1 Kyetsinyinga 17 - KITABU KITAKATIFU

Makuva gu Muporofeti Nazani ku Daudi

¹ Mwami Daudi na menyaa kalunu munyumba yeeye yu vwami, lidiku lilala yalanga muporofeti Nazani yaaze. Yamuvolera, “Hano inzi menyaa munyumba yumbakirwa misaala je midaragwa, navuzwa Lisandugu lie lilagana lia Yahova liavikwa mu Lihema!”

² Nazani yamutivulira, “Kola choosi cha oveeye nacho cha uganaganaa, kigira Nyasaye aveeye harara nivi.”

³ Navuzwa uvudiku yivwo, Nyasaye yavolera Nazani,

⁴ “Zia ovoolere mutumikiri wange Daudi ndi inzi muvooleraa, ‘Siaveeye nivi unyumbakira Litembeli menye mu mba.

⁵ Kutura ing'inga ya ndahonyia avandu va Isiraeli kutura Egebeti kuduuka lero, inzi ngikiri komenya ku mu Litembeli mba; vuli kazozo menyaa mu Mahema ning'endagenda vuzwa kutura yaaha kuzia hala.

⁶ Muligenda liange liosi harara na avandu va Isiraeli si ndeva ku kali mundu mulala ku aviimiliri va ndatovora kigira ki vakikiri kunyumbakira Litembeli liumbakirwa midaragwa.’

⁷ “Kunangwa volera mutumikiri wange Daudi ndi inzi, Yahova Wuvunyali amuvoleraa, ‘Ndaakuvugura kutura mu liaya amagondi mu milimi kandi ningokola ove mwamihi wa avandu vange Isiraeli.

⁸ Ndaaveyange harara nivi havundu hoosi ha waziyange, kandi mali kuguuta avasigu vovo vosi lwa waziyange imbiri kuvaguuta. Ndakokola umanyikane kuli aviimiliri vanene ligali mu lirova.

⁹ Kandi ndatovolera avandu vange Isiraeli havundu, kandi ndavakora vituliri, kandi vaduuki komenya nu kuhindira havundu haavo aveene, na vavuli kukubizwa kivi kandi mba; kandi avasaza vu vutindi vavuli kuvadambiza mba kuli ku maziambiri;

¹⁰ kutura ing'inga ya ndatovora avakalagi vave ku vandu vange Isiraeli; kandi ndakuha ovososi kutura ku vasigu vovo vosi. Kuvita yaga goosi, mbolera ivi ndi, Inzi ndakwumbakira inyumba.

¹¹ Lwa ukuza na oteevwe harara na avaguuga vovo, ndakora mulala ku avayaayi vovo kuva mwami munene, na ndakora uvwami vwivwe kuva vwi zinguru.

¹² Oyo alava niye ulinyumbakira Litembeli, kandi ndalora ndi endeve yeeye yu vwami ilazizagilira mihiga ni mihiga.

¹³ Ndava baba weve, naye alava muyaayi wange. Si ndatuliza ovokonyi vwange kutura kuye kuli ndakora kutura ku Saolo, uwandatuliza ku vwami kunangwa ivi uduuki kuva umwami.

¹⁴ Ndamuviika ave wuvunyali ku avandu vange kandi ku uvwami vwange mihiga ni mihiga. Uvwami vwivwe si vulava ne keheri mba.’ ”

¹⁵ Muporofeti Nazani yavolera Daudi amakuva goosi aga Nyasaye yaali namuvuuliye.

Lisaala lia Daudi lie Lisandiza

¹⁶ Maku mwami Daudi yazia mu Lihema lia Yahova, niyikara hasi, nasaara, “Inzi kinga avinyumba yange si kudukani kokolelwa goosi aga umali kongolera, Yahova Nyasaye.

¹⁷ Nitali kalunu okolaa kali manyingi ligali; umali kolomba malagano kigira ivisukulurwi viange mu mihiga guzaa, na ivi, Yahova Nyasaye wange umbuguye kuva kuli mundu munene ligali.

¹⁸ Inzi nyara kovora ki ku ivi kuvita yaga! Ivi umanyi inzi vulahi, kandi uhaanaa luyali ku inzi, mutumikiri woovo.

¹⁹ Vwali uvunyali nu vulaliri vuvwo ivi kokora yaga ku inzi, kandi kumanyia vindu vinene yivi ligali.

²⁰ O, Yahova, siaveeye ho nu mulala kuli ivi; kunyi kumanya kazozo ndi ivi weng'ine oveeye Nyasaye.

²¹ Sihaveeye ho ni ihiiri yindi ku lirova kuli Isiraeli, yawahonyia kutura mu vutugwa mu kivala cha Egebeti, ukuvalomba vave avandu vovo. Vindu vinene kandi vio kogenyia via wavakolera vimali kulandiza ulusuma lulwo mu lirova liosi. Ivi wahonyia avandu vovo kutura mu kivala cha Egebeti kandi wakunga zihiiri zindi lwa avandu vovo vazizagilira kuvingilira nu kulwaana navo.

²² Ivi umali kokora Isiraeli kuva avandu vovo ivi mwene mihiga ni mihiga, kandi ivi, Yahova, umali kuva Nyasaye wavo.

²³ “Na kalunu, O, Yahova kutwekiza kuzing'inga ziosi izizaa, lisuuvirizwa lia walomba ku inzi kandi ivisukulurwi viange, na okole aga waavola ulakola.

²⁴ Ulusuma lwi limanyikana liilio lulava lonene, kandi avandu valavoora mihiga ni mihiga, ‘Yahova Wuvunyali vwosi, aveeye Nyasaye ku Isiraeli.’ Kandi ivi ulalinda endeve yu vwami vwange mihiga ni mihiga.

²⁵ Mbeeye nu vuluviliri kusaala lisaala yili ku ivi, O, Nyasaye wange, kigira umali kumbuulira yaga goosi, inzi mutumikiri woovo, kandi umali kombolera ndi ulakola visukululwi viange kuva avami.

²⁶ Ivi, Yahova, oveeye Nyasaye, kandi umali kolomba lisuuvirizwa liokogenyia yili ku inzi.

²⁷ Ngoteva nuyanza uduuki kugasiza visukululwi viange kunangwa valaduuki kuzizagilira kusangalira ligasiza liilio. Ivi, Yahova, umali kuvagasiza vosi, kandi uvugasu vuvwo vulamenya kuvo mihiga ni mihiga.”