1 Kyetsinyinga 21 - KITABU KITAKATIFU

Daudi yavaliza avandu

¹ Setani yenya koleta kivi ku avandu va Isiraeli, kunangwa yazuva Daudi kuvaliza vandu.

² Kunangwa Daudi yavolera Joabu harara na vanene vi liihe vandi, “Muzie, mu Isiraeli mwosi, kutura kundulu kuduuka kundulu na muvalizi vandu ma mundeetere amakuva. Nyenya manye vaveeye vanga.”

³ Joabu yativura, “Yahova akole vandu va Isiraeli vave vanyingi haali mia moja kuvita kuli vaveeye kalunu! Mwami wange, avandu yava vosi vaveeye avatumikiri vovo. Kigira ki wenyaa okole kindu yiki no kolomba ihiiri yoosi ya Isiraeli kuhiola?”

⁴ Navuzwa mwami Daudi yakola Joabu ahuliri malago geege. Maku Joabu yatura nazia mu kivala choosi cha Isiraeli, ma niyirana Jerusalemi.

⁵ Yaleetera mwami Daudi amakuva gi livaliza liosi lia vasaza avanyala kuzia mu vulwani. Mu Isiraeli vaali mu avasaza 1,100,000, na mu Ivuyuda nivava vasaza 470,000.

⁶ Na kigira Joabu si yavugilira lilaga liu mwami, si yavaliza vandu vi zihiiri zia Levi na Benjamini mba.

⁷ Nyasaye si yayanzizwa ni chaali ni chekoleki mba kunangwa yahaana mageri ku Isiraeli.

⁸ Daudi yavolera Nyasaye, “Inzi mali kokora uvwoni vudamanu ligali mu likora inguuva yiyi! Mwaza nuyanza usamihi. Inzi mali kokora vudamanu ligali.”

⁹ Maku Yahova yavolera Gadi, muporofeti wa Daudi,

¹⁰ “Zia ovoolere Daudi ndi muheezaa vindu vivaga atovole kilala kuvio. Inzi ndamukolera choosi icha atovoraa.”

¹¹ Kunangwa Gadi yazia ku Daudi, namuvolera icha Yahova yaali navooye, kandi nateeva, “Ni kiliha cha otovooye?

¹² Ni mihiga givaga jiinzala? Anoho ni mieli givaga ni wiruka kutura ku amahi ga vasigu vovo? Anoho madiku gavaga aga Yahova avalwaane ni kivavi chiche kandi utumi vulwaye vudamanu ku kivala chicho ipulegi naatumikiranga engelosi weve okoleta likuza mu Isiraeli mwosi? Ni litivuli ki lia mbana ku Yahova?”

¹³ Daudi yativulira Gadi, “Inzi mbeeye mu kivi kenene; mwaza leka ngwi mu mukono gwa Yahova, kigira zimbavasi zizie ziveeye zinene; navuzwa mburi kugwa mumakono ga avandu.”

¹⁴ Kunangwa Yahova yatuma vulwaye vudamanu ku avandu va Isiraeli, na avasaza 70,000 vakuza.

¹⁵ Maku yatuma engelosi kudiviza Jerusalemi, navuzwa yagirung'anyia zing'anagani zizie kandi navolera engelosi, “Lekera! Yago gaduuki!” Engelosi yaali nasingiyi ku loze lwa Arauna, kutura Jebusi.

¹⁶ Daudi yalora engelosi nasingiyi mu vwerefu hagati, nagumiyi kivavi chiche mu mukono gwigwe, niyetegeki kudiviza Jerusalemi. Maku Daudi na aviimiliri va avandu, vosi avaari niviviiki zinguvu zia magunia, vaagwa haasi mamumama.

¹⁷ Daudi yasaala, “O, Nyasaye, ni inzi uwakola uvwoni vudamanu yivu. Inzi niye wavoola avandu vavalizwi. Avandu vadaka yava vakoli ki? O, Yahova Nyasaye wange, haana mageri ku inzi na avinyumba yange, navuzwa oleke avandu vovo vave.”

¹⁸ Engelosi wa Yahova yavolera Gadi alage Daudi azie kandi yumbakiri Yahova uvwali ha loze lwa Arauna kutura Jebusi.

¹⁹ Daudi yahulira lilaga lia Yahova ma nazia, kuli Gadi yaali namuvooleye akole.

²⁰ Ahene yaho ha loze, Arauna na vayaayi veve vane vaali nivahulaa ingano, lwa valora engelosi, avayaayi yavo viruka ni vazia kwivisa.

²¹ Nonoho lwa Arauna yalora Daudi mwami niyazaa yaleka oloze, naagwa mamumama imbiri weve.

²² Daudi yamuvolera, “Ngulizira oloze lulwo, kunangwa nduuki kwumbakira Yahova uvwali; aduuki kulekiza vulwaye vudamanu yivu. Ndakutunga uvuguli vwalwo vulahi.”

²³ Arauna yavoola, “Mwami munene wange, luvuguli na ololere choosi cha uyanza. Henza, nguyu zing'ombe ziveeye hanu usambe kuli kihanwa ku vwali, na hano haveeye ho ni vivango viu kuhulira ivinyala kutumika kuli zingu, kandi ingano kuhaana kuli kihanwa, mbana viosi ku ivi.”

²⁴ Navuzwa mwami Daudi yativulira Arauna, “Awa, Ndakutunga uvuguli vwosi. Si ndahaana kuli kihanwa ku Yahova ikindu keveeye ichicho mba, ikindu cha ndatungi.”

²⁵ Na yatunga Arauna vidonye vie zahabu 600 kigira oloze.

²⁶ Yumbakira Yahova vwali hene yaho kandi nahaanira ku vihaanwa viu kusambwa kandi vihaanwa vie mirembe. Yasaala, na Yahova yamutivulira natuma muliru kutura mwigulu ukusamba visiuviliru ku vwali.

²⁷ Yahova yavolera engelosi iviiki kivavi chiche ihale, na engelosi yahulira.

²⁸ Daudi yalora ku yaga ndi Yahova umali kutivula lisaala lilie, kunangwa yahaana visiuviliru ku vwali ha loze lwa Arauna.

²⁹ Lihema lia Yahova lia Musa yaali ni yalomba mwigendanyama, kandi uvwali ukwi visiuviliru viasambirwa viali ni vikikiri ahukusigamira ha Gibeoni ku ing'inga yiyi.

³⁰ Navuzwa Daudi si yaali unyala kuzia yo kusigamira Nyasaye kigira yatia kivavi chi engelosi wa Yahova.