1 Kyetsinyinga 14 - KITABU KITAKATIFU

Inyumba ya Daudi mu Jerusalemi

¹ Mwami Huramu wa Tiro yatuma avatumwa ku Daudi, harara ni misaala ji midaragwa, vasiza vu kwumbakira magina na vasiza vi zimbaho, va mwumbakiri inyumba yu vwami.

² Kunangwa Daudi yamanya ndi Yahova umali kumusingiriza ave mwami wa Isiraeli, kandi yaali nalomba uvwami vwivwe kugasizwa ligali kulwa avandu veve va Isiraeli.

³ Lwa Daudi yamenya Jerusalemi, yameda kuleeta avakali vanyingi kandi ni yivula vana vayaayi na vakana vanyingi.

⁴ Yaga nigo amita ga avana va Daudi va yivulira mu Jerusalemi: Shamua, Shobabu, Nazani, Solomoni,

⁵ Ibuhari Elishua, Elipeleti,

⁶ Noga, Nefegi, Jafia,

⁷ Elishama, Beeliada na Elifeleti.

Daudi aguutaa Vafilisitia

⁸ Lwa Vafilisitia vahulira ndi Daudi umali kuvakwa maguta kuli mwami ku kivala choosi cha Isiraeli, liihi liavo liatura ni zinguru ziosi kuzia kumwenya vamugumiri. Navuzwa Daudi yahulira makuva ga valohiza ma yazia kwagana navo valwaane.

⁹ Vafilisitia vaali nivamali kwivungiza mu Livona lia Refaimu na vaali vingiliyi nukunuula utudaala twa himbi.

¹⁰ Daudi yateeva Nyasaye, “Ngazia kwingilira Vafilisitia yavo naho? Ulangonya mbaguuti?” Yahova yamutivulira, “Yee, zia uvingiliri, na ndakuha liguuta!”

¹¹ Kunangwa Daudi harara na vasaza vi liihe veve vazia kuduuka Baali Perazimu, na uwene yeyo, yaguuta Vafilisitia. Yavoola, “Nguuti avasigu vange kigira Nyasaye yangoonya kumala liihi liavo kuli mugera munene gwizuuyi gumali kutiguka.” Kunangwa havundu yaho hagulikwa Baali Perazimu.

¹² Lwa Vafilisitia virukaa valeka avanyasaye vaavo inyima. Kunangwa Daudi yahaana malago ku amahi geege ndi vasambe avanyasaye zana yavo mu muliru.

¹³ Nonoho Vafilisitia viirana mu livona yilio kandi ni vatanga kwingilira nu kunuura lidaala yilio lwa kaviri.

¹⁴ Kunangwa Daudi yateeva Nyasaye chokokola, na Nyasaye yamutivulira, “Utazia kuvingilira vulungi mba; navuzwa uvagode inyima wavo ma uvingiliri lovega lwi imbiri wi misaala je zinyengeleri.

¹⁵ Nonoho lwa uhulira muliviti gwi ligenda mu zisonga zie misaala ji zinyengeleri, tula uzie kuvingilira, kigira yago galakumanyia ndi mali kuzia imbiri woovo kuguuta liihe lia Vafilisitia.”

¹⁶ Kunangwa Daudi yakola kuli Nyasaye yamulaga. Yakunga nu kwiita liihe lia Vafilisitia, nivavalondelera kutura Gibeoni kuduuka Gezeri.

¹⁷ Kunangwa luyali lwa Daudi lwalanda kuduuka muvivala viosi, na Yahova yakola vuli ihiiri kutia Daudi.