1 Kyetsinyinga 18 - KITABU KITAKATIFU

Uvuguuti vwa Daudi

¹ Inyima wi ing'inga engekeeke, mwami Daudi yingilira Vafilisitia, kandi, navaguuta. Yavugula lidaala linene lia Gazi harara nu tudaala twalikumbiriza, kutura mu vwamihi vwavo.

² Kandi yaguuta vandu va Moabu avamanya nivagwa avatumikiri veve kandi nivatunga uvusuuru ku ye.

³ Mwami Daudi yingilira nu kuguuta mwami Hadadezeri wa Zoba, kilala ku vivala via Siria, ahimbi ni kivala cha Hamazi, kigira mwami Hadadezeri yaali nageriza kuvugura uvwamihi vwi kivala keveeye iluhia wu mugera gwa Efurate.

⁴ Na Daudi yamunyaga magare gu vulwani 1,000 avasikari vu kuniina ku zibarasi 7,000, na avasikari vo kogenda ku virenge 20,000. Yaleka zibarasi ziduukanaa kuhila magare gu vulwani 100, navuzwa yakalaga izindi ziosi amaki nazikola ni zilema.

⁵ Lwa vandu va Siria vamenya Damasiko vaatuma liihi kuzia kokonya Hadadezeri mwami wa Zoba, Daudi yavingilira niyiita avasaza 22,000.

⁶ Maku yamanya nalomba hokososa ha mahi mu kivala chavo, na vaagwa avatumikiri veve kandi nivamutungira uvusuuru. Yahova yakola Daudi kuva muguuti hoosi ha yazizaa.

⁷ Daudi yavugula zinguva zie zahabu zia vanene va Hadadezeri vaali nazio ma nivazihila Jerusalemi.

⁸ Yavugula kandi mugasa munyingi kutura Tibuhazi na Kuni, madaala manene gamifwaa na Hadadezeri. Lwinyima, Solomoni yatumikira mugasa yigu okolomba lidangi lia mazi, zitiru kandi viju viu mugasa viu mu Litembeli.

⁹ Mwami Toi wa Hamazi yahulira ndi Daudi yaali kuguuta liihe liosi lia Hadadezeri mwami wa Zoba.

¹⁰ Kunangwa yatuma muyaayi weve Joramu kuzia kucheliza mwami Daudi kandi kumuha lizominywa kigira uvuguuti vwivwe ku Hadadezeri, uwa Toi yaali niyalwaana naye haali kanyingi. Joramu yaleetera Daudi vihaanwa vinyingi vialombwa kutura ku zahabu, Ifeza kandi mugasa.

¹¹ Mwami Daudi yavika viju zana halovega kulwuvutumiki vwa Yahova mu lisigamira harara ni feza, ni zahabu ya yavugula kutura mu zihiiri zia yaguuta - Edomu, Moabu, Amoni, Filisitia, na Vamaleki.

¹² Abishai, uwa mama weve yaali Zeruya yaguuta Vaedomu mu Livona lie Ijumbi kandi niyiita vandu 18,000.

¹³ Yasingiriza hokososa ha mahi geege mu Edomu mwosi, kandi avandu vamenya yo vaagwa avatumikiri va Daudi. Yahova yakola Daudi umuguuti havundu hoosi ha yazizaa.

¹⁴ Daudi yamiha ku vandu va Isiraeli vosi kandi nalora ndi avandu veve vakolerwa vulahi kandi nu kukalagirwa nu vulungi.

¹⁵ Joabu, muyaayi wa Zeruya, yaali munene wi liihe; Jehoshafati muyaayi wa Ahiludi yavikwa kuva umung'odi.

¹⁶ Zadoku muyaayi wa Ahitubu kandi Ahimeleki muyaayi wa Abiazari vaali avasaalisi Seraya yaali mung'odi wi kiyaalo;

¹⁷ Benaya muyaayi wa Jehoyada yaali munene ku vakerefi na vaperezi na avayaayi vu mwami Daudi vaali ni miyinzi ji igulu mu vutumiki vwavo.