1 Avami 7 - KITABU KITAKATIFU

Solomoni yumbaka inyumba yeeye yu vwami

¹ Solomoni kandi yiyumbakira mwene inyumba yu Vwami, na yaamuvugula mihiga likomi na jivaga.

² Yumbaka Inyumba yu Mulitu gwa Lebanoni; uvutambi vwayo vwali zimita 44 nu uvugika Vwaalia zimita 22, uvudiguluku kuzia igulu vwali zimita 13.5. Yumbakwa ku zimbaho ziezitiru zie midaragwa ziadiira mialiru ji midaragwa jakongwa.

³ Nayo yaavimbirwa midaragwa igulu wi mialiru jaagona ku zitiru 45, zitiru 15 mu vuli ligelekana.

⁴ Zimbaho zia madirisha ziali ho mu zimbaho zivaga, kandi madirisha gahenzana mu vika vivaga.

⁵ Miliango na madirisha goosi gaali ni zimbaho zialeng'ana vutambi vwombi kandi vwimbi vwombi, kandi zimbaso zivaga zia madirisha mu vuli lidigi ziahenzana ni zimbaso zia madirisha gandi.

⁶ Yalomba vuhiru vwi zitiru; vutambi vwavwo vwali zimita 22 kandi vugika vwali zimita 13.5; haali ho nulusimbu imbiri wavwo lwakunikwa, na lwadiirwa ni zitiru.

⁷ Keng'oze che Endeve yu Vwami, chalombwa kandi Vuhiru vwi Likalaga, vwa Solomoni yakalagiraa viina, vwali ni zimbaho zie midaragwa ziahambanywa ku madigi kutura hasi, kuduuka ku lirungi.

⁸ Zinyumba zia Solomoni yamenya mu mugizi gundi inyima wu vuhiru vwe Likalaga, ziumbakwa kuli zinyumba zindi. Yumbakira kandi mukali weve, mukaana wu mwami wa Egebeti, inyumba yulugano lulala lwere.

⁹ Zinyumba yizi ziosi kandi mugizi munene, ziumbakirwa amagina malahi guvuguli vonene ligali, kutura ku misingi kuduuka ku visegese. Amagina gavaazirwa ha gayavwa kandi nigavazwa kolondekana ni kibimu kandi zimbega ziu mugati kandi zie chova ziago ni gavazwa ne misumeno.

¹⁰ Misingi jumbakirwa amagina manene ligali agavazirwa ha gayavwa, malala kugo gaali zimita 3.5 vutambi na gandi nigava zimita 4 vutambi.

¹¹ Kwigulu kwago, kwaali ku na magina gandi; gakalwa ku kibimu, kandi ni mialiru ji midaragwa.

¹² Mugizi gwi nyumba yu Vwami, mugizi gwu mugati gwi Litembeli kandi keng'oze chu vwingiliru vwi Litembeli viali na madigi gakunikwa nuluvaso lulala lwe mialiru ji midaragwa ku vuli zimbaso zivaga zia magina gavazwa.

Miyinzi ja Huramu

¹³ Mwami Solomoni yatumana mundu walangwa Huramu, muturi wamenyaa mu lidaala linene lia Tiro, waali wilimanya linene mu litula migasa.

¹⁴ Baba weve, waali ni yakuza, yaatulaa Tiro, kandi naye yaali muturi wi migasa wizura vogeri nilimanya; mama weve yatura mu ihiiri ya Nafutali. Huramu yaali musiza mugeri kandi wilimanya linyingi ligali Yaavugilira votovoli vwu Mwami Solomoni yamutovola kusingilira miyinzi josi ju mugasa.

Zitiru ziviri ziumugasa

¹⁵ Huramu yaalonga zitiru ziviri ziumugasa. Vuli ndala yaali zimita 8 vutambi kuzia igulu na zimita 5.3 mu likumbiririza; kandi naziviika ha vwingiliru vwi Litembeli.

¹⁶ Yalomba kandi mitwi giviri ji migasa, vuli mulala zimita 2.2 vutambi, giviikwi kuzisonga zie zitiru.

¹⁷ Kosonga kwa vuli itiiru kwasiafwa na mangirinya gi minyororo javasanywa,

¹⁸ kandi yalomba zimbaso ziviri ziu mugasa gwa makuyu kukumbiriza.

¹⁹ Imitwi jaali igulu ku zisonga zie zitiru mu lusimbu jalombwa kufana kuli kimuli cha madanya, na vuli mulala gwaali nuvutambi igulu zimita 1.8.

²⁰ Javiikwa havundu haali aha vodonganu kuli uluju ahaali igulu wa mangirinya gi minyororo. Ziali ho zimbaso ziviri zia makomamanga zimia ziviri kukumbiriza vuli mutwi.

²¹ Huramu yasingiriza zitiru zie migasa yizi imbiri wu vwingiliru vwi Litembeli. Yagulika itiru yaali ku lovega lwa isavaalu Jakini, na yaali Ivaale, Boazi.

²² Imitwi ji migasa igulu ku zisonga zie zitiru jafana kimuli cha madanya. Nandio miyinzi ju kuzitiiru jatwekizwa.

Lidangi liumugasa

²³ Huramu yalomba lidangi livodonganu liu mugasa, musi mwalio mwaali zimita 2.2 na vugika vwa hagati vwali zimita 4.4, no vovodong'anu nivuva zimita 13.2.

²⁴ Kukumbiriza zimbega ziosi ziululiga lwi chova lwilidangi, zimbaso ziviri zie vimuga viu mugasa ziali ku, ziali nizilongeywe kindu kilala nilidangi yilio liosi.

²⁵ Lidangi liasingirizwa ku migongo ji vifananyi vie zigiriki zie migasalikomi na ziviri ziaheenza lovega lwi chova, zivaga nizihenzi mu vuli lovega.

