1 Kyetsinyinga 19 - KITABU KITAKATIFU

Daudi aguutaa vandu va Amoni na Siria

¹ Inyima wi ing'inga engekeeke, mwami Nahashi wa Amoni yakuza, na muyaayi weve Hanuni yagwa mwami mu vogono vwivwe.

² Mwami Daudi yavoola, “Kuduuka manyie uvulina vulahi ku Hanuni kuli baba weve Nahashi yangolera.” Kunangwa Daudi yatuma avatumwa kumuleminya mwoyo ku likuza lia baba weve. Lwa vaduuka mu kivala cha Amoni vazia kolola mwami Hanuni.

³ Vimiliri va vandu va Amoni vavoolera mwami, “Ivi uganaganaa gaveeye mu luyali lwa baba woovo ndi, Daudi utumi avasaza yava kokoleminya mwoyo? Awa! Uvatumi hano kuli avatunyirizi kolola kivala, kunangwa akiguuti!”

⁴ Kunangwa Hanuni yagumira avatumwa va Daudi, navega zinderu ziavo kandi nataandula zinguvu ziavo kutura kwigoti kuduuka ku kisindi, ma navakunga.

⁵ Vatumwa yavo vaali ni zisoni ligali kali si vaali vanyara kwirana yengo mu liiva yilio mba. Lwa Daudi yahulira ichaali ni chekoleki, yavatumira likuva ndi vamenye mu Jeriko na vavuli kwirana yengo kuduuka lwi zinderu ziavo zimera kandi.

⁶ Mwami Hanuni na vandu va Amoni vamanya ndi vamali kokora Daudi musigu wavo, kunangwa vaatunga zikilo 34,000 zie ifeza konyoora magare gu vulwani na vasikari vu kuniina ku zibarasi kutura Mesopotamia kandi kutura muvivala via Siria via Maaka na Zoba ndi vavalwanili.

⁷ Magare gu vulwani 32,000 gavaatunga kuvalwanira kandi liihe liu Mwami wa Maaka, vaza kandi nivalomba hokososa ahimbi Medeba. Avaamoni navo kandi vaza kutura mu madaala manene gaavo goosi ma nivetegekera uvulwani.

⁸ Lwa Daudi yahulira ichaali ni chekoleka, yatuma Joabu ni liihe liosi lia valuviliri.

⁹ Vandu va Amoni navo vatura nu kuvugura ovogono vwavo ha vwingiliru vwi lidaala liavo linene Raba, na avami avaari ni vazi kuvakonya ni vavugura ovogono vwavo mu milimi.

¹⁰ Joabu yalora ndi amahi ga vasigu ganyala kumwingilira imbiri kandi kutura inyima weve; kunangwa yatovola avasikari avalahi ligali ku va Isiraeli navaviika mu vogono vwavo kohenzana na Vasiria.

¹¹ Yavika avatigara vi liihe lilie mu vwimiliri vwa amwavo weve Abishai, uwamanya navaviika mu vogono vwavo kohenzana na vandu va Amoni.

¹² Joabu yamuvolera, “Nolola vandu va Siria ni vanguuta, hamba ongonye, kandi niiva vandu va Amoni valava nivakuguuta inzi ndaaza kukokonya.

¹³ Muve ni zinguru kandi avaluviriri! Gendi kulwaaniri avandu viitu vudinyu kandi madaala manene ga Nyasaye witu. Na uvulariri vwa Yahova vokolwi.”

¹⁴ Joabu na vasaza va yaali navo visunda imbiri kwingilira vandu va Siria, navo viruka.

¹⁵ Lwa vandu va Amoni valora vandu va Siria niviruka, navo kandi viruka kutura ku Abishai ni virana inyima mu lidaala linene. Maku Joabu yirana Jerusalemi.

¹⁶ Vandu va Siria vamanya ndi vamali kuguutwa na vandu va Isiraeli, kunangwa valeta amahi gaavo kutura muvivala via Siria ku lovega lwi Ivugwi wu mugera gwa Efurate kandi nivagaviika haasi hu vwimiliri vwa Shofaki, munene wi liihe liu mwami Hadadezeri wa Zoba.

¹⁷ Lwa Daudi yahulira makuva yaga, yavungiza mahi ga Isiraeli, ni yambuka mugera gwa Jorodani, kandi nagaviika mu vogono vwa go kohenzana na vandu va Siria. Vulwani vwatitira,

¹⁸ na vandu va Isiraeli vakunga liihi lia Vasiria kwirana inyima. Daudi na vasaza veve vi liihe vita avahili va magare gu vulwani ga vandu va Siria 7,000 na vasikari vu kuvirenge 40,000. Vita kandi Shofaki, munene wi liihe lia vandu va Siria.

¹⁹ Lwa avami avaari haasi hu vwamihi vwa Hadadezeri valora ndi vamali kuguutwa na vandu va Isiraeli, valomba mirembe na Daudi ma nivagwa avatumikiri veve. Kunangwa vandu va Siria si venya kandi kokonya vandu va Amoni kulwaana mba.