1 Kyetsinyinga 20 - KITABU KITAKATIFU

Daudi agumiraa Raba

¹ Mu ing'inga yi vitagwa viu muhiga vimera, ing'inga ya avami vaturaa kuzia kulwaana, Joabu yimilira liihe ichova, kandi niyingilira kivala cha vandu va Amoni; navuzwa mwami Daudi yaatigara inyima mu Jerusalemi. Vakumbiriza lidaala linene lia Raba, nivalidiviza ligali.

² Kifananyi cha vandu va Amoni kilangangwa Moleki chaali ni itaji yi zahabu zikilo 34. Itaji zana yaali mu ni ligina liu vuguli vudinyu ligali, lia Daudi yavugula kandi naviika mu itaji yeeye mwene. Yavugula kandi vilaanye vinyingi ligali kutura mu lidaala linene.

³ Yavugula avandu vi lidaala linene zana kandi navakola vayinziri ni misumeno, magembe gi vivia kandi ni zimbazi. Daudi yakola malala meere ku avandu va madaala gandi goosi ga Amoni. Maku oyo harara na vasaza vi liihe va yaali navo viirana Jerusalemi.

Vulwani na vandu va Filisitia

⁴ Na inyima wa yaga, uvulwani vwatanga kandi na vandu va Filisitia ha Gezeri. Yaga gaali lwa Sibekai kutura Husha yita ugundu gonene gwalangwa Sipai, na vandu va Filisitia vaguutwa.

⁵ Vulwani vundi vwali ho na vandu va Filisitia, na Elihanani muyaayi wa Jairi yita Lahami amwavo Goliati kutura Gati. Litimu lilie liali nu luvango lwu vulitu kuli muluguyu gwu mulombi wi zinguvu.

⁶ Vulwani vundi vwali ho ha Gazi uwa haali ho nu gundu ugwali ni videte sita ku vuli mukono kandi ni vino sita ku vuli kerenge. Gwaali kisukururwi chi mindu minene ja kale.

⁷ Gwalegeliza vandu va Isiraeli, kandi Jonazani muyaayi wa Shama, amwavo Daudi yagwita.

⁸ Yigi givaga giali visukululwi vi mindu ha Gazi, giitwa na Daudi na vasaza veve.