1 Kyetsinyinga 15 - KITABU KITAKATIFU

Daudi aleetaa Lisandugu lia Yahova mu Jerusalemi

¹ Daudi yaali niyumbaka zinyumba zizie mwene mu Jerusalemi. Yalomba kandi havundu hi Lisandugu lie Lilagana lia Nyasaye, livikwa, ma ni yumbaka ho Lihema.

² Maku Daudi yavoola, “Mundu ku vosi si alagiinga Lisandugu lia Nyasaye, nivatali ihiiri ya Levi yeng'ine, kigira nivo va Yahova yatovola valigingi kandi kutumika imbiri weve mihiga ni mihiga.”

³ Kunangwa Daudi yavuganyia avandu va Isiraeli vosi harara mu Jerusalemi vaduuki koleta Lisandugu Lie lilagana lia Nyasaye havundu ha yaali nalilombeeye.

⁴ Yalanga kandi harara visukululwi via Haruni na vandu va Levi.

⁵ Kutura ku vi kiliango cha Levi cha Kohazi, Urieli yaza ni yimiliraa aviiko veve 120;

⁶ Kutura mu vi kiliango cha Merari, Asaya yaza ni yimiliraa aviiko veve 220;

⁷ Kutura vi kiliango cha Gerishoni, Joeli yaza, ni yimiliraa aviiko veve 130;

⁸ Kutura mu vi kiliango cha Elisafani, Shemaya yaza ni yimiliraa aviiko veve 200;

⁹ kutura mu vi kiliango cha Heburoni, Eheli yaali mwimiliri wa viko 80;

¹⁰ Kutura mu vi kiliango cha Uzieli, Abinadabu yaza ni yimiliraa aviiko veve 112.

¹¹ Maku Daudi yalanga avasaalisi Zadoku na Abiazari, kandi harara na vi ihiiri ya Levi sita yava: Asaya, Urieli, Joeli, Shamaya, Elieli na Abinadabu.

¹² Yavavolera, “Munyi muveeye aviimiliri vi viliango mu ihiiri ya Levi. Kuduuka munyi harara na vandu va Levi vache vinyu mwitakase, kunangwa muve avanyala koleta Lisandugu lie Lilagana lia Yahova Nyasaye wa Isiraeli, liize havundu ha inzi mali kulilombera.

¹³ Kigira munyi vandu va Levi si mwali ho kulileeta ku ing'inga yu kutanga, Yahova Nyasaye witu yakuha amageri kulwukuvula kumusigamira kuli gakuduukiraa.”

¹⁴ Kunangwa vasaalisi na vandu va Levi vitakasa vene ku vaduuki koleta Lisandugu lie Lilagana lia Yahova, Nyasaye wa Isiraeli.

¹⁵ Vandu va Levi valigingira ku misaala ku mavega gaavo, kuli Yahova yaali ni yalaga Musa.

¹⁶ Daudi yavolera aviimiliri va va Levi okotovola vandu vi hiiri ya Levi valala vimbi zinyimbu ziu vusangali nu kukuba viju viavo vie zinyimbu vudinyu ku vukana vwi migoye, marere kandi ni vikuli viu kulangilira.

¹⁷ Kunangwa vandu va Levi vatovora Hemani muyaayi wa Joeli, mwiko weve Asafu muyaayi wa Berekia; kandi Ezani muyaayi wa Kushaya, wi kiliango cha Merari;

¹⁸ kandi harara navo kuvakonyelera, vatovora muganda gwa kaviri: Zakaria, Jaazieli, Shemiri Amozi, Jehieli, Uni, Eliabu, Benaya, Maaseia, Matizia, Elifelehu, na Mikineia. Valindi vi kirivwa vaali Obedi Edomu na Jeyeli.

¹⁹ Vimbi vaali Hemani, Asafu, na Ezani venyeka vakubi vikuli viu mugasa.

²⁰ Zakaria Azieli, Shemiri Amozi, Jehieli, Uni, Eliabu, Maaseia, na Benaya vatovolwa kukuba vukana kolondekana na Alamozi,

²¹ Navuzwa Matizia, Elifelehu, Mikineia, Obedi Edomu, Jeyeli, na Azazia vatovolwa kukuba kolondekana na Sheminizi.

²² Kenania yatovolwa kusingilira ihiiri ya Levi viimba kigira uvusiza vonene mu vwiimbi.

²³ Berekia na Elikana vatovolwa kulinda kirivwa chi Lisandugu lie Lilagana lia Nyasaye.

²⁴ Vasaalisi Shebania na Joshafati, Nezaneli, Amasai Zakaria, Benaya kandi Elieza, vatovolwa vaduuki kukuba visiliva imbiri wi Lisandugu Lie lilagana lia Nyasaye. Obedi Edomu na Jehia navo kandi vaali avalindi vi kirivwa vi Lisandugu.

Liihira lie Lilagana mu Jerusalemi

²⁵ Kunangwa mwami Daudi, vimiliri va Isiraeli na, avanene va mahi vazia munyumba ya Obedi Edomu koleta Lisandugu lie Lilagana, kandi vaali ni lisangala linene.

²⁶ Vaahana visiuviliru vie zigiriki saba na magondi saba okolola ndi Nyasaye okonyi ihiiri ya Levi avaari ni vagingi Lisandugu lie Lilagana.

²⁷ Daudi yaali niyiviiki iganza yalombwa kutura ku ikatani indahi ligali, ma kandi avimbi vivika kuli ndio, Kenania, mwimiliri wavo, kandi harara ni hiiri ya Levi vaginga Lisandugu Lie lilagana. Daudi kandi yiviika kisibaho Chi katani.

²⁸ Kunangwa vandu va Isiraeli vosi vazia harara ni Lisandugu lie Lilagana kuduuka Jerusalemi ni lihanzuka liu vusangali, ni vakuba visiliva, ling'alala kandi vikuli, kandi zinyimbu ziuvukana vwi migoye.

²⁹ Lwa Lisandugu lie Lilagana liali ni liletwa mu Lidaala linene, Mikali, mukaana wa Saolo yahenzera mwidirisha ma nalora mwami Daudi navina nu kutumatuma nu vusangali, na yamuvihilirwa mu mwoyo gwigwe ligali.