. Mu Lilohiza yili, Daudi yakonywa na Zadoku kisukururwi cha Elieza kandi na Ahimeleki kisukururwi cha Izamara.

⁴ Visukululwi via Elieza valohizwa mu viduma 16 na sita, na visukululwi via Izamara valohizwa mu viduma 8. Yaga gaakolwa ndio kigira vaali ho avasaza vanyingi aviimiliri vi zinyumba hagati ha visukululwi viombi via Elieza.

⁵ Kigira vaali ho avanene vi Litembeli kandi aviimiliri vu mu roho hagati hi visukululwi vombi, via Elieza na Izamara, ligavulwa liakoleka ku likuba zikuura.

⁶ Visukululwi via Elieza ni via Izumari vaavugura vwiyangu kukuba zikuura mulala sa mulala. Maku vosi vang'odwa na Shemaya muyaayi wa vandu va Levi, uwaali mung'odi wa vandu va Levi. Mwami, avanene veve, musaalisi Zadoku, Ahimeleki muyaayi wa Abiazari, harara na aviimiliri vi zinyumba zia vasaalisi ma kandi vi zinyumba zia vandu va Levi, vosi vaali avalolekizi va makuva yaga.

⁷ Yili ni lilohizwa kuli zikuura ziakubwa ku viduma vie zinyumba 24: Ikura yu kutanga yazia ku Jehoyaribu, Ikura ya kaviri yazia ku Jedaya,

⁸ Ikura ya kavaga yazia ku Harimu, Ikura ya kane yazia ku Seorimu,

⁹ Ikura ya katano yazia ku Malikija, Ikura ya sita yazia ku Mijamini,

¹⁰ Ikura ya saba yazia ku Hakozi, Ikura ya munane yazia ku Abija,

¹¹ Ikura ya tisa yazia ku Jeshua, Ikura ya komi yazia ku Shekania,

¹² Ikura ya komi na moja yazia ku Eliashibu, Ikura ya komi na mbiri yazia ku Jakimu,

¹³ Ikura ya komi na tatu yazia ku Hupa, Ikura ya komi na ine yazia ku Jeshebeabu,

¹⁴ Ikura ya komi na tano yazia ku Biliga, Ikura ya komi na sita yazia ku Imeri,

¹⁵ Ikura ya komi na saba yazia ku Heziri, Ikura ya komi na munane yazia ku Hapizezi

¹⁶ Ikura ya komi na tisa yazia ku Pezahia, Ikura ya sirini yazia ku Jehezikeli,

¹⁷ Ikura ya sirini na moja yazia ku Jakini, Ikura ya sirini na mbiri yazia ku Gamuli

¹⁸ Ikura ya sirini na tatu yazia ku Delaya Ikura ya sirini na zine yazia ku Maazia.

¹⁹ Vasaza yava vang'odwa kolondekana ni miyinzi ja vahevwa kuzia mu Litembeli nu kutumika ku miyinzi ijatangizwa na guuga wavo Haruni, kuli Yahova Nyasaye wa Isiraeli yamulaga.

Amita ga vandu va Levi vandi

²⁰ Yaga na mita ga viimiliri vi zinyumba zindi vaatura ku inyumba ya Levi: Amuramu yaali guuga wa Shubaeli na Jehidaya.

²¹ Rehabia yaali guuga wa Ishia wukutanga.

²² Izihari yaali baba wa Shelomozi, guuga wa Jahazi.

²³ Heburoni yaali na avana avayaayi vane; Jeria yaali wu kutanga, Amaria yaali wa kaviri, Jahazieli yaali wa kavaga, na Jekameamu yaali wa kane.

²⁴ Uzieli yaali baba wa Mika na Mika yaali guuga wa Shamiri.

²⁵ Ishia amwavo wa Mika, yaali baba wa Zakaria.

²⁶ Merari yaali baba wa Maheli na Mushi na Jaazia.

²⁷ Jaazia yaali na avayaayi vane: Beno, Shohamu, Zakuri na Ibiri.

²⁸ Maheli yaali na avana avayaayi vaviri: Elieza na Kishi. Elieza yaali vugira vayaayi.

²⁹ Navuzwa Kishi yaali nu muyaayi mulala walangwa Jerahameeli.

³⁰ Mushi yaali na avayaayi vavaga: Maheli, Ederi na Jeremozi. Yava nivo avaari ivisukulurwi vi inyumba ya Levi.

³¹ Vuli mwimiliri wi inyumba kandi mulala ku avamwavo veve avasoleri vaakuba zikuura ziavo, kuli avamwavo vaavo, avana va Haruni vaali ni vakoli. Yaga gekoleka imbiri wu mwami Daudi, Zadoku, Ahimeleki, harara na aviimiliri vi zinyumba zia vaguuga avasaalisi ni ihiiri ya Levi.