1 Avami 9 - KITABU KITAKATIFU

Nyasaye Yaloleka ku Solomoni kandi

¹ Inyima wa Solomoni yaali niyakamara kwumbaka Litembeli kandi inyumba yu vwami kandi nivindu vindi viosi via yenya kwumbaka,

² Yahova yaloleka kuye kandi, kuli yaali naloreki kuye ha Gibeoni.

³ Yahova yamuvolera, “Mali kuhulira lisaala liilio. Mali kutakasa Litembeli lia wumbaki yili kuli havundu ha sigamirwa mihiga ni mihiga. Ndahalinda nukuhakinga ku zing'inga ziosi.

⁴ Niiva ulandumikira nu vusuuvirifu vwosi, nagiligali gu mwoyo kandi nuvulungi kuli Baba woovo Daudi yakola, kandi niiva ulahulira malago gange goosi, nokokola vindu viosi via ngulaga,

⁵ ndadukiza lisuuvirizwa lia ndalomba ku Baba woovo Daudi lwa ndamuvolera ndi Isiraeli valamiifwa kazozo ni kisukururwi chiche.

⁶ Navuzwa niiva ivi anoho visukululwi vivio vilaleka kononda niiva ulavula kuhulira malago ni miima ja mali kuha munyi, nukusigamira avanyasaye vandi,

⁷ Maku ndatuliza vandu vange Isiraeli mu kivala cha mali kuvaha. Kandi ndaleka Litembeli yili lia mali kutakasa kuli havundu ha sigamirwa. Vandu havundu hoosi valakolera Isiraeli kehenyahenye

⁸ “Litembeli yili lilagwa kitumi cha mang'anye, kandi vuli mundu mulala uvitira ho alegosa nokogenya. Alateeva, ‘Kigira ki Yahova naakora ndi ku kivala yiki kandi ku Litembeli yili?’

⁹ Avandu valativura, ‘Gaveeye kigira valeka Yahova Nyasaye wavo, watuliza avaguuga vaavo mu kivala cha Egebeti. Vatumikira kandi nivasigamira avanyasaye vandi. Yicho nicho chagira Yahova naleta kivi yiki kuvo.’ ”

Lilagana lia Solomoni na Huramu

¹⁰ Solomoni yavugula mihiga sirini kwumbaka Litembeli ni inyumba yeeye yu vwami.

¹¹ Mwami Huramu wa Tiro yaali naamuheeye midaragwa josi nimisaala ja makaratasi kandi ni izahabu yoosi ya yenya kokolera miyinzi yiji josi. Inyima wa Vaali nivakamara miyinzi yiji, Mwami Solomoni yaaha Huramu madaala manene sirini mu kivala cha Galilaya.

¹² Mwami Huramu yazia kugalola, na siyagayaanza mba.

¹³ Kunangwa yavolera Solomoni, “ Amiitu wange kuyaga nigo madaala ga ombeeye!” Ku kivuni yiki, kivala yicho havundu yaho ha kilangwa Kabuli,

¹⁴ Huramu yaali naatumiyi Solomoni izahabu ivita zikilo zielefu zine.

Miyinzi jindi ja Solomoni

¹⁵ Mwami Solomoni yatumikira miyinzi ju kuniga kwumbaka Litembeli ninyumba yeeye yu vwami, kwizuliza mu marova ku lovega lwi ivugwi lwi imbinga ya Milo, lidigi lia Jerusalemi, kandi na madaala ga Hazori, Megido na Gezeri.

¹⁶ Mwami wa Egebeti yaali niyingiliyi lidaala linene lia Gezeri nukuligumira, niyiita avamenyaa mulio kandi kulisamba. Maku yaalihaana kuli kihanwa che keserero lwa yaleetwa na Solomoni kuva mukali weve,

¹⁷ na Solomoni yaliumbaka vuhia. Natumikira miyinzi jukuniga, Solomoni kandi yumbaka vuhia madaala ga Gezeri, Bezi-horoni,

¹⁸ Bahalazu, Tamara mwigendanyama lie Ivuyuda,

¹⁹ madaala manene ga mavikiru geege gaviikwa. Madaala manene gi zibarasi na magare gu vulwani, kandi vindu vindi viosi via yenya kwumbaka mu Jerusalemi mu Lebanoni kandi na hoosi mu vwamihi vwivwe.

²⁰ Vandu vosi vatigara kutura ku vandu va Amori, Ahiti, Ahivi, Aperezi, Jebusi; avandu yava sivaali vandu va Isiraeli mba;

²¹ agaveeye kovora visukululwi viavo viatigala mu kivala, J avandu va isiraeli vakula kudiviza, yava, Solomoni yavang'oda vave ku miyinzi juvutumwa, nindio voveeye ku lidiku lia lero.

²² Solomoni siyakola vandu va Isiraeli vatugwa mba; vaatumika kuli vasikari vuvulwani veve, vimiliri veve vimiliri va mahi veve, vimiliri va magare veve, avanene va magare gu vulwani kandi avizibarasi ziuvulwani.

²³ Haali ho na vimiliri 550 vasingilira miyinzi ja Solomoni jukuniga vayinziranga ku miyinzi ju vwumbaki lugano lugano.

²⁴ Solomoni yumbaka vika via marova ku lidigi lie lidaala linene lie Ivugwi, inyima wu mukali weve, mukaana wu mwami wa Egebeti, niyakamara kutura mu Lidaala linene lia Daudi kuzia muinyumba yu vwami ya Solomoni yaamwumbakira.

²⁵ Haali kavaga ku muhiga, Solomoni yahaana vihaanwa viu kusambwa kandi vihaanwa vie mirembe ku vwali vwa yaali ni yumbakiyi Yahova. Yasambira Yahova vimuli. Nindio, lwa yamala kwumbaka Litembeli.

²⁶ Mwami Solomoni yalomba kandi zimeri zinyingi zia mahi ha Ezionigeberi, iliveeye ahimbi Elazi, kuluginga lwi Inyanza ya Agaba mu kivala cha Edomu.

²⁷ Mwami Huramu yatuma aveleemi vi limanya linene kutura mu zimeri zizie ziu vulwani kutumika harara na valala ku vandu va Solomoni.

²⁸ Veelema kuduuka mu kivala cha Ofura, kandi nivaleetera Solomoni zahabu ivita zikiloguramu 14,000.