1 Avami 6 - KITABU KITAKATIFU

Solomoni yumbaka Litembeli

¹ Inyima wi mihiga 480 kutura vandu va Isiraeli ni vatura mu kivala cha Egebeti, mu muhiga gwa kane gwu uvwamihi vwa Solomoni mu Isiraeli, mu mweli gwakaviri, umweli gwa Zivu, Solomoni yaatanga miyinzi jukwumbako Litembeli.

² Mugati mwi Litembeli mwaali zimita 27 vulungi, zimita 9 vugika na zimita 13.5, vutambi kuzia igulu.

³ Keng'oze chu vwingiliru chaali zimita 4.5 kuzia hasi na zimita 9 vugika, kuli hukusigamira hene.

⁴ Madigi gi Litembeli gaali mu na madirisha guvwiyangu vong'erere kolovega lwe ichova kuvita lovega lwu musi.

⁵ Madigi gichova, ku zinduru kandi inyima wi Litembeli, zigorofa zivaga ziumbakwa igulu kwung'anyia kulio, vuli igolofa yaali zimita 2.2 vutambi vwigulu.

⁶ Vuli keng'oze mu golofa ya hasi chaali zimita 2.2 vugika, mu igolofa ya hagati, ziali zimita 2.7 vugika, kandi mu igolofa yi igulu ligali ziali zimita 3.1 vugika. Lidigi lie Litembeli ku vuli lovega liali ling'erere kuvita lidigi liegolofa yaali isi walio; kunangwa ving'oze via hasi viali vinyala kwumbakirwa ku lidigi vugira kwumbaka zitiru ziazio.

⁷ Amagina gi Litembeli liumbakirwa gavaazirwa ha gayavwa, kunangwa si haali ho niliyoga lialombwa ni zinyundu, zimbazi anoho ku viju viosi vie vivia ihi Litembeli liali niliumbakangwamba.

⁸ Muliango gwu kwingira mu golofa ya hasi ligali gwaali kolovega lwi Isavaalu wi Litembeli, ni vika ingasi vizizaa kuduuka mu golofa yakaviri kandi yakavaga.

⁹ Kunangwa mwami Solomoni yamala liumbaka litembeli. Yavika mu lirungi lialombwa ni mialiru ji misaala kandi nizimbaho zie midaragwa.

¹⁰ Zigorofa zivaga ziung'anywa ku Litembeli ziali zimita 2.2 vutamba vwigulu; ziumbakwa ku madigi gi chova gi Litembeli kandi ziung'anywa kuzio ni mialiru ji midaragwa.

¹¹ Yahova yavolera Solomoni,

¹² “Niiva ulatia malago gange goosi, ndakokolera cha ndasuuviriza baba woovo Daudi.

¹³ Ndamenya hagati ha vandu vange Isiraeli na sindavaleka kali hakuzu mba.”

¹⁴ Kunangwa Solomoni yamala kwumbaka Litembeli.

Lisiaha liu mugati mwi Litembeli

¹⁵ Madigi gu mugati gafumwa ni zimbaho zie midaragwa kutura hasi kuduuka ku lirungi, kandi hasi haalwa lini zimbaho kutura ku misaala jamakaratasi.

¹⁶ Keng'oze chu musi chalaangwa Havundu Hatakatifu ligali humbakwa inyima wi Litembeli. Chaali vutambi vwi zimita 9, na chagavulanywa kutura ku Litembeli ni zimbaho zie midaragwa kutura hasi kuduuka ku lirungi.

¹⁷ Keng'oze chaali imbiri wa Havundu Hatakatifu Kuvita Hoosi chaali uvutambi vwi zimita likomi na zine.

¹⁸ Zimbaho zie midaragwa zana ziavazwa ku na mangirinya gi vimuga na amaua; mugati mwosi mwafumwa ni zimbaho zie midaragwa, kunangwa magina ga madigi sigali ganyala kololeka mba.

