1 Kyetsinyinga 12 - KITABU KITAKATIFU

Valondi va Daudi vu kutanga kutura ku ihiiri ya Benjamini

¹ Yava nivo avandu vazia ku Daudi ha Zikilaga, aha yaali niyilukiyi kutura ku Mwami Saolo muyaayi wa Kishi. Vaali avandu vi zinguru avamukoonya mu vulwani.

² Vaali avasaza vu vuta na vaali vanyara kulasa uvuta nu lokova lwa magina na vaali vanyara kutumikira mukono mulungi anoho mukono mumosi, vaali vandu vi ihiiri ya Benjamini kutura mu kiliango cha Saolo.

³ Vanene vaavo vaali: Ahiezeri na Joashi, vombi vaali avayaayi va Shemaa kutura Gibea; na vasikari vaali Jezieli na Peleti avayaayi va Azimavezi; Beraka na Jehu kutura Anazozi,

⁴ Ishimaya kutura Gibeoni, musikari wamanyikana, kandi mulala ku vimiliri salasini va; Jeremia, Jahazieli, Johanani, Jozabadi kutura Gedera,

⁵ Eluzai, Jerimozi, Bealia, Shemaria, na Shefatia kutura Hariti;

⁶ Elikana, Ishia, Azareli, Joezeri na Joshobeamu, kutura mu ihiiri ya Kora,

⁷ Joela na Zebadia, avana va Jerohamu kutura Gedori.

Valondi va Daudi kutura mu ihiiri ya Gadi

⁸ Kutura mu ihiiri ya avandu va Gadi ni vazia ku Daudi mu imbinga iyaali mu ligendanyama. Vaali avandu vi zinguru kandi avaluviriri mu vulwani, avaari nu vogeri vwu kulwaanira zinguva na matimu, mu moni mwavo mwaali kuli mu zimoni zie zisimba, vaali ni zimbiru kuli zimbongo ku vigulu:

⁹ Munene wavo yaali Ezeri, Obadia yaali wa kaviri ku munene, na Eliabu wa kavaga,

¹⁰ Mishimana wa kane, Jeremia wa katano,

¹¹ Atai wa sita, Elieli wa saba,

¹² Johanani wa munane, Elizabadi wa tisa,

¹³ Jeremia wi likomi, Makibanai wa likomi na mulala.

¹⁴ Vandu yava vosi kutura mu ihiiri ya Gadi, vaali avanene vi liihi lia avasikari, umukekeke ku vosi, yasingilira avasikari imia indala na uwaali munene ku vosi, yaali igulu ku vandu elefu indala.

¹⁵ Yava nivo avasaza avambuka mugera gwa Jorodani mu mweli gwu kutanga, lwu mugera gwene yigu gwaali ni gwizuuyi zimbega ziagwo ziosi. Avasaza yava vasalanyia avandu vosi avamenyaa mu mavoona ku lovega lwi Ivugwi nu ku lovega lwi Imadioli.

Valondi va Daudi kutura mu zihiiri zia Benjamini na Yuda

¹⁶ Lidiku lilala muganda gwa vasaza kutura ku ihiiri ya Benjamini na Yuda vazia mu imbinga mwa Daudi yaali.

¹⁷ Daudi yazia ku vaaganira navoora, “Niiva muzaa kuli avalina kongonya, mwingiliziywi hano nu murembe. Navuzwa niiva muzaa kunzaama nu kumbika ku vasigu vange, kali niiva si ndageriza kumusaliriza, Nyasaye wa vaguuga viitu alamanya amakuva yaga na alamuha amageri.”

¹⁸ Maku Roho gwa Nyasaye yaza ku Amasai, uwaali munene wa vandu Salasini, ma navoora, “O, Daudi mwana wa Jese, kunyi koveeye avoovo! Mirembe, mirembe ku ivi, mirembe give ku yavo avakonyaa ivi! Kigira Nyasaye woovo alakokoonya.” Hene yaho Daudi yavingiriza, navakola avanene mu liihi lilie.