²⁶ Vuvambalaru vwi lidigi ku zinduru zie lidangi vwali zimilimita 75. Luliga lwalio lwali kuli lwe kekombe, nilulingika ligemo kohenza ichova kuli kimuli chi lidanya. Lidangi zana liavugingaa amazi zilita 40,000.

Magare gi migasa

²⁷ Huramu yalomba kandi amagare gu mugasa likomi; vuli lilala liali zimita 1.8 vutambi, na zimita 1.8 vugika kandi zimita 1.3 vudiguluku kuzia igulu.

²⁸ Galombwa ku zimbaho ziahambanywa harara ziavikwa mu zifuremu,

²⁹ ni vifananyi kuli Zisimba, zigiriki, kandi vilombe viezimbaha ku zimbaho ziahambanywa zana; kandi ku zifuremu igulu kandi isi wi ving'ang'a ni zigiriki, viali ho vifananyi viavodong'anywa kuli zinyumba zia mang'oru

³⁰ Vuli ligare lie zing'ombe liali ni virenge vine viu migasa viukusingirizira. Ha zikona zine, viali ho vidiliru vie migasa vine viadiira ku ebenzeni. Vidiliru viukusingiriza yivio viasiafa mangirinya gi vifananyi vifanana nizinyumba zia mang'oru

³¹ Yaali ho ifuremu embodong'anu kwigulu kwe ebenzeni. Ifuremuyiyi yahivilira igulu zisendimita 45 kutura kwigulu kwi ligale, zisendimita 18 hasi muligare. Yaali na mangirinya gasalagwa kulikumbiriza.

³² Virenge vialio viali zisendimita 66 vutambi kuzia igulu. Viali isi wi zimbaho ziung'anywa na viukusingilira viali kedonye kilala ni zimbaho ziung'anywa.

³³ Virenge viali kuli via magare guvulwani. Viukusingilira viavio, magurudumu, zinzari, ni zahabu viosi viali kutura ku mugasa.

³⁴ Viali ho vidiliru vine, ha zikona zia hasi vialombwa kutura ku kedonye kilala ni ligare lie zing'ombe.

³⁵ Lukingiri lwi zisendimita 22 kukumbiriza zisonga zia vuli ligare. Vidililiru vialio nizimbaho viali kutura ku kedonye kilala ni ligare.

³⁶ Vidiliru ni zimbaho ziung'anywa viasiafwa ni vifananyi via (vakerubi) zisimba, kandi misaala ja makindu, hoosi huvwiyangu vwali kigira viene yivio; na mangirinya givifananyi vifanaa zinyumba zia mang'oru kuvikumbiriza.

³⁷ Kunangwa nindio magare zana galombwa; viosi viafanana, niviveeye novonene vulala vwere kandi mufano mulala mwere.

³⁸ Huramu yalomba kandi zibenzeni likomi, ndala ku vuli ligare. Vuli benzeni yaali mita 1.8 na hagati kandi nivugula himbi zilita 800 zia mazi.

³⁹ Yavika magare gatano kolovega lwi Isavaalu wi Litembeli, na zitano zindi kolovega lwi Ivaale wi Litembeli. Yavika lidangi ha kona eveeye hagati hi Isavaalu ni Ivugwi.

Viju vie Litembeli mu vwimbi

⁴⁰ Huramu yalomba zinyingu mijiko kandi zibakuli Kunangwa Huramu yamala miyinzi josi ja yahevwa na Solomoni.

⁴¹ Zitiru ziviri; Mitwi jalongwa kuli ibakuli ku zisonga zie zitiru Mangirinya gi minyororo javasanywa ku vuli mutwi

⁴² Makuyu gi migasa zimia zine, mu zimbaso ziviri zia makuyu imia ndala ku vuli luvaso zia kumbiriza mangirinya ku vuli mutwi;

⁴³ Magare gi zing'ombe likomi ni zibenzeni likomi;

⁴⁴ Lidangi, nizigiriki ziumugasa zie lidanga liediraa ku.

⁴⁵ Zinyingu, mijiko, ni zibakuli viju yivi viosi vie Litembeli; via Huramu yalombera Mwami Solomoni vialombwa ku mugasa gwasiiywa.

⁴⁶ Mwami yavikola visalulikizwi mu vodohi vwuvusandu mu kereremo cha Jorodani hagati ha Sakozi na Zarezani.

⁴⁷ Solomoni yaleka vindu yivi nivitabimiywi uvulitu vwavio, kigira viali vinyingi ligali nandio uvuliduhu vwa mugasa sivwamanyikana mba.

⁴⁸ Solomoni yalomba viju viu Mulitembeli ku zahabu: Vwali, emesa yu mugadi mutakatifu,

⁴⁹ Vinara likomi vie zitaya viasingira imbiri wa Havundu Hatakatifu ligali vitano kolovega lwi Isavaalu kandi vitano kolovega lwi Ivaale; vimuli, zitaya, kandi vigumiliru via manda gumuliru;

⁵⁰ vikombe, vindu viu kukalila zindambi zie zitaya, zibakuli, zisahani zie kimuli, kandi vifuria vitumikirwa kuginga amanda gu muliru; kandi uvubada vwi miliango ja Havundu Hatakatifu ligali kandi ji miliango jechova ji Litembeli. Viju yivi viosi vialombwa ku zahabu enzere.

⁵¹ Lwa mwami Solomoni yamala miyinzi josi ku Litembeli, yavika mu ving'oze via mavikiru vindu viosi via baba weve Daudi yaali niyamala kutakasa kigira vutumiki wa vwa Yahova: ifeza, izahabu, niviju vindi viosi.