1 Kyetsinyinga 10 - KITABU KITAKATIFU

Likuza liu Mwami Saolo na vayaayi veve

¹ Vafilisitia valwaana uvulwani na Vandu va Isiraeli ku Kiguru cha Giliboa. Vandu va Isiraeli vanyingi viitirwa ukwene yikwo, na avandi, harara nu Mwami Saolo kandi na vayaayi veve, viruka.

² Navuzwa Vafilisitia valondelera Saolo vudinyu, ma niviita vavaga ku avayaayi veve; Jonazani, Abinadabu na Malikishua.

³ Vulwani vwakumbiriza Saolo ni vutitira ligali, na yalaswa ni zisere zia vasigu, kandi yasalirizwa vudamanu ligali.

⁴ Yavolera musoleri wamugingiraa iviugi vivie, “Somola kivavi chicho na umalirize, ukwigalira avasindi vatamanyi Nyasaye yavo vavuli kundeganyia.” Navuzwa mugiingi wi viugi oyo yatia ligali okokora ndio. Kunangwa Saolo yavugula kivavi chiche mwene, ma naagwa kucho.

⁵ Lwu mugiingi wi viugi vivie yalora Saolo nakuzi, naye kandi yagwa ku kivavi chiche, nakuza.

⁶ Kunangwa Saolo na vayaayi veve vavaga vakuza vosi, nu uvwami vwivwe vwahera.

⁷ Lwa avandu va Isiraeli, avamenyaa mu livona lia Jezireeli vahulira ndi liihe liruki kandi Saolo na vayaayi veve vakuzi valeka madaala gaavo ni viiruka. Maku Vafilisitia vaza nivamenya mu madaala gaavo.

⁸ Ku lidiku lialonda ku, inyima wu vulwani, Vafilisitia vazia kulanya miviri ja vakuzu; na vanyoola miviri ja Saolo na vayaayi veve ni gigoni ku Kiguru cha Giliboa.

⁹ Vakala mutwi gwa Saolo, nivanaavura iviuma vivie, ni vatuma avatumwa navio mu kivala cha Filisitia choosi okovolera ivifananyi viavo via vasigamira kandi avandu vaavo amakuva malahi yaga.

¹⁰ Vaviika iviuma vivie mu lilala ku matemberi, kandi ni vasunga mutwi gwigwe mu Litembeli munyasaye wavo Dagoni.

¹¹ Lwa avandu vosi va Jabeshi mu Gileadi vahulira aga vandu va Filisitia vaali nivakoli ku Saolo,

¹² avasaza valuviliri vaavo vosi vazia kuvugura miviri ja Saolo na vayaayi veve nivagihila Jabeshi. Vagiyavira isi wu musaala gwa mwaloni. Na vahonga lilia ku madiku saba.

¹³ Kunangwa Saolo yakuza kigira livula kuva musuuvirifu ku Yahova. Yatinguha malago ga Yahova. Yageriza konyoora zing'anagani kutura ku roho wa vakuzu

¹⁴ mu vogono vwo kwenya zing'anagani kutura ku Yahova. Kunangwa Yahova yamwita, kandi nahaana uvwami mu makono ga Daudi muyaayi wa Jese.