Avalondi kutura ku Manase

¹⁹ Lwa Daudi yaali nazizaa harara na Vafilisitia kulwaana mwami Saolo, avasikari valala kutura mu ihiiri ya Manase vazia ku lovega lwa Daudi. Navuzwa si yakoonya Vafilisitia, Kigira avami vaavo vaatia ndi yaali unyala kuvazaama ku Saolo, munene weve wa maziambiri; Kunangwa vamutuma yirani Zikilaga.

²⁰ Yava nivo avasikari kutura ku Manase vazia ku lovega lwa Daudi lwa yaali ni yirana: Adina, Jozabadi, Jediyeli, Mikaeli, Jazabadi, Elihu na Zilezai. Mu kivala cha Manase vaali na avasaza avanene elefu indala.

²¹ Vatumikira Daudi kuli munene mu vulwani vwivwe, kigira vosi vaali avasikari vi kivigu ligali. Lwinyima vamanya nivakolwa avasikari mu liihi lia vandu va Isiraeli.

²² Vuli lidiku avasaza avahia vazizagilira kuzia ku Daudi kumukoonya, kuduuka lwa liali ho liihi linene ligali, kuli Liihi lia Nyasaye.

Avasaza va amahi ga Daudi

²³ Yili nilio livalizwa lia vasikari vi liihi, avaazia ku Daudi ha Heburoni kugirung'anyia uvwami vwa Saolo kuzia ku Daudi, kolondekana ni likuva lia Yahova:

²⁴ Vasaza va Yuda vaginga zinguva na matimu vaali 6,800,

²⁵ Vandu va Simihoni vikivigu novosoga vwu kulwaana vaali 7,100,

²⁶ Vandu va Levi vaali 4,600,

²⁷ Jehoyada wa kisukururwi cha Haruni, yaali na vandu 3,700.

²⁸ Zadoku; musoleri mulwaani muluviliri yaali na avanene 22 kutura mu avinyumba yeeye.

²⁹ Vasaza va Benjamini, vi ihiiri ya Saolo vaali 3,000, na avanyingi kuvo vaali avasuuvirifu ku vwami vwa Saolo.

³⁰ Vandu va Efuraimu, avalwaani vi kivigu, vi lizominywa mu viliango viavo vene, vaali 20,800.

³¹ Vandu vatovolwa kutura mu ihiiri ya manase yi madioli kuzia kokora Daudi mwami vaali 18,000.

³² Vandu va Isakari, avaari ni limanyiriza lie zing'inga, zindahi kumanya icha Visiraeli vaduukana vakole, vaali avanene 200 harara na vandu vaali haasi hu vunyali vwavo.

³³ Vandu va Zabuloni avasikari vi limanya linene, avaari avetegeke kutumikira zing'ano ziosi zie viugi mu vulwani, avaari vasuuvirifu ku Daudi vaali 50,000.

³⁴ Vandu va Nafutali vaali aviimiliri 1,000 harara na avasaza 37,000 avagingaa vizingavo na matimu.

³⁵ Vandu va Dani vaali 28,600 avivika viuma viu vulwani.

³⁶ Vandu va Asheri vaali 40,000 avaari vigizwa kuzia mu vulwani.

³⁷ Vandu va Rubeni na Gadi, harara na Manase kutura engereka wu mugera gwa Jorodani vaali 120,000, avasaza vaali no vogeri vwu kutumikira iviugi vie zing'ano ziosi viu vulwani.

³⁸ Vasaza yava vosi, vazia mu Heburoni ni vetegeki ku vulwani nu mwoyo mulala kokora Daudi ave mwami ku vandu vosi va Isiraeli. Vandu vandi vosi va Isiraeli vahambana ku gene yago.

³⁹ Vaali mu Heburoni harara na Daudi ku madiku gavaga, nivalizaa nu kunwa kandi ni vasangala, kigira avamwavo vaavo vavetegekera vulahi.

⁴⁰ Kali avatende vaavo, kali avaari Ivaale ihale kuli Isakari, Zabuloni na Nafutali vaza ni vagingi viukulia ku zibunda, zing'amia, zisukiri ni zilaho. Ziaginga viukulia zing'ano zinyingi: Vusie, zimango zia makuyu, visakanyi vie mizabibu miumu, iwaini na amaguta. Valeta kandi mitugu je zing'ombe na magondi ni vita ni valia, kigira vwali uvusangari mu kivala cha avandu va Isiraeli.