1 Avami 8 - KITABU KITAKATIFU

Lisandugu lie lilagana liletangwa mu Litembeli

¹ Maku Mwami Solomoni yalanga harara vimiliri vosi vi zihiiri ni viliango via Isiraeli vaze kuye mu Jerusalemi vaduuki kuhila Lisandugu lie Lilagana lia Yahova kutura Ziyoni, Lidaala lia Daudi, kuduuka mu Litembeli.

² Avasaza vosi va Isiraeli vavugana harara imbiri wu mwami Solomoni mu ing'inga yi Lilia lie vidioli ku mweli gwa Ezanimu, mweli gwa saba.

³ Lwa aviimiliri vosi vaali nivakavunga harara, avasaalisi vaginga Lisandugu lie Lilagana,

⁴ valihila mu Litembeli. Vandu vi hiiri ya avasaalisi vahiraa Lihema liu kuvuganira mu na Yahova kandi niviju vitakatifu vialio viosi mu Litembeli.

⁵ Mwami Solomoni na avandu vosi va Isiraeli vavugana harara imbiri wi Lisandugu lie Lilagana kandi nivahaana visiuviliru vinyingi via magondi ni zing'ombe zinyingi ligali, zitanyala kuvalizwa.

⁶ Maku avasaalisi vaginga Lisandugu lie Lilagana kulihila mu Litembeli kandi nivaliviika Havundu Hatakatifu ligali, Hasi, tisi vikerubi.

⁷ Zimbaha ziavio zianyilika ziafuma lisandugu kandi misaala ja liagingilwa ku.

⁸ Zisonga ziemisaala zana jaali ginyala kololeka ku woosi wasingilanga imbiri wa Havundu Hatakatifu ligali, navuzwa kutura havundu handi mba. Misaala zana jikiri ho kuduuka lero.

⁹ Kindu sichali musi mwi Lisandugu Lielilagana nivitali vibaho viviri via magina via Musa yaali niyaviika mu ha Kiguru cha Sinai, lwa Yahova yalomba lilagana na vandu va Isiraeli; ku ing'inga ya vaali nivatulanga mu kivala cha Egebeti.

¹⁰ Lwa vasaalisi vaali nivaturaa mu Litembeli, nonoho malesi gizura mu,

¹¹ gaaka nuvulavu vohemahemanga kuli loheni lwi liiva liu uvukumi vwa Yahova, kandi sivali vanyara kwirana mu kokora miruka jaavo mba.

¹² Maku Solomoni yasaala navoora: “Ivi, O, Yahova umali kuviika liuva mu vwerefu igulu, nitali ivi umali kotovola komenya mu malesi kandi mu kisundi.

¹³ Kalunu inzi mali kukwumbakira Litembeli linene liuvukumi, havundu ha omenya mihiga ni mihiga.”

Solomoni amolomaa ku avandu

¹⁴ Lwi livugana lia vandu vosi va Isiraeli vaali nivasingiyi ho, Mwami Solomoni yagirung'ana kuvahenza kandi nateeva Nyasaye avagasizi

¹⁵ Hene yaho yavoola: “Yahova Nyasaye wa Isiraeli yizominywi! Umali kutwekiza lisuuvirizwa lia yalomba ku baba wange Daudi, lwa yavoola,

¹⁶ ‘Kutura ing'inga ya ndatuliza vandu vange mu kivala cha Egebeti, ningikiri kotovola lidaala linene ku goosi mu kivala choosi cha Isiraeli mwi Litembeli linyala kwumbakwa na ha nyara kusigamirwa. Navuzwa ndatovora ivi, Daudi, kwamiiha vandu vange.’ ”

¹⁷ Kandi Solomoni yaazizagilira, “Baba wange Daudi, yalohiza kwumbaka Litembeli kigira lisigamira lia Yahova Nyasaye wa Isiraeli,

¹⁸ navuzwa Yahova yamuvolera, ‘Ivi oveeye vulungi mu lienya kunyumbakira Litembeli,

¹⁹ navuzwa ivi siulaliumbaka mba. Muyaayi woovo mwene niyie uliumbaka Litembeli liange.’

