1 Avami 4 - KITABU KITAKATIFU

Avatumiki mu Vwamihi Vwa Solomoni

¹ Solomoni yaali mwami wa Isiraeli yoosi,

² Yava nivo vaali vatumikirie veve vigulu. Azaria muyaayi wa Zadoku yaali musaalisi.

³ Elihorefu na Ahija, avayaayi va Shisha vaali avang'odi vi Kiyaala Jehoshafati muyaayi wa Ahiludi yaali mulindi wa Mang'oda mu vitabu.

⁴ Benaya, muyaayi wa Jehoyada yaali munene wi liihi. Avasaalisi vaali Zadoku na Abiazari.

⁵ Munene wa vanene vi (zisoma) zia Solomoni yamiha yaali Azaria, muyaayi wa Nazani. Muhaani wi zing'anagani ku mwami, yaali musaalisi Zabuudu, muyaayi wa Nazani.

⁶ Munene wa avatumikiri vi inyumba yu vwami yaali Ahishari. Munene wi miyinzi ju kunigwa yaali Adoniramu muyaayi wa Abida.

⁷ Solomoni yatovola avasaza likomi na vaviri kuli avagavana avanene vi zisoma zia yamiha mu Isiraeli yoosi. Venyeka valetele mwami na vinyumba yeeye chukulia kutura muvivala viavo. Mundu sa mulala yanigwa koleta viukulia ku mweli mulala ku muhiga.

⁸ Yaga nigo amita ga avanenelikomi na varini yava harara ni zisoma zia valinda: Benhuri yamiha mu Losoma lwi vigulu via Efuraimu;

⁹ Ben dekeri yamiha ku Madaala manene ga Makazi, Shaalibimi, Bezi-shemeshi, Eloni, Bezi Hanani;

¹⁰ Ben Hesedi; yamiha ku Madaala manene ga Arubozi na Sako kandi losoma lwosi lwa Heferi.

¹¹ Veni Abinadabu, waleeta Tafazi mukaana wa Solomoni yamiha ku losoma luosi lua Dori.

¹² Baana muyaayi wa Ahiludi yamiha madaala manene ga Tanaki, Megido, kandi kivala choosi ahimbi na Bezishani, ahimbi ni lidaala lia Zarezani, Isavaalu wi lidaala lia Jezireeli kuduuka ku madaala manene ga Abeli-mehola kandi Jokomeamu.

¹³ Ben Geberi; yamiha lidaala linene lia Ramozi Gileadi, na madaala mu Gileadi gaveeye gi vikiliango cha Jairi, kisukururwi cha Manase, kandi losoma lwosi lwa Ago mu Bashani, madaala manene goosi sitini, gumbakirwa lugaga lwa madigi madinyu, kandi Virivwa vie Miruguyu ji migasa.

¹⁴ Ahinadabu, muyaayi wa Ido yamiha Losoma lwa Mahanaimu;

¹⁵ Ahimaazi, waleeta Basemazi, mukaana wundi ku vakana va Solomoni yamiha Losoma lwa Nafutali,

¹⁶ Baana muyaayi wa Hushai yamiha losoma lwa Asheri kandi lidaala lia Bealozi,

¹⁷ Jehoshafati muyaayi wa Parua yamiha losoma lwa Isakari;

¹⁸ Shimei muyaayi wa Ela yamiha losoma lwa Benjamini;

¹⁹ Geberi muyaayi wa Uri yamiha kivala cha Gileadi, chamiifwa nu mwami Sihoni wa vandu va kandi mwami Ogu wa Bashani. Komeeda ku vanene likomi na vaviri yava yaali Mwamihi mulala ku kivala choosi chi Ivuyuda.

Limeedeka mu Vwamihi Vwa Solomoni

²⁰ Avandu vi Ivuyuda na Isiraeli vaali vanyingi kuli muyeke ku luginga lwi nyanza; valia nivanwa kandi nivasangala.

²¹ Vwamihi vwa Solomoni vwosi vwa haambanyia harara vivala kutura ku mugera gwa Efurate kuduuka ku kivala cha Avafilisitia, kandi kuduuka ku lwako lwa Egebeti. Avandu vi vivala yivi viosi vaatunga uvusuru kuye kandi yavamiiha mu madiku goosi ga yaali mwoyo.

²² Viukulia viosi via Solomoni yenya vuli lidiku viali magunia 30 gu viusie vunyuki na amagunia 60 gu vusie vwa masia;

²³ zing'ombe likomi zinetu zing'omeru zialihizirwa, zing'ombe ziu muchayo sirini, amagondi imia indala komeeda ku zimbongo, visusu, zikongoni ni zingoko zinetu.

²⁴ Solomoni yamiha kivala choosi keveeye imadioli wu mugera gwa Efurate, kutura Tifusa ku mugera gwa Efurate kuduuka imadioli wi lidaala linene lia Gaza. Avami vosi imadioli wumugera gwa Efurate vamifwa naye, kandi yaali mu mirembe ni vivala viosi viali vatende veve.

²⁵ Ku lohono lwa yaali mwoyo kuli mwami, avandu muvivala viosi vie Ivuyuda na Isiraeli kutura Dani kuduuka Beerisheba vamenya mu mirembe; vuli vandu vinyumba vaali ni vizabibu kandi makuyu gaavo.

²⁶ Solomoni yaali kandi ni vigo vie zibarasi 40,000 via magare geege gu vulwani kandi zibarasi zia vasikari 12,000.

²⁷ Aviimiliri veve vanene 12 sa mulala, mu mweli gwa yahevwa, yaleeta viukulia viu Mwami Solomoni yenya kandi via vosi valiza mu nyumba yu vwami. Vaahira yo viukulia viosi vienyeka.

²⁸ Vuli mwamihi yaleeta kegero chiche chishairi kandi livuva lio vunyasi ha vienyekanga kigira zibarasi zia magare gu vulwani kandi zibarasi zindi.

²⁹ Nyasaye yaaha Solomoni ovogeri ni limanyiriza linyingi kandi limanya liveeye linene ligali.

³⁰ Solomoni yaali mugeri kuvita avageri vosi vi Ivugwi, anoho avageri va Egebeti.

³¹ Yaali mugeri ligali kuvita avandu vandi vosi; mugeri kuvita Ezani kutura mu kivala cha Ezarahi, kandi Hemani, Kalikoli, na Darida, avayaayi va Maholi, kandi Lusuma lwu vukumi vwivwe lwalanda hoosi muvivala viali muvotende.

³² Yaakonga zing'ano 3,000, niyimba zinyimbu 1,005.

³³ Yamoloma makuva gi livamwoyo lie misaala ni vitagwa, kutura ku midaragwa ja Lebanoni kuduuka ku visaara vimerana ku madigi; yamoloma kandi amakuva zinyama ziosi na manyonyi gi vimolaa kuli zinzoka, ni zisuzi.

³⁴ Avami vanene mu lirova liosi vahulira makuva govogeri vwivwe kandi nivatuma avandu kuzia kumuhuliriza.