1 Kyetsinyinga 23 - KITABU KITAKATIFU

¹ Lwa Daudi yaali musakulu ligali, yakola muyaayi weve Solomoni mwami wa Isiraeli.

Miyinzi ja vandu vi hiiri ya Levi

² Mwami Daudi yavungiza harara aviimiliri vosi va Isiraeli, na vasaalisi vosi kandi na vandu va Levi vosi.

³ Mwami Daudi yavaliza ihiiri ya Levi avaari kutura ku mihiga salasini kuzia igulu na livaliza lia vasaza vosi liali 38,000.

⁴ Yavoola, “Ku yava, 24,000 valaviikwa mu vulindi vwi miyinzi ji Litembeli lia Yahova, 6,000 navo valava vaviiki va mang'oda kandi avakalagi;

⁵ 4,000 valava valindi vi virivwa, na 4,000 valakuminya Yahova nivatumikira viju viu kwimbira mu via inzi mali kuvaha.”

⁶ Daudi yagavuranyia ihiiri ya Levi mu miganda givaga kolondekana ni miliango jaavo: Gerishoni, Kohazi, kandi Merari.

⁷ Gerishomu yaali na vayaayi vaviri; Ladani na Shimei.

⁸ Ladani yaali na vayaayi vavaga: Jehieli wu kutanga, Zezamu, na Joeli

⁹ Shimei yaali na vayaayi vavaga; Shilomozi, Hazieli na Harani yava vaali vimiliri vi viliango vie visukululwi via Ladani.

¹⁰ Lwa nyima, Shimei yaali na vayaayi vandi vane: Jahazi, Zina, Jeushi na Beria kolondekana ni mihiga jaavo.

¹¹ Jahazi yaali wu kutanga na Zina wa kaviri. Navuzwa Jeushi na Beria Si vaali na vayaayi vanyingi mba, kunangwa visukululwi viavo viavalizwa vuzwa kuli avinyumba ndala.

¹² Kohazi yaali na vayaayi vane: Amuramu, Izihari, Heburoni na Uzieli.

¹³ Muyaayi weve munene, yivula Haruni na Musa. Haruni ni visukululwi vivie vaviikwa halovega kutakasa viju vitakatifu viosi, kuhaana vihaanwa vie imuli ku Yahova, kumutumikira kandi kulandiza uvugasu ku vandu mu lieta lilie mihiga ni mihiga.

¹⁴ Navuzwa avayaayi va Musa, mundu wa Nyasaye, vaavalizwa hagati ha avandu vi ihiiri ya Levi.

¹⁵ Musa yaali na avayaayi vaviri Gerishomu na Elieza.

¹⁶ Ku vana va Gerishomu, Shebueli yaali wu kutanga.

¹⁷ Elieza yaali nu muyaayi mulala yeng'ine; Rehabia nitali Rehabia yaali ni visukululwi vinyingi.

¹⁸ Izihari muyaayi wa kaviri wa Kohazi yaali nu mwana mulala walangwa Shelomozi, uwaali mwimiliri wi kiliango.

¹⁹ Heburoni, muyaayi wa Kohazi wa kavaga, yaali na vayaayi vane: Jeria, Amaria, Jehazieli na Jekameamu.

²⁰ Muyaayi wa kane wa Kohazi, Uzieli yaali na vayaayi vaviri; Mika na Ishia.

²¹ Merari yaali na vayaayi vaviri; Mahili na Mushi. Maheli naye kandi yaali na vayaayi vaviri; Elieza na Kishi,

²² navuzwa Elieza yakuza vugira kwivura avana vayaayi, navuzwa avakaana veng'ine. Avakaana veve valetwa na vasiala vaavo, avayaayi va Kishi.

²³ Muyaayi wa kaviri wa Merari, Mushi, yaali na vayaayi vavaga: Maheli, Ederi, na Jeremozi.

²⁴ Yava vaali visukululwi va Levi, ku viliango ni zinyumba, sa mulala yang'odwa kolondekana na mita gaavo. Sa mulala ku visukululwi vivie, uwaali ni mihiga silini kuzia imbiri, yatumika ku miyinzi jakolwa mu Litembeli lia Yahova.

²⁵ Daudi yavoola, “Yahova, Nyasaye wa Isiraeli umali kuhaana mirembe ku avandu veve, kandi umwene alamenya mu Jerusalemi mihiga ni mihiga.

²⁶ Kunangwa si haali ni lienya lia vandu va Levi kugingaginga Lihema liu kuvuganira mu na Yahova harara ni viju vitumikaa mu lisigamira kutura yaaha na harara mba.”

²⁷ Kolondekana na makuva ga Daudi gu kumaliriza, vandu va Levi vosi vavalizwa kigira uvutumiki lwa vaduuka ni mihiga silini,

²⁸ valatumikira Yahova mu miyinzi yigi: Kokonya avasaalisi vaveeye kisukururwi cha Haruni kokora miyinzi jaavo mu lisigamira liu mu Litembeli; ukulinda migizi ji Litembeli kandi ni ving'oze via lio, kandi ukutakasa vindu viosi vitakatifu vitumikirwa mu lisigamira lia Nyasaye,

²⁹ ukusingilira mugadi guhaanwa ku Nyasaye, uvusie vunyuki vutumikirwa mu vihaanwa, mugadi vugira mamera, vihaanwa viu vusie vwazuganywa na maguta ga muzeituni, ukubima uvulitu no vonene vwi vihaanwa viletwaa mu Litembeli;

³⁰ ukwizominya nu kukuminya Yahova vuli mugamba na mugorova

³¹ kandi vuli lwosi lwi vihaanwa ku Yahova visambwa ku Lisabato, Lilia liu Mweli Muhia, kandi na masavo gandi. Malago galombwa mu likora miyinzi yigi nigavooraa vandu va Levi vanga avatovolwa kokora miyinzi yigi vuli ing'inga. Vandu va Levi vatovolwa kokora miyinzi ju kusigamira Yahova kulwi zing'inga ziosi.

³² Vahevwa miyinzi ju kusingilira nu kulinda Lihema liu kuvuganira mu na Yahova kandi Litembeli, kandi ji likonyelera aviiko vaavo, avasaalisi, avaveeye visukululwi via Haruni, mu lisigamira liu mu Litembeli.