¹⁹ Inyima wi Litembeli, keng'oze chu mugati chumbakwa, ahe Lisandugu lie Lilagana lia Yahova liadukanaa liviikwi.

²⁰ Keng'oze chu mugati yiki chaali vutambi zimita tisa, vuvambalaru vwi zimita tisa kandi uvutambi kuzia igulu zimita tisa Viosi. Vwafuumwa ni zahambu esereze Vwali vwafumwo ni zimbaho zie midaragwa.

²¹ Mugati mwi Litembeli mwafumwa ni zahabu, kandi minyororo ji zahabu javiikwa vugika vwu vwingiliru vwe keng'oze chu mugati; chafumwa kandi ni zahabu.

²² Mugati mwosi mwi Litembeli halalanu vwali Havundu Hatakatifu viafumwa ni zahabu.

²³ Vifananyi viviri via Vakerubi vialombwa kutura ku zimbaho zia muzeituni, kandi viavikwa havundu Hatakatifu ligali Kuvita Hoosi; sa kilala chaali vutambi vwi zimita 4.4 igulu.

²⁴ Luvaha lulala lwu Mukerubi wu kutanga lwali zimita 2.2 na lundi kandi, zimita 2.2. Kunangwa zimbaha yizi ziali zimita 4.4 kutura ku esonga kuduuka ku esonga yindi.

²⁵ Mukerubi wakaviri naye kandi chabimwa zimita 4.4 kigira virombe viviri zana viafanana kandi ni vileng'ana muvonene.

²⁶ Vutambi kuzia igulu vwa vuli Mukerubi vwali zimita 4.4.

²⁷ Viavikwa kukagatana na Havundu Hatakatifu ligali Hoosi, kunangwa zimbaha ziavio nizinyirika ziadirana hagati he keng'oze; niizisonga zie zimbaha zindi nazio nizidiira madigi.

²⁸ Kerubi zana afumwa ni zahabu.

²⁹ Madigi gu uvuhiilu kandi keng'oze chu mugati goosi gaali nigasiahiywi na mangirinya gi vilombe vie zimbaha, misaala ja makindu kandi na kimuli.

³⁰ Kali hasi naho hafumwa ni zahabu.

³¹ Miliango giviri jihambana jalombwa kutura ku zimbaho zia muzeituni javiikwa mu vogono vwajo ha vwingiliru vwa Havundu Hatakatifu ligali. Igulu wu mu kivitiru, gaali ho amaliva gaavinika kuli engodi.

³² Miliango zana jasiafwa na mangirinya gi vilombe vie zimbaha, kandi misaala ja makindu kandi vimuli. Miliango, vilombe viezimbaha ni vimuli viafumwa ni zahabu.

³³ Vwingiliru kuzia muhiilu vasigamira, ifuremu yu mukiliango zikona zine yalombwa kutura ku zimbaho zia muzeituni.

³⁴ Jaali ho miliango jalingwa giviri jalombwa kutura ku lubaho lwumusaala gwa makaratasi,

³⁵ kandi jasiafwa na mangirinya gi vilombe vie zimbaha, misaala ja makindu, kandi vimuli viakunikwa vulahi keleng'ani ni zahabu ku.

³⁶ Mugizi gwu mugati gwumbakwa imbiri wi Litembeli, gwa kumbelizwa na madigi gaali nigagerekana ku mialiru ji midaragwa hagati hi zimbaso zivaga ziumbakirwa na magina gavazwa vulahi.

³⁷ Musingi gwi Litembeli gwaviikwa mu mweli gwa zivu mweli gwa kaviri mu muhiga gwa kane gwi liamiiha lia Solomoni.

³⁸ Mu mweli gwa munane, mweli gwa Buli, mu muhiga gwa likomi na mulala gwi liamiiha lia Solomoni, liumbakwa lie Litembeli liatwekizwa kuli gaali nigalohizwa. Liali nilivuguyi Solomoni mihiga saba kuliumbaka.