²⁰ “Kalunu Yahova Umali kutwekiza lisuuviriza lilie. Inzi mali kuvugura vogono vwa baba wange kuli mwami wa Isiraeli, kandi mali kwumbaka Litembeli kigira lisigamira lia Yahova Nyasaye wa Isiraeli.

²¹ Mali kuhaana havundu mu Litembeli kigira Lisandugu lie Lilagana liveeye mu ni vibaho via magina vie Lilagana lia Yahova yalomba na vaguuga viitu lwa yavatuliza mu kivala cha Egebeti.”

Lisaala lia Solomoni

²² Hene yaho, imbiri wa vandu, Solomoni yazia nasingira imbiri wu vwali wa Yahova, uwa yaginga makono geege mwigulu

²³ nasaara, “O, Yahova Nyasaye wa Isiraeli, sihali na nyasaye kuli ivi mwigulu igilu anoho mu musi mu lirova!

²⁴ Ivi udukiza lilagana liilio na avandu vovo kandi uvamanyia vuyanzi vuvwo lwa vamenya mu lisuuviriza lia walomba ku baba wange Daudi; Lero vuli likuva limali kutwekizwa.

²⁵ Kalunu, Yahova Nyasaye wa Isiraeli, saalanga ndi ivi kandi uladukiza lisuuviriza lindi lia walomba ku baba wange Daudi, lwa wamuvoolera ndi halava ho na mulala ku visukululwi vivie niyamiha kuli mwami wa Isiraeli; niiva vilahulira ivi vulahi ligali kuli yakola.

²⁶ Kunangwa, kalunu, O, Nyasaye wa Isiraeli, leka makuva goosi gaduuki kuva giligali ga wasuuviriza baba wange Daudi, mutumikiri woovo.

²⁷ “Navuzwa, ukaveeye unyala O, Yahova Nyasaye, komenya ligali mu lirova? Kali ligulu liosi siliveeye linene linyala kuduuka ivi omenye mulio, kunangwa Litembeli yili lia inzi mali kwumbaka linyala kuva linene likuduuka?

²⁸ Yahova Nyasaye wange, inzi mbeeye mutumikiri woovo. Hulira lisaala liange na uhaane mativuli ku lianira lia ngoteva kalunu.

²⁹ Linda Litembeli yili mbasu nuvudiku, havundu hano ha ivi umali kotovola usigamirwi ho. Yaanza uhuliri lisaala liange lwa nyumika Litembeli yili nukusaala.

³⁰ Hulira masaala gange kandi masaala ga vandu vovo, lwa vahenza havundu yaaha nukusaala. Noveeye hango hoho mwigulu, ukuhuliri, kandi ukusamihi.

³¹ “Lwa mundu yonera mutende weve ma yenyeka yisuuhi ma yaaze kwisuuhira imbiri wu vwali vuvwo mu Litembeli yili, kwisuuha ndi siaveeye nimbala,

³² O, Yahova, hulira noveeye mwigulu na ukalagiri vatumikiri vovo. Haana mageri ku muhioli kuli gamudukira, na ulakuuli oyo utali nimbala ave.

³³ “Lwa vandu vovo Isiraeli vaguutwa na vasigu vaavo kigira vamali kokora uvwoni, ma kandi lwa vagirung'ana ku ivi na vaza mu Litembeli yili, nivakugonyaa nu mwoyo gwosi vasamiifwi,

³⁴ hene yaho, mwaza, hulira noveeye mwigulu na usamihi avandu vovo Isiraeli, kendi uviranyie mu kivala cha waha anaku vaguuga vaavo.

³⁵ “Lwu ugumira imbura ivuli kukuba kigira vandu vovo vamali kokolera vwoni, ma kandi lwa viganira nokohenza Litembeli yili, nokokogonya nu mwoyo gwosi,

³⁶ uhuliri lisaala liavo noveeye mwigulu. Samiiha mwami kandi vwa avandu va Isiraeli. Uvigizi vakole gaveeye malungi. Hene yaho O, Yahova, tuma imbura ku kivala chicho kinu, cha waha vandu vovo kuli miandu ji mihiga ni mihiga.

³⁷ “Lwa haveeye ni inzara mu kivala anoho maduywa, kinga kemeyi, anoho uvuguku anoho zisigi anoho zingungu; anoho lwa vasigu vakumbiriza madaala manene goosi, anoho lwi kivi kiduukaa anoho vulwaye nivuza hagati haavo,

³⁸ huliriza ku lisaala liavo. Niiva mulala ku avandu vovo Isiraeli, kuturana no vovereri vwu mumwoyo, valanyira makono gaavo mu lisaala kohenziza ku Litembeli yili,

³⁹ hulira lisaala liavo. Uvahulirizi noveeye yengo woovo mwigulu, uvasamihi, kandi uvakonye. Ivi weng'ine umanya zing'anagani ziu mumwoyo gwu mundu. Kolera sa mulala kuli adukanaa akolerwe,

⁴⁰ Kunangwa vandu vovo vaduuki kukuhulira zing'inga ziosi zia vamenya mu kivala cha waha nakuavaguuga viitu.

⁴¹ “Kandi ndio, lwu mugeni utaveeye mulala ku vandu vovo Isiraeli, navuzwa umali kuuza kutura mu kivala chi hale kigira uhuliyi lusuma lwi lieta liilio,

⁴² kandi vindu vinene nis viezingulu via wakolera vandu vovo, ma yaaze kukusigamira kandi kusaala ha Litembeli yili,

⁴³ huliriza ku lisaala lilie. Mwigulu, mwa ivi omenyi, umuhuliri kandi umukolere cha akoteeva, kunangwa vandu vosi vi lirova vaduuki kumanya ivi kandi vaduuki kutia ivi, kuli vandu vovo Isiraeli vakolanga. Hene yaho valamanya ndi Litembeli lia inzi mali kwumbaka yili ni havundu ha ivi unyala kusigamirwa.

⁴⁴ “Lwu ulaga vandu vovo vazie muvulwani kulwaana avasigu vaavo, kandi nivasaara ku ivi, hoosi havaveeye, nivahenzi ku lidaala linene yili lia ivi umali kotovola, kandi Litembeli yili lia inzi mali kukwumbakira,

⁴⁵ huliriza ku lisaala liavo. Uvahuliri noveeye mwigulu, na uvahe liguuta.

⁴⁶ “Lwa vandu vovo vakokolera vwoni, kigira sihaveeyeho numundu utakola vwoni, na muvutima vuvwo oleka vasigu vaovo vavaguuti, nukuvahila kuli avahambe mu kivala kindi, kali niiva kivala kindi yicho keveeye ihale,

⁴⁷ huliriza ku lisaala lia vandu vovo. Niiva wene yeyo mu kivala yicho valiganira nukusaala ku ivi, niviganira vwoni vwavo kandi vudamanu vwavo, hulira lisaala liavo O, Yahova.

⁴⁸ Niiva wene yeyo, mu kivala kindi yicho, valiganira mu giligali kandi nu mwoyo gwosi, ma vasaale ku ivi nivahenzi ku kivala yiki cha waha naku vaguuga viitu, lidaala linene yili lia umali kotovola kandi. Litembeli yili lia inzi mali kukwumbakira ivi,

⁴⁹ hene yaho uhuliri ku lisaala liavo kandi ligoonya liavo. Yengo woovo mwigulu uvahuliri kandi uvavere zimbavasi.

⁵⁰ Samiiha vwoni vwavo vwosi, kandi liebaala liavo liosi ku ivi, kandi olombe vasigu vaavo vavakolere vulahi.

⁵¹ Vaveeye vandu vovo kandi miandu jijo, avandu kutura Egebeti, kutura hagati hi kisambiru chi kivia.

⁵² “O, Yahova Wuvunyali, leka zimoni zizio ziduki kolola ligoonya liange, mutumikiri woovo, kandi ligoonya lia avandu vovo. Isiraeli, uvahuliri lwa vakwanira.

⁵³ Ivi wavaahulira kutura hagati ha vandu vosi vi lirova kuva miandu jijo, kuli wavatovola kuvitira mu Musa, Mutumikiri woovo, lwa waleeta avaguuga viitu kutura Egebeti.”

Lisaala liukumaliriza

⁵⁴ Inyima wa Solomoni yaali niyakamara lisaala kandi ligoonya yili liosi ku Yahova, yasingira imbiri wu vwali vwa Yahova, aha yaali nasigami, na gingi makono geege mwigulu.

⁵⁵ Yasingira nateeva Nyasaye kugasiza livugana nu mwoyo munene, navoora,

⁵⁶ “Yahova yizominywi, umali kuhaana mirembe ku vandu veve Isiraeli, kuli yaavasuuviriza. Siliveeye ho ni likuva lilala liavula kutwekizwa ku lisuuvirizwa lilie lilahi lia yavoola kuvitira mu Musa, mutumikiri weve.

⁵⁷ Yahova Nyasaye wiitu ave ni kunyi kuli yaali na vaguuga viitu; atakoleka kandi atakoleka mba.

⁵⁸ Yahova agirung'anyie mioyo jietu jiyeeke kuye, kogenda mu zinzira zizie ziosi kandi kugumira malago geege, likalaga lilie kandi miima jije, ja yalaga vaguuga viitu.

⁵⁹ Kandi leka makuva gange yaga, ga inzi mali kusaala imbiri woovo, gave himbi ku ivi, Nyasaye wiitu umbasu nu vudiku, kandi uduukize likora liu mutumikiri woovo, kandi lia avandu vovo Isiraeli kolondekana nilienya lia vuli lidiku;

⁶⁰ kunangwa vandu vosi vilirova vaduuki kumanya ndi ivi Yahova wengine ovveye Nyasaye; kandi sihali nuwundi mba.

⁶¹ Kunangwa, leki mioyo jinyu jive midukiru kandi jiligali ku Yahova, Nyasaye wiitu, kogenda no komenya mu zinzira zizie ziosi kogenda mu miima jije, kandi kugumira malago geege, kuli gaveeye lidiku lia lero.”

Lisaalisa Litembeli

⁶² Maku mwami Solomoni na vandu vosi avaari harara naye, vaahana visiuviliru imbiri wa Yahova.

⁶³ Solomoni yahaana zigiriki 22,000, magondi 120,000, kuli vihaanwa vie mirembe. Kunangwa mwami harara na avandu vosi va Isiraeli vasaalisa (Lilembeli).

⁶⁴ Lidiku lilala liere, mwami yatakasa hagati hu mugizi gwaali imbiri wi Litembeli; kigira hene yaho, yahaanira ho kihanwa chukusambwa, kihanwa chuvuswage, kandi vidonye viezitinya zie vihaanwa vie mirembe, kigira vwali vwu mugasa vwali imbiri wa Yahova vwali vokekeeke ligali, Vwavula kuva nuvwiyangu vwu kusambirala vihaanwa viosi, viuvuswage, kandi zitinya zie vihaanwa vie mirembe.

⁶⁵ Kunangwa Solomoni yalomba lilia ing'inga yeyo, na vandu vosi va Isiraeli vaali harara naye, Livugana linene kutura mu vwingiliru vwa Hamazi kuduuka mu Ivaale kandi kutura ku lwako lwa Egebeti vaali ni lilia; imbiri wa Yahova Nyasaye wiitu ku madiku saba.

⁶⁶ Ku lidiku lia munane, yaasindukiza vandu vazie. Vagaasiza mwami ma ni vazia yengo wavo nuvusangali kandi nuvuyanzi mu mioyo jaavo kigira vulahi vwosi vwa Yahova Nyasaye wavo yaakolera Daudi mutumikiri weve kandi ku vandu veve, Isiraeli.