1 Kyetsinyinga 13 - KITABU KITAKATIFU

Lisandugu lie Lilagana lia sundwa Jerusalemi

¹ Mwami Daudi yavolerana na vanene va mahi geege vosi avaari vanene va vasikari zielefu, avanene vi zimia kandi na viimiliri vosi.

² Maku yalandizira livugana liosi lia avandu va Isiraeli, “Niiva muvugiliraa kandi nivuva uvulariri vwa Yahova, Nyasaye witu, gendi kutumi avatumwa ku avaamitu viitu vandi vosi kandi ku ihiiri ya Levi mu madaala gaavo ni vivala viu vwayiru vwa go, na kuvavolere vavugane hano harara ni kunyi.

³ Hene yaho kulazia koleta Lisandugu lie Lilagana lia Nyasaye iliali nilialekwa vuzwa lwa Saolo yaali mwami.”

⁴ Avandu vosi vayanzizwa ni iganagani yeyo kandi nivavugilira kokora ndio.

⁵ Kunangwa Daudi yavuganyia harara avandu vosi va Isiraeli kutura mu kivala choosi, kutura ku lwako lwu Mugera gwa Shihori mu Egebeti mu lovega lwi Isavaalu kuduuka ha vwingiliru vwa Hamazi, mu lovega lwa Ivaale, vaduuki kuzia koleta Lisandugu lie Lilagana lia Nyasaye kutura Kiriazi-Jearimu kuuza kuduuka Jerusalemi.

⁶ Daudi harara na vandu vosi vazia mu lidaala linene lia Baala, iliveeye kovora, Kiriazi-Jearimu, mu kivala chi Ivuyuda, kuzia koleta Lisandugu lie Lilagana lia Nyasaye, iliveeye ni lieta lia Yahova “Wikalizwa ku endeve yu vwami igulu wa Vakerubi.”

⁷ Vatuliza Lisandugu lie Lilagana ichova wi inyumba ya Abinadabu kandi nivaliviika ku ligare lihia lie zing'ombe. Uza na Ahio vimilira ligare lie zing'ombe zana.

⁸ Daudi na avandu vosi va Isiraeli vavina ni zinguru ziavo ziosi ukuhaana luyali ku Nyasaye. Viimba kandi ni vakuba viju vie zinyimbu kuli; uvukana, lidungu, zindumba, zitamburini, vikuli kandi visiliva.

⁹ Lwa vaduuka koloze lwa Kidoni, Uza yanyira mukono gwigwe kusingiriza vulahi Lisandugu lie Lilagana lwa zing'ombe ziekigitala.

¹⁰ Nonoho, Yahova yavihilirizwa Uza kandi namwiita kigira yadira ku Lisandugu. Yakuzira ahene yaho imbiri wa Nyasaye,

¹¹ kunangwa havundu yaho hamala kulangwa Perezi Uza. Daudi yasinyika kigira Yahova yaali naheeye Uza amageri mu vutima.

¹² Maku Daudi yatia Nyasaye ligali, navoora, “Nyara ndi kuhila Lisandugu lie Lilagana yengo kalunu?”

¹³ Kunangwa Daudi si yamanya naahira Lisandugu lie lilagano mu Jerusalemi mba. Nitali yalihila munyumba ya Obedi Edomu, wi ihiiri ya Hiti kutura mu lidaala linene lia Gati.

¹⁴ Lisandugu lie Lilagana lia Nyasaye liamtigala ho ku mieli givaga, na Nyasaye yagasiza Obedi Edomu, avinyumba yeeye, kandi vindu viosi via yaali